“Mga Punoang Buhatan sa Simbahan,” Mga Hisgotanan sa Kasaysayan sa Simbahan (2022)
“Mga Punoang Buhatan sa Simbahan,” Mga Hisgotanan sa Kasaysayan sa Simbahan
Mga Punoang Buhatan sa Simbahan
Niadtong 1833, si Joseph Smith ug ang Unang Kapangulohan mihimo og plano alang sa luna sa Siyudad sa Zion, ang siyudad diin mao ang pundokanan sa mga Santos sa Ulahing mga Adlaw agig pagpangandam sa Ikaduhang Pag-anhi ni Jesukristo. Kini nga siyudad gitukod sa palibot sa usa ka komplex sa 24 ka templo. Ang plano nagpasabot nga kining mga estraktura gamiton alang sa pagsimba sa kongregasyon, administrasyon sa Simbahan, ug sa edukasyon ug mosangkap og luna alang sa nagkalain-laing korum ug mga organisasyon sulod sa Simbahan. Ang siyudad ug ang mga templo niini wala gayod matukod apan nagpabilin nga usa ka sayo nga modelo alang sa punoang buhatan sa Simbahan.1
Tali sa 1830 ug 1847, isip ang unang duha ka presidente sa Simbahan, si Joseph Smith ug si Brigham Young, nagbalhin-balhin gikan sa usa ka dapit ngadto sa laing dapit, ang mga siyudad diin ilang gihimo nga ilang mga panimalay nagsilbing mga punoang buhatan sa Simbahan. Sa pag-abot sa mga Santos sa Walog sa Salt Lake, gihimo ang mga plano sa pagtukod og templo, ug sa wala madugay si Brigham Young mitukod og opisina alang sa Presidente sa Simbahan tupad sa iyang panimalay sa Siyudad sa Salt Lake, usa ka iskina nga kasikbit sa templo.2
Sulod sa mga katuigan, ang dapit nga naglibot sa luna nga gitukoran sa templo nagsilbi nga punoang buhatan sa Simbahan, nga milambo aron matubag ang mga panginahanglan sa nagtubo nga tibuok kalibotan nga organisasyon. Kining pipila ka iskina sa Siyudad sa Salt Lake nahimong adtoanan nga mga dapit alang sa pagsimba, administrasyon, edukasyon, kalihokang pampubliko, ug uban pang mga katuyoan. Ang mosunod nga mga mapa magpakita sa dapit libot sa Temple Square sa tulo ka higayon atol sa kasaysayan niini. Ang kauban nga mga litrato nagpakita og daghan sa labing prominenting mga gambalay.
Tunga-tungang bahin hangtod sa kataposang bahin sa ika-19 nga Siglo
1. Dapit nga gitukoran sa Salt Lake Temple
Ang dapit nga gitukoran sa Salt Lake Temple. Dili lang dugay human sa pag-abot sa mga Santos sa Ulahing mga Adlaw sa Walog sa Salt Lake, si Brigham Young mipili sa dapit alang sa templo. Gisugdan ang pagtukod niadtong Pebrero 1853, ug ang templo nakompleto ug gipahinungod pagka-1893.
2. Daang Tabernakulo
Ang unang dakong estraktura nga gitukod diha sa dapit sa Temple Square mao ang orihinal nga Tabernakulo, sa kadugayan gitawag nga ang “Daang Tabernakulo” kay nahimong pasiuna sa modernong Tabernakulo nga anaa sa duol. Kini natukod tali sa mga 1851 ug 1852 diin ang Assembly Hall nagbarog karon. Si Truman O. Angell, ang arkitekto, ang midisenyo sa Daang Tabernakulo gamit ang ubos nga adobe nga mga bungbong, gable ang porma sa atop, ug ang salog ubos sa lebel sa yuta. Ang gambalay makapasigo og mga 2,500 ka tawo.
3. Tabernakulo
Mga bato sa pamag-ang alang sa bag-o nga Tabernakulo ipuli sa Daang Tabernakulo nga gipahimutang niadtong Hulyo 1864. Si William H. Folsom midesinyo sa gambalay, si Henry Grow ang nagdumala sa pagtukod niini, ug si Truman O. Angell ang midisenyo sa balkonahe human ang gambalay nakompleto. Ang tabernakulo mipahigayon og regular nga mga miting sa sinugdanan sa 1867 ug gipahinungod niadtong Oktubre 1875.
