Pagpabunyag Pag-usab
Lakip sa Iyang kataposang mga pagtulun-an nga narekord sa Bag-ong Tugon, ang nabanhaw nga si Jesukristo mimando sa mga disipulo nga “himoa nga akong mga tinun-an ang tanang katawhan sa tibuok kalibotan, bunyagi sila sa ngalan sa Amahan, sa Anak ug sa Espiritu Santo.” Sulod sa mga siglo, ang mapahinungoron nga mga sumusunod misabot niini nga mando isip ang “Dakong Mando,” ug mikonsiderar niini nga usa ka panawagan sa pagsangyaw sa ebanghelyo ug sa pag-abiabi sa mga tumutuo sa komunidad sa pagtuo pinaagi sa pagpahigayon og bunyag. Human sa Protestante nga Repormasyon sa Uropa niadtong mga 1500, pipila ka simbahan ang nagtuo nga ang tanang Kristiyano nga bunyag balido, bisan unsa pay edad sa tawo nga gibunyagan o Kristiyano nga sekta.
Wala madugay human sa miting sa pag-organisar sa Simbahan niadtong 1830, ang pangutana mitumaw kon kadtong nabunyagan sa wala pa magpasakop sa Simbahan makompirmahan ba nga miyembro nga dili bunyagan pag-usab. Si Joseph Smith nakadawat og pagpadayag nga naghulagway kon sa unsang paagi nga ang “bag-o ug walay kataposan nga pakigsaad” nga gipuli sa “tanang karaan nga pakigsaad” gipatuman atol sa pag-organisar sa Simbahan. Sukad nianang higayona, ang tanang miyembro sa Simbahan nakadawat og bunyag bisan unsa pa ang relihiyon nga ilang giapilan kaniadto o nahaunang mga bunyag sa laing mga simbahan.
Sa tibuok mga 1830, ang mga miyembro sa Simbahan nga gitangtang sa Simbahan o wala na giapil sa pakigdait gibunyagan og usab sa dihang mipasakop sila og balik sa Simbahan. Sa daghang sitwasyon, ang mahinulsolon nga mga Santos sa Ulahing mga Adlaw nagtinguha nga mabunyagan pag-usab bisan kon wala sila makasinati og bisan unsang pormal nga kausaban sa ilang kahimtang isip miyembro sa Simbahan. Sa mga 1840, si Joseph Smith mitudlo nga ang mga miyembro sa Simbahan nga maayo og reputasyon mahimo usab nga bunyagan aron mamaayo. Niining higayona, ang mga Santos sa Ulahing mga Adlaw nagpahigayon og pipila ka lainlaing seremonya sa pagpang-ayo; ang uban nakamatikod nga adunay pagkasusama ang pagpabunyag pag-usab alang sa kahimsog ug ang biblikanhong mga asoy bahin ni Naaman nga naayo sa Suba sa Jordan ug ang mga naligo nga nagtinguha nga mamaayo didto sa linaw sa Betsata. Sa Nauvoo, Illinois, daghan usab sa Unang Kapangulohan ug sa Korum sa Napulog Duha ka Apostoles ang gibunyagan pag-usab alang sa kapasayloan sa mga sala o aron mamaayo. Kini nga tulumanon sa mga Santos sa Ulahing mga Adlaw sa pagpabunyag pag- usab talagsaon taliwala sa Kristiyano nga mga simbahan.
Human nga ang kadaghanan sa mga Santos sa Ulahing mga Adlaw mibiya sa Nauvoo, kini nga mga pamaagi sa pagpabunyag pag-usab nagpadayon diha sa Simbahan. Dugang pa, sa pag-abot sa Salt Lake Valley, si Brigham Young mipailaila sa pagbunyag alang sa “pagbag-o sa [ilang] pakigsaad sa atubangan sa Ginoo.” Nianang higayona, ang mga lider ug mga miyembro sa Simbahan sa kasagaran naghimo og sagrado nga mga panumpa, nga ilang gitawag og mga pakigsaad, ngadto sa usag usa sa daghang lainlaing konteksto, ang uban nila diha sa templo ug ang uban isip kabahin sa ilang mga kauban sa pagbiyahe. Si Brigham Young mitudlo nga kadtong milangyaw ngadto sa Great Basin nagkinahanglan nga mobag-o niini nga mga panumpa ingon man usab sa ilang mga pakigsaad sa templo pinaagi sa pagpabunyag pag-usab. Atol sa mga higayon sa paghinulsol ug kausaban taliwala sa mga Santos, siya mitudlo usab nga ang pagpabunyag pag-usab nagpasabot og igong pagpangandam daan sa pagpasakop sa Nagkahiusa nga Kapunongan, nga matugahan o maselyo, o makatambong sa templo. Kadaghanan sa mga Santos sa Ulahing mga Adlaw nga nagpuyo sa ika-19 nga siglo sa Utah gibunyagan pag-usab alang sa pagbag-o sa ilang mga pakigsaad sa pipila ka higayon sa tibuok nilang kinabuhi.
Sa mga 1890, ang mga lider sa Simbahan miebalwar pag-usab sa tulumanon sa pagpabunyag pag-usab. Nakahukom sila nga nahimo kining ordinaryo na lang kaayo ug wala na kini kinahanglana sa paglangyaw ngadto sa Utah o sa pagtambong sa templo. Dugang pa, ilang gihatagan og gibug-aton ang sakramento isip nag-unang pamaagi sa pagbag-o sa mga pakigsaad sa usa ka tawo. Ang mga tulumanon sa pagpabunyag pag-usab alang sa pagbag-o sa mga pakigsaad ug alang sa kahimsog sa panglawas giwagtang na sa panahon sa pagdumala ni Presidente Heber J. Grant niadtong mga 1920.
May Kalabotan nga mga Hisgotanan: Bunyag alang sa mga Patay, Pagpang-ayo, Pagselyo [Sealing], Mga Miting sa Sakramento