Kasaysayan sa Simbahan
Pagpahiuli sa Melchizedek Priesthood


“Pagpahiuli sa Melchizedek Priesthood,” Mga Hisgutanan sa Kasaysayan sa Simbahan

“Pagpahiuli sa Melchizedek Priesthood”

Pagpahiuli sa Melchizedek Priesthood

Si Joseph Smith ug si Oliver Cowdery mipamatuod nga pagka-Mayo 15, 1829, si Juan Bautista mipakita ngadto kanila ug mihatag kanila og awtoridad sa pagbunyag. Sumala sa 1838 nga kasaysayan ni Joseph Smith, si Juan misulti kanila nga wala pa silay “gahum sa pagpandong sa mga kamot, alang sa gasa sa Espiritu Santo, apan nga kini kinahanglan nga itugyan ngari kanamo sa tukma nga panahon.”1 Kini nga pagpasabut mipalanog sa pamahayag sa Bautista sa Bag-ong Tugon, nga bisan tuod siya mibunyag sa iyang mga sumusunod “uban sa tubig ngadto sa paghinulsol” usa ka “gamhanan kay kanako” “mobunyag kaninyo uban sa Espiritu Santo, ug uban sa kalayo.”2 Human na-orden si Joseph ug si Oliver, mipasabut si Juan Bautista nga “siya milihok ubos sa direksyon ni Pedro, Santiago ug Juan”, kinsa mao ang tinugyanan sa mas labaw pa niini nga awtoridad ug nga ang gahum sa paghatag sa gasa sa Espiritu Santo “kinahanglan nga itugyan diri kanamo sa tukma nga panahon.”3

Ang pagpakita ni Pedro, Santiago, ug Juan ngadto kang Joseph Smith ug Oliver Cowdery napamatud-an sa daghang mga tinubdan. Usa ka pagpadayag ngadto ni Joseph Smith namulong kabahin sa pagbisita ni Pedro, Santiago, ug Juan, “kinsa akong gipadala nganha kaninyo, pinaagi kanila ako miorden kaninyo ug mokumpirmar kaninyo nga mamahimong mga apostoles ug linain nga mga saksi sa akong ngalan, ug magdala sa mga yawe sa inyong pagpangalagad.”4 Diha sa panalangin nga gihatag ni Joseph Smith kang Oliver Cowdery nga narekord niadtong Oktubre 1835, namulong siya kabahin sa pagdawat ni Oliver sa “balaan nga priesthood ubos sa mga kamot kanila kinsa gigahin tungod ug alang niining katuyoan sulod sa dugayng panahon, gani kadtong nakadawat niini ubos sa mga kamot sa Mesiyas.”5 Sa mga sulat sa ulahing bahin sa iyang kinabuhi, si Olivery Cowdery namulong niining sagradong okasyon. Sa sulat iyang gisaysay ang pagbati og katingala kon diin siya nagbarug “sa atubangan ni Pedro, sa pagdawat sa mas Labaw” nga priesthood.6

Imahe
Sila si Pedro, Santiago, ug Juan mipakita ngadto ni Joseph ug Oliver Cowdery

Sila si Apostoles Pedro, Santiago, ug Juan mipakita ngadto ni Joseph ug Oliver Cowdery.

Imposible gyud ang pagtino sa petsa niining langitnong pagpakita gikan sa mga tinubdan nga anaa. Ang bugtong asoy nga gikan ni Joseph nga naghatag og mga detalye mahitungod sa kahimtang sa panan-awon mao ang anaa sa sulat niadtong 1842 (karon gihatagan og opisyal nga pagtugot isip Doktrina ug mga Pakigsaad 128) diin siya mipamatuod nga iyang nadungog “ang tingog ni Pedro, Santiago ug Juan didto sa kamingawan tali sa Harmony, Distrito sa Susquehanna, ug Colesville, Distrito sa Broome; sa suba sa Susquehanna, nagpahayag sa ilang mga kaugalingon isip mga naghupot sa yawe sa gingharian.”7 Ang modernong mga magbabasa adunay managlahi nga mga pagsabut sa mga istorya sa mga panahon sa pagpakita ni Pedro, Santiago ug Juan. Sa ilang mga pagbana-bana maanaa sa mga pipila ka semana human sa pagpakita ni Juan Bautista niadtong Mayo 15, 1829, ngadto sa nanglabay nga mga bulan.8 Bisan og daghan sa mga istorya niining balaanong pagpakita gipagawas paglabay na sa mga katuigan, giabagan kini, bisan og dili kaayo detalyado, og mga kasayuran sa mga pagpangalagad sa mga anghel kinsa mihatag nilang Joseph ug Oliver og usa ka balaanong katungdanan.9