4. Balay sa Pagtuga
Ang Balay sa Pagtuga gipahinungod pagka-Mayo 5, 1855, ni Heber C. Kimball alang sa mga pagtuga sa buhi. Si Brigham Young mihingalan niini nga Balay sa Ginoo ug miisip niini nga usa ka temporaryo nga templo. Sulod sa 34 ka tuig, samtang ang ubang templo gitukod pa, ang Balay sa Pagtuga miserbisyo og liboan ka mga Santos sa Ulahing mga Adlaw. Gipahunong kadto ug giguba niadtong 1889.
5. Balay sa Konseho
Ang Balay sa Konseho nagserbisyo isip punoang buhatan sa gobyerno sa Teritoryo sa Utah sa tibuok katuigan sa 1850 ug isip usa ka gambalay sa administrasyon alang sa Simbahan tali sa 1850 ug 1883. Kataposan kining gigamit niadtong 1888 sa wala pa giguba. Kapin sa 2,000 ka mga Santos sa Ulahing mga Adlaw ang midawat sa pagtuga diha sa taas nga bahin sa gambalay tali sa 1851 ug 1855.
6. Gambalay sa mga Balita sa Deseret
Ang Gambalay sa mga Balita sa Deseret unang gitukod niadtong 1870 sa dapit nga karon mao ang Joseph Smith Memorial Building ug didto ang newsroom, mga opisina, ug mga imprintahanan sa Deseret News, ang kinadaanan nga pamantalaan sa Utah. Ang unang sibya sa Simbahan gipadangat sa 1922 gikan sa usa ka tin shack ug transmiter sa radyo nga gitaod sa atop niining gambalay.
7. Balay Tipiganan sa mga Bishop ug Yarda sa Ikapulo
Ang Balay Tipiganan sa mga Bishop ug Yarda sa Ikapulo nagsilbi isip ang sentro nga kolektahanan alang sa ikapulo, diin ang mga Santos sa Ulahing mga Adlaw nianang panahona kadaghanan mihatag og mga donasyon nga abot sa mga uma. Daghan ang nadugang tali sa 1860 ug 1902, lakip ang mga puy-anan alang sa mga kabus nga imigrante. Human sa 1909, kini nga mga estraktura gihimong mga gambalay nga eskwelahan alang sa Unibersidad sa mga Santos sa Ulahing mga Adlaw.
8. Beehive House, Lion House, ug Administratibang mga Opisina
Ang Beehive House unang gitukod niadtong 1855 isip nag-unang pinuy-anan ni Brigham Young sa Siyudad sa Salt Lake ug nagsilbi usab isip panimalay sa Presidente sa Simbahan gikan sa 1898 hangtod 1918. Tali sa 1920 ug 1959, ang Mutual Improvement Association sa Young Women migamit niini isip usa ka dormitoryo sa batan-ong mga babaye, ug niadtong 1961 nahimo kini nga museyo. Ang Lion House gitukod niadtong 1856 isip usa ka panimalay alang sa mga asawa ni Brigham Young ug sa wala madugay gigamit alang sa administrasyon, edukasyon, ug mga kapuy-an nga dormitoryo. Ang Administratiba nga mga Opisina, o mga Opisina sa Presidente, gigamit sa mga lider ug mga empleyado sa Simbahan gikan sa 1853 hangtod 1917.
Sayo nga bahin hangtod sa Tunga-tunga sa ika-20 nga Siglo
9. Assembly Hall
Ang pagtukod sa Assembly Hall nagsugod niadtong 1877 isip tabernakulo sa Salt Lake Stake. Sa dihang nahuman niadtong 1882, nagsilbi kini nga dapit nga pundokanan alang sa Simbahan, sosyal, ug pang-edukasyon nga mga kalihokan.
10. Annex sa Templo
Ang Annex sa Templo gitukod niadtong 1893 aron mahatagan ang mga patron sa templo og mga lugar nga hulatanan. Sa mga 1960, ang nagkalainlaing habig niini gipulihan og bag-ong annex nga estraktura.
11. Bureau sa Impormasyon ug Museo sa Deseret
Ang Bureau sa Impormasyon unang gitukod niadtong 1904 aron magsilbing Temple Square nga bisitahan sa mga turista. Gipalapdan kini aron malakip ang Museo sa Deseret ug gipulihan sa South Visitors’ Center niadtong 1978.
