Zina Diantha Huntington Young
Si Zina Diantha Huntington Jacobs Young magtatambag ni Eliza R. Snow sa Kinatibuk-ang Kapangulohan sa Relief Society ug mipuli kaniya sa 1888 aron mahimong ikatulong presidente sa Relief Society. Daghang mga Santos sa Ulahing mga Adlaw ang nahinumdom niining duha ka mga pangulo isip nagkauyon sa usag usa: si Eliza isip ang pangulo sa Relief Society, si Zina isip ang kasingkasing niini.1 Naila siya isip si “Zina, ang tighupay” alang sa iyang kalooy, kalumo, ug personal nga pangalagad.2
Hulagway ni Zina D. H. Jacobs Young.
Natawo sa 1821 ngadto sa usa ka tinahud ug tumang ka relihiyosong pamilya 100 ka milya [160 kilometro] amihanang-silangan sa Palmyra, New York, gibati ni Zina ang kamatuoran sa Basahon ni Mormon sa dihang una niya kining nakita isip usa ka batan-ong babaye. Mipasakop siya sa Simbahan uban sa iyang pamilya sa 1835.3 Human sa iyang pagkakabig, napanalanginan si Zina og mga espiritwal nga mga gasa, lakip ang gasa sa paghubad sa mga pinulongan.4 Nakat-unan usab ni Zina gikan sa iyang inahan kon unsaon sa pagpangalagad sa masakiton, pinaagi sa pisikal nga pag-amuma ug pag-ayo pinaagi sa pagtuo.5 Kauban ang ubang mga Santos sa Ulahing mga Adlaw, mipuyo siya sa Kirtland, nag-antus didto sa Missouri sa 1838, nakakaplag og kapasilungan sa Nauvoo, ug miuban sa panaw sakay sa karomata ngadto sa Utah.
Sa Nauvoo, nahimo si Zina nga usa sa unang natudloan, sa pagdawat, ug sa kadugayan sa paghimo sa dinaghang kaminyoon. Ang iyang kasinatian nagpakita sa kakuti sa mga relasyon nga usahay anaa atol niining unang ang-ang sa paghimo. Sa 1840 nag-inusara siyang gitudloan ni Joseph Smith mahitungod sa dinaghang kaminyoon ug misugyot kaniya og kaminyoon. Wala makasiguro mahitungod sa paghimo, mibalibad si Zina. Sa 1841 giminyoan niya si Henry Jacobs, apan pipila ka buwan ang milabay, human makadawat og personal nga pagpadayag kabahin sa dinaghang kaminyoon, mihukom siya nga magpa-sealed alang sa kahangturan ngadto ni Joseph Smith.6 “Akong gisiksik ang kasulatan,” nahinumdom siya, “ug pinaagi sa mapainubsanong pag-ampo ngadto sa akong Langitnong Amahan nakabaton ako og pagpamatuod alang sa akong kaugalingon.”7
Human sa kamatayon ni Joseph, daghan sa iyang mga asawa gi-sealed ngadto sa ubang mga pangulo sa Simbahan alang niini nga kinabuhi lamang, lakip si Zina, kinsa gi-sealed ngadto ni Brigham Young sa 1846 samtang minyo pa sa sibil ngadto ni Henry. Sa wala madugay gihulagway ni Zina ang iyang kaminyoon ngadto ni Henry ingon nga walay kalipay, ug sa pipila ka mga higayon sila nagbulag.8 Sa Winter Quarters, diin ang mga Santos unang mipuyo sa dayag sa dinaghang mga pamilya, miuban si Zina sa panimalay nga Young. Duol sa samang panahon, mibiya si Henry aron magmisyon, ug sa wala madugay nagminyo og laing babaye.9 Nagsulti kabahin sa kakuti niini nga mga relasyon, misulat siya ngadto ni Zina, “Adunay mga kabalhinan sa panahon ug mga kausaban sa kahangturan ug ang tanan mahimong matarung sa katapusan.”10
Adunay duha ka anak nga mga lalaki si Zina ni Henry Jacobs ug usa ka anak nga babaye ni Brigham Young. Nagpadako usab siya og tulo ka mga bata nga natawo ngadto ni Clarissa Ross Young, laing asawa ni Brigham Young, human sa kamatayon ni Clarissa sa 1857.11 Si Zina miserbisyo isip ang Kinatibuk-ang Pangulo sa Relief Society sa 1890 sa dihang gi-anunsyo ni Wilford Woodruff ang Pahayag [Manifesto], nga mipahunong sa dinaghang kaminyoon diha sa Simbahan.12
Kanunay si Zina nga aktibo diha sa iyang komunidad. Miawit siya sa koro [choir] sa templo sa Kirtland.13 Mitudlo siya sa eskwelahan sa Nauvoo, Winter Quarters, ug sa Siyudad sa Salt Lake.14 Sa Siyudad sa Salt Lake, nagtuon si Zina sa pagkamananabang ug sa wala madugay nangulo og mga kurso sa pagpanabang sa panganak [obstetrics] ug nursing ug miserbisyo diha sa hunta sa Deseret Hospital. Nakat-unan niya ang pag-amuma og mga ulod-hantatawo [silkworms] isip kabahin sa pagpalambo og lokal nga industriya sa sida nga panapton, ug sa 1876 nahimo siyang presidente sa Deseret Silk Association. Aktibong gipauswag ni Zina ang katungod sa mga babaye sa pagboto, nagtambong og mga nasudnong mga panagtigum ug nagserbisyo isip ang bise-presidente sa National Council of Women.
Bisan sa tanan niyang uban nga mga kalihokan, si Zina hilabihan usab ka aktibo sa Relief Society. Nahimo siyang miyembro sa society sa Nauvoo sa ikaduhang miting niini ug unya, sa pagsugod sa 1860, mitabang ni Eliza R. Snow sa pag-organisar sa lokal nga mga Relief Society, mibiyahe og liboan ka mga milya aron sa pagbisita sa mga sister sa tibuok Utah. Gipaluyohan si Zina sa Simbahan isip Kinatibuk-ang Presidente sa Relief Society diha sa Abril 1888 nga kinatibuk-ang komperensya. Human sa usa ka tuig, gidumala ni Zina ang unang Kinatibuk-ang Komperensya sa Relief Society didto sa Assembly Hall sa Temple Square. “Sisters, maghimo kita og dako nga panaghiusa nga mabinantayong magtrabaho [phalanx] ug sa pagbarug alang sa matarung,” gitudlo niya diha niana nga miting. “Magpaubos kita ug maglig-on, magtahud sa kamatuoran, ug magmaisugon sa pagpadayon niini.”15 Gitudlo ni Zina pinaagi sa ehemplo ang importansya sa serbisyo diha sa templo. Miserbisyo siya sa Salt Lake Endowment House, sa mga Templo sa St. George ug Logan, ug isip usa ka matron sa Templo sa Salt Lake sa dihang gipahinungod kini sa 1893.
Si Zina namatay niadtong Agosto 28, 1901. Usa ka kadungan mitawag kaniya og babaye kinsa “usa ka masadyaon sa panahon nga ang maisug lamang nga mga kalag ang makapahiyom.”16 Ang lain mihinumdom kaniya isip “usa ka anghel sa paglaum ug hugot nga pagtuo ngadto sa mga liboan ug mga liboan ka mga Santos sa Ulahing mga Adlaw.”17
Kalabut nga mga Hisgutanan: Relief Society; Brigham Young