Pangpubliko nga mga Relasyon

Ang Simbahan naorganisar atol sa usa ka panahon sa dihang paspas nga nag-usbong ang pagrinta nga peryodismo didto sa Estados Unidos, ug ang mga panglantaw sa mga Santos sa Ulahing mga Adlaw naimpluwensyahan sa kanunayng pagpangontra sa press.¹ Si Joseph Smith ug ang ubang nahaunang mga lider sa Simbahan miorganisar sa panginahanglan sa pagpahayag og tukma nga impormasyon kabahin sa Simbahan ngadto sa publiko, ug sila kasagaran migamit sa pamantalaan sa pagbuhat sa ingon. Ang unang dakong kasaysayan sa Simbahan, nga gisulat ubos sa direksyon ni Joseph ug unang gimantala sa serye sa mga pamantalaan sa Simbahan, gihimo sa piho nga paagi “aron sa pagkorihir sa sayop nga ideya sa publiko” sa pangangkon nga gihimo kalabot sa Simbahan ug sa paghatod og tukma nga presentasyon sa kasinatian sa Santos sa Ulahing mga Adlaw.²

Human ang mga miyembro sa Simbahan gipugos sa pagpahawa gikan sa Missouri, ang Propeta nagsulat gikan sa Bilanggoan sa Liberty nga nag-awhag sa mga Santos sa pagtuman sa usa ka “gikinahanglan nga katungdanan” sa pagpahibalo sa publiko pinaagi sa pagkolekta ug pagmantala og mga asoy sa tanan nga ilang giantos.³ Bisan human napakyas ang ilang mga petisyon alang sa ayuda sa gobyerno, ang mga Santos mipadayon sa pagmantala sa ilang mga kasinatian sa Missouri pinaagi sa mga asoy, mga artikulo, mga pakigpulong, ug mga pampleta. Sa tibuok ika-19 nga siglo, samtang ang mga Santos milalin ngadto sa Kasadpang Amerika, mipetisyon nga himoon ang ilang teritoryo nga usa ka estado sa Estados Unidos, ug misagubang sa pagkaylap sa oposisyon sa dinaghan nga kaminyoon, ang mga lider sa Simbahan nagtinguha sa pagpalambo sa reputasyon sa Simbahan pinaagi sa misyonaryo nga buhat, giimprinta nga mga buhat, pulong sa baba, ug matag karon ug unya nga mga pakigmiting sa impluwensyal nga mga tawo.

Sa pagsugod sa ika-20 nga siglo, ang mga kompanya sa industriya ug uban pang dagkong mga establisemento nagsugod sa paghimo sa bag-o, mas organisado nga mga pamaagi sa pagpahibalo sa publiko. Ang tanang matang sa mga organisasyon migamit ug propesyonal nga mga tigtuboy aron sa pagpalambo sa mga programa sa relasyon sa publiko, mga panghitabo, ug mga kampanya. Ang mga unibersidad, mga tindahan, ug mga simbahan, tanan mitukod og mga bureau sa impormasyon alang sa publiko, mga sentro sa mga bisita, ug mga eksibit.⁴ Sa Siyudad sa Salt Lake, ang Simbahan miabli og Bureau sa Impormasyon diha sa Temple Square niadtong 1902 aron sa pag-apod-apod og literatura ug pagtubag sa mga pangutana sa mga bisita.⁵

Isip usa ka misyonaryo sa Great Britain niadtong mga 1930, si Gordon B. Hinckley nakighigala sa pipila ka mga tigbalita, mitabang sa pagpakunhod sa kasuko batok sa Simbahan ug nagpakita og talento alang sa pangpubliko nga mga relasyon. Wala madugay human sa iyang pagbalik sa Utah, ang mga lider sa Simbahan midapit kaniya sa pag-apil sa bag-ong Radyo, Publisidad, ug Mission Literature Committee ug pagtabang sa paghimo og mga produkto sa media aron magamit sa mga misyon. Niadtong 1935 nagsugod siya sa pagpalista og mga espesyalista sa media aron sa pagpalambo og mga interaksyon nga pabor tali sa Simbahan ug sa kinatibuk-ang publiko.⁶

Ang mga lider sa Simbahan nakigtambayayong uban sa mga konsultant sa pangpubliko nga mga relasyon sugod niadtong mga 1950 aron sa pagdani og positibong balita sa mga panghitabo sama sa Hill Cumorah Pageant ug bag-ong giluwat nga mga rekord sa Tabernacle Choir. Niadtong 1957, ang Simbahan nagsuhol og mga propesyonal nga pangpubliko nga mga relasyon ug nagtukod sa Church Information Service, o CIS. Ang tumong niini nga grupo mao ang pag-apud-apod og tukma nga impormasyon mahitungod sa mga kalihokan sa Simbahan nga makapainteres sa kinatibuk-ang publiko.

Sa misunod nga mga dekada ang CIS, nga nahimong Public Affairs Department niadtong 1991, midumala sa daghang malampuson nga mga paningkamot, lakip ang Mormon Pavilion sa World’s Fairs sugod niadtong 1964, usa ka serye sa mga mensahe sa radyo ug telebisyon mahitungod sa pamilya nga giulohan og Homefront niadtong mga 1970, ug mga inisyatibong publisidad sama sa kampanya nga “I’m a Mormon” niadtong mga 2010. Sa mga 1990, ang departamento nakig-angay sa boluntaryong pagserbisyo sa 3,500 ka mga direktor sa kalihokan sa publiko sa mga stake ug mga misyon sa tibuok kalibotan aron sa paghatag og impormasyon sa press sa lokal nga mga kalihokan. Samtang nagkadako ang Simbahan sa tibuok kalibotan ug ang teknolohiya sa multimedia midaghan sa ika-21 nga siglo, daghang tahas sa public affairs, sama sa relasyon sa komunidad ug lain-laing tinuohan, media ug pagmensahe, ug sa pagdumala sa reputasyon, gipailalom sa bag-ong naporma nga Departamento sa Komunikasyon sa Simbahan. Karon, ang mga propesyonal sa public affairs nagpadayon sa pagpalambo sa mga pahibalo nga serbisyo publiko, mga pamahayag sa posisyon, ug uban pang mga online nga pagmensahe alang sa Simbahan.

May Kalabotan nga mga Hisgotanan: Columbian Exposition of 1893, Broadcast Media, Church Headquarters, Tabernacle Choir