Sa gimantala ni Joseph Smith nga kasaysayan wala gisugid sa detalye ang pagpahiuli sa mas labaw nga awtoridad, apan naghulagway kini nga sa mga panahon human sa iyang pagbalhin sa Fayette, New York, niadtong ting-init sa 1829, si Joseph ug ang uban “nagmatinguhaon nga kana nga saad matuman ngari kanamo”—nga madawat nila “ang awtoridad sa pagpandong sa mga kamot alang sa gasa sa Espiritu Santo.”10 Sa kasaysayan gipasabut nga sa panimalay ni Peter Whitmer Sr. sa Fayette, New York, human nag-ampo ug nangayo og direksyon sa Dios, ang tingog sa Ginoo misugo kanila sa pag-orden sa usag usa. Sila gisugo, hinoon, nga ilangay una kining pag-orden hangtud kadtong kinsa nabunyagan makatuman ug modawat kanila isip nga espiritwal nga mga magtutudlo.

Sa dihang giorganisar ang Simbahan niadtong Abril 6, 1830, si Joseph ug Oliver milihok nga may balaan nga awtoridad sa pagbunyag ug sa paghatag sa gasa sa Espiritu Santo. Kadtong anaa diha sa miting sa organisasyon midawat sa liderato ni Joseph ug Oliver, ug si Joseph ug Oliver miorden sa usag usa isip mga elder pinasubay sa gitudlo kanila sa Ginoo. Sa mao gihapon nga higayon sama niini nga miting, si Joseph mitapos sa “Mga Artikulo ug mga Pakigsaad sa Simbahan ni Kristo” (karon Doktrina ug mga Pakigsaad 20), nga namahayag nga taliwala sa ilang mga responsibilidad isip mga elder mao “ang pagkumpirma sa simbahan pinaagi sa pagpandong sa mga kamot ug sa paghatag sa Espiritu Santo. ”11

Pagpalambo sa Panabut

Atol sa unang mga katuigan human naorganisar ang Simbahan, si Joseph Smith ug ang ubang nag-unang mga miyembro sa Simbahan wala mogamit sa termino nga Aaronic Priesthood o Melchizedek Priesthood sa paghulagway sa awtoridad nga ilang nadawat. Napalambo ang ilang panabut sa priesthood sa paglabay sa panahon ug pinaagi sa tabang sa padayon nga pagpadayag.

Ang Bag-ong Tugon naglangkob sa mga tudling nga namulong sa mga pari ug mga halangdon nga pari [high priest] ug may kalabutan sa pagkapari ngadto ni Aaron ug Melchizedek.12 Ang Basahon ni Mormon sa samang paagi nagtudlo nga ang tawo sa Daang Tugon nga si Melchizedek “midawat sa katungdanan sa Halangdon nga Pagkapari, sumala sa balaan nga kapunongan sa Dios.”13 Pinasikad diha niini nga mga kasulatan, ang mga pagpadayag ni Joseph Smith tali sa mga tuig 1831 ug 1835 mitukod sa nagkalain-laing mga katungdanan sa priesthood ug katin-awan nga mga terminolohiya. Niadtong Hunyo 1831, si Joseph Smith ug si Lyman Wight mi-orden sa pipila ka mga tawo (lakip ang usag usa) “ngadto sa Halangdon nga Pagkapari,” tingali nagpasabut ngadto sa katungdanan sa halangdon nga pari.14 Namalandong sa ilang pagsabut sa Biblia, ang ubang nag-unang mga miyembro sa Simbahan misabut niining halangdon nga pagkapari isip “ang kapunongan ni Melchizedek.”15 Niadtong Septyembre 1832, usa ka pagpadayag nagpasabut nga ang mas ubos nga priesthood nasentro sa katungdanan sa priest, uban sa teacher ug deacon isip sumpay. Ang mas labaw o “halangdon nga pagkapari” nakasentro diha sa katungdanan sa halangdon nga pari, uban sa mga katungdanan sa bishop ug mga anciano [elders] nga sumpay. Samtang ang mas ubos nga priesthood mangalagad sa “ebanghelyo sa pagpangandam,” lakip sa ordinansa sa bunyag, ang mas labaw nga priesthood “naghupot sa yawe sa mga misteryo sa gingharian, gani ang yawe sa kahibalo sa Dios.”16