12. Akademya sa Salt Lake
Orihinal nga gitukod isip ang Akademya sa Salt Lake niadtong 1886, ang Latter-day Saints College—sa kadugayan ang Latter-day Saints University—mibalhin sa lain-laing mga dapit hangtod gipahimutang sa eskwelahan sa Temple Square niadtong 1901. Sa dihang ang institusyon gibalhin niadtong mga 1930 ug giilisan og ngalan nga LDS Business College, ang Simbahan migamit sa mga lawak isip mga opisina. Kini nga mga gambalay giguba niadtong 1962 aron sa paghatag og lugar alang sa Gambalay sa Opisina sa Simbahan [Church Office Building].
13. Gambalay sa Bishop
Ang Gambalay sa Bishop misangkap og luna sa opisina alang sa Presiding Bishop, Kinatibuk-ang Kapangulohan sa Relief Society, ug ubang mga lider sa Simbahan gikan sa 1910 hangtod 1962.
14. Deseret Gymnasium
Ang Deseret Gymnasium nakasangkap og mga pasilidad sa kalingawan gikan sa 1910 hangtod sa 1962.
15. Hotel Utah
Ang Hotel Utah natukod diha sa Yarda sa Ikapulo niadtong 1911 ug nagsilbing nag-unang hotel sa Siyudad sa Salt Lake hangtod na sa mga 1980. Kadaghanan sa gambalay giusab niadtong 1993 ngadto sa administratibang mga buhatan sa Simbahan ug giilisan og ngalan nga Joseph Smith Memorial Building. Kadaghanan sa mga restaurant ug mga kan-anan gipadayon isip mga lugar sa komunidad.
16. Administratibang Gambalay sa Simbahan
Ang Administratibang Gambalay sa Simbahan gitukod niadtong 1917 ug nahimutang ang mga opisina sa Presidente sa Simbahan ug sa ubang senior nga mga lider. Gitukod kini sa samang granite sama sa Templo sa Salt Lake ug sa mga gambalay sa Conference Center.
17. Panimalay sa Misyonaryo
Ang Panimalay sa Misyonaryo mopasigo og hangtod sa usa ka gatos ka misyonaryo alang sa usa ka semana nga oryentasyon ug programa sa pagbansay. Gisirad-an kini sa mga1960 samtang ang pagbansay sa pinulongan alang sa mga misyonaryo nagkadaghan sa gisponsoran nga mga unibersidad sa Simbahan.
Sayo nga bahin sa ika-21 nga Siglo
15. Joseph Smith Memorial Building
Gibag-o sa Simbahan ang Hotel sa Utah ngadto sa Joseph Smith Memorial Building, usa ka gambalay sa opisina nga adunay mga pasilidad alang sa mga bisita ug mga turista, lakip ang mga resepsiyon hall, mga serbisyo sa pagpangaon, ug usa ka sinehan.
18. Gambalay sa Relief Society
Ang Gambalay sa Relief Society gitukod niadtong 1956 aron sa paghatag og mga opisina alang sa mga organisasyon sa auxiliary, ug sa mga tuig 1970 gisuportahan niini ang usa ka resource center alang sa mga babaye sa tibuok kalibotan. Ang Kinatibuk-ang mga Kapangulohan sa Relief Society, Young Women, ug sa Primary nagpadayon sa paggamit sa gambalay hangtod sa ika-21 nga siglo.
19. Gambalay sa Opisina sa Simbahan
Ang 28 ka andana nga Gambalay sa Opisina sa Simbahan gitukod niadtong 1972 ug gipahinungod niadtong 1975 alang sa pagsuporta sa nagkadaghang mga departamento ug kawani sa Simbahan.
20. Conference Center
Human pagpahinungod niini niadtong 2000, ang Conference Center mipuli sa Salt Lake Tabernacle isip nag-unang dapit alang sa kinatibuk-ang komperensiya. Sa makadiyot, gisuportahan niini ang kinadak-ang awditoryum sa kalibotan nga ang sulod porma og paypay, adunay kalingkoran nga kapin sa 21,000 ka tawo.
21. Museo sa Kasaysayan sa Simbahan
Orihinal nga gitukod isip Museo sa Kasaysayan sa Simbahan ug sa Art niadtong 1984, ang Museo sa Kasaysayan sa Simbahan mao ang gibalayan ug nagpakita sa talagsaon ug orihinal nga mga ginama [artifact] ug mga buhat sa arte sa mga Santos sa Ulahing mga Adlaw.
22. Librarya sa Family History
Gitukod niadtong 1985, ang Librarya sa Family History naghatag og mga serbisyo sa panukiduki sa genealogical ug mga rekord alang sa kinatibuk-ang publiko.
May Kalabotan nga mga Hisgotanan: Salt Lake Valley, Salt Lake Temple, Endowment House, Public Relations, Broadcast Media