B. H. Roberts

Si Brigham Henry Roberts (1857–1933) usa ka kanhi misyonaryo, eskolar, theologian, historian, ug Seventy nga misulat ug mitipon og daghang mga libro, lakip sa unang dinaghang bolumin sa kasaysayan sa Simbahan ug usa ka serye sa teyolohiya alang sa mga Korum sa Seventy. Si Roberts nakigtigi batok sa mga kritiko sa Basahon ni Mormon, nagmatuod nga ang kamatuoran sa basahon makasugakod sa makuti nga akademikanhong pagtuki. Sa iyang pagka-eskolar nakakuha siya og reputasyon isip usa ka “tigpanalipod sa hugot nga pagtuo.”¹

Natawo sa kabos nga pamilya sa Lancashire, England, si Roberts sa pagkabata adunay kasinatian nga sa kaulahian iyang gihulagway isip makahahadlok ug makasubo, nga ang tipik sa hinungdan mao ang kamahiligon sa iyang amahan nga mosugal ug moinom.² Medyo milambo ang kinabuhi human ang iyang mga ginikanan mipasakop sa Simbahan, apan ang iyang inahan, si Ann, midesisyon nga mobuwag sa iyang amahan ug mibiyahe ngadto sa Territoryo sa Utah aron moipon sa mga Santos sa Ulahing mga adlaw didto. Tungod sa iyang sitwasyon sa pangwarta, wala madala ni Ann ang tanan niyang mga anak, gibilin ang batan-ong si Roberts nga giatiman sa usa ka lokal nga pamilya niadtong 1862. Niadtong 1866, si Roberts mibiya sa England aron moipon sa iyang inahan ug nabunyagan sa misunod nga tuig.

Si Roberts miserbisyo og pipila ka misyon, lakip ang mga paglibot didto sa Habagatan ug Silangang bahin nga mga Estado nga mga Misyon. Mibalik siya ngadto sa Habagatang bahin sa mga Estado nga Misyon isip presidente sa misyon didto niadtong 1883. Ang mga misyonaryo nianang panahona nakasinati og bayolenteng kasilag didto sa habagatang bahin sa Estados Unidos. Niadtong 1884, si Willian S. Berry ug si John H. Gibbs gipusil ug napatay sa usa ka maskarado nga manggugubot [mob] didto sa Tennessee nga nahimong naila isip ang Cane Creek Massacre. Isip akting nga presidente sa misyon, si Roberts gitahasan sa pagkuha sa mga patayng lawas niining mga misyonaryo ug mahan-ay ang ilang transportasyon pabalik sa Utah alang sa tukma nga paglubong. Aron mapanalipdan ang iyang pagkatawo, nagtakoban siya pinaagi sa pagbalbas sa iyang bungot ug pagsul-ob og gision nga sinina.

Si B. H. Roberts gilitratohan sa iyang gigamit nga pagtakoban sa dihang iyang gikuha ang mga lawas sa gipamatay nga mga misyonaryo niadtong 1884 samtang siya nagserbisyo isip presidente sa misyon.

Sama sa daghang mga Santos sa Ulahing mga adlaw nga mga kalalakin-an sa ulahing bahin sa mga tuig 1800, si Roberts nabilanggo tungod sa paghimo og dinaghan nga kaminyoon didto sa Utah. Human sa lima ka bulan sa bilanggoan nakagawas siya niadtong 1889, nahimo siya nga aktibo sa politika ug miserbisyo sa 1895 nga konstitusyonal nga kombensiyon didto sa Utah, diin gidibatihan sa mga magbabalaod ang usa ka sugyot ngadto sa Kongreso sa Estados Unidos alang sa pagkahimong estado. Si Roberts misupak sa katungod sa kababayen-an sa pagbotar [women’s Suffrage] bisan og ang kombensiyon mibotar nga pabor niini tungod sa kahadlok nga ang presidente sa Estados Unidos nianang higayona modumili sa pagtugot sa gisugyot nga konstitusyon uban sa gilakip nga katungod sa pagpili.³ Pagkahuman nga ang Utah natugotan sa pagkahimong estado, si Roberts milangsad alang sa buhatan sa Partidong Democratiko ug sa kataposan napili ngadto sa Balay Balaoranan [House of Representatives] niadtong 1898. Tungod sa nagpabilin nga nasodnong pagsuspetsa mahitungod sa paghimo og dinaghang kaminyoon sa mga Santos sa Ulahing mga adlaw, ang Kongreso sa Estados Unidos midumili kang Roberts sa iyang kongresyonal nga puwesto.⁴

Dalaygon si Roberts nga miserbisyo isip presidente sa Unang Konseho sa Seventy gikan sa 1887 hangtod sa iyang kamatayon niadtong 1933, atol sa maong higayon siya misulat og pipila ka impluwensiyal nga mga buhat. Siya mikonsiderar sa iyang mapanganduyong paningkamot sa pagtakdo sa tanan niyang relihiyusong panghunahuna ug siyentipikong panabot, The Truth, the Way, and the Life: An Elementary Treatise on Theology [Ang Kamatuoran, ug ang Kinabuhi: Usa ka Elementaryang Artikulo sa Teyolohiya], ang iyang obra maestra. Apan sa dihang ang mga tigbasa sa Unang Kapangulohan ug sa Korum sa Napulog Duha ka Apostoles nagdibate sa pipila sa iyang mga pahayag kabahin sa edad sa yuta, sa natural nga ebolusyon, ug mahangturong pag-uswag, si Roberts mihukom sa dili pag-usab o pagmantala sa maong sinulat. Ang iyang makasaysayanong mga buhat, hinoon, gimantala sa Simbahan. Ang iyang edisyon sa pito ka bolumin nga History of the Church [Kasaysayan sa Simbahan] ug ang iyang unom ka bulomin nga Comprehensive History of the Church [Komprehensibo nga Kasaysayan sa Simbahan] nahimong mahinungdanong butang sa makasaysayanong sinulat sa mga Santos sa Ulahing mga Adlaw sulod sa nahibilin nga ika-20 nga siglo.

May Kalabotan nga mga Hilisgotan: Critics of the Book of Mormon, Quorums of the Seventy, Reed Smoot Hearings, Political Neutrality