Usa ka instruksyon kabahin sa priesthood nga gimantala diha sa 1835 nga Doktrina ug mga Pakigsaad mihatag sa terminolohiya nga gigamit gihapon karon sa paghulagway sa Melchizededk Priesthood. Namalandong sa mga panabut diha sa gipadayag, ang instruksyon mitawag sa mas labaw ug mas ubos nga mga priesthood nga “ang Melchizedek, ug ang Aaronic.” Sa wala pa ang panahon ni Melchizedek, ang labaw nga pagkapari “gitawag og balaan nga pagkapari, sunod sa kapunongan sa Anak sa Dios”, ug sa kaulahian gipasabut isip “ang Melchizedek nga pagkapari.” Ang pagtudlo mipasabut nga “tanan nga lain nga mga kagamhanan o mga buhatan diha sa simbahan mao ang mga sumpay niini nga pagkapari,” nga kini “adunay gahum ug pagtugot ibabaw sa tanan nga mga buhatan diha sa Simbahan,” ug nga “ang Kapangulohan sa Halangdon nga Pagkapari, sunod sa kapunongan ni Melchizedek,” sa wala madugay gitawag og Unang Kapangulohan, adunay katungod sa pagpangulo sa Simbahan.17

Pagpahiuli sa Kahingpitan

Niadtong 1836 sa Templo sa Kirtland, si Elijah mipakita kang Joseph Smith ug Oliver Cowdery ug mihatag kanila og mga yawe, o awtoridad, nga makapahimo kanila “sa pagpabalik sa mga kasingkasing sa mga amahan ngadto sa mga anak, ug ang mga anak ngadto sa mga amahan, basin pa unya ang tibuok yuta pagahampakon uban sa usa ka tunglo.”18 Sa Nauvoo si Joseph Smith mipasabut nga ang “gahum ug tawag ni Elijah mao nga kamo adunay gahum sa paghupot sa mga yawe sa pagpadayag, mga ordinansa, mga orakulo, mga gahum, ug mga pagtuga sa kahingpitan sa Melchizedek Priesthood.” Kini nga awtoridad nakapahimo sa mga lider sa Simbahan sa pagpahimutang “og silyo sa Melchizedek priesthood diha sa balay ni Israel” sa pagpangandam alang sa pag-anhi sa Mesiyas sa Iyang templo.19 Molihok ubos niining gipahiuli nga awtoridad, si Joseph Smith mipaila sa endowment [tuga] sa templo ug mga ordinansa sa pag-seal diha sa Nauvoo, Illinois, niadtong mga 1840 agig pagpangandam alang sa pagkahuman sa templo didto.20

Sa hapit nang motapos ang iyang kinabuhi, si Joseph Smith malipayon nga namulong kabahin sa mga panalangin sa Ginoo sa pagpahiuli sa kahingpitan sa priesthood. Iyang gihulagway kining pagpahiuli dili isip binugtong nga panghitabo, kondili mga hugna sa mga panghitabo sa panahon sa iyang propetikanhong pagpangalagad. Ang Propeta mitimaan nga ang priesthood gipahiuli na “naghatag og pagtulun-an ngadto sa lain nga pagtulun-an, lagda ngadto sa lain nga lagda; karon gamay, ug sa lain nga panahon gamay.” Subli niyang gisaysay ang milagruso nga pagpakita sa “nagkalainlain nga mga Anghel,” matag usa “nagpahayag sa ilang tanan nga mga kapaigoan, ilang mga katungod, ilang mga yawe, ilang mga dungog, ilang pagkaharianon ug himaya, ug gahum sa ilang pagkapari.”21

May Kalabutan nga mga Hisgutanan: Restoration of the Aaronic Priesthood