“Pioneer nga Kababayen-an ug Panambal,” Mga Hisgutanan sa Kasaysayan sa Simbahan
“Pioneer nga Kababayen-an ug Panambal”
Pioneer nga Kababayen-an ug Panambal
Ang kababayen-an sa ika-18 ug ika-19 nga siglo kasagaran nagtambayayong aron sa paghatag og medikal nga pag-atiman. Gitambalan nila ang yano nga mga balatian, mga sakit, ug mga samad, moabag sa pagpanganak, ug nakigbahin sa mga hinimo sa panimalay nga mga tambal, lakip na ang mga haplas, mga syrup, mga tsa, mga ointment, mga panghaklap, ug mga panghunad sa samad.1 Sa panahon nga wala pa makaangkon og kalampusan ang modernong medisina, daghang tawo ang wala mosalig sa mga doktor ug nagsalig lang sa tambal gikan sa mga tanom ug sa hugot nga pagtuo.2 Ang nag-una nga mga Santos sa Ulahing mga Adlaw, sama sa ilang katalirongan [contemporaries] nga mga Amerikano, nakapalambo og dili pormal nga koneksyon mahitungod sa kahimsug sa sulod sa ilang mga komunidad, nagsalig sa usag usa alang sa medikal nga pag-atiman ug sa mga pagpanalangin ug mga pag-ampo.
Sa Nauvoo, ang mga lider sa Simbahan mihatag og bili sa praktikal nga kaalam, kamanggiloloy-on, ug sa hugot nga pagtuo sa mga mananabang sama nila ni Patty Sessions ug Zina Huntington. Kini nga kababayen-an gi-set apart isip mga mananambal nga mohatag og pag-atiman, modapat og tambal, motudlo sa ubang mga mananabang, ug mohimo og mga panalangin sa pagpanambal.3 Niadtong Hulyo 1851 ang mga kababayen-an sa Utah miorganisar sa Female Council of Health. Gipaluyohan sa konseho ang mananabang nga si Phoebe Angel, inahan sa asawa ni Brigham Young nga si Mary Ann Angell, isip ilang unang presidente, uban sa laing duha ka mananabang isip iyang mga magtatambag. Kini nga konseho mitudlo og usa ka babaye sa kasagaran sa 19 ka ward sa siyudad “aron mobantay sa mga kabus.”4
Sa mga 1870, human nga milambo ang pagpanambal nga nagsunod sa Gubat Sibil ug human nga ang riles mas mipaduol og konektar sa Utah ngadto sa uban nga mga dapit sa nasud, ang mga lider sa Simbahan nagsugod sa pagkonsiderar og mga pamaagi nga ang mga Santos makadawat og propesyunal nga edukasyon sa silangang Estados Unidos. Niining higayona, si Presidente Brigham Young nakapalambo na og mas dakong pagsalig sa siyentipikong panambal ug naglaum sa pagdungan niini sa pagpanambal pinaagi sa hugot nga pagtuo.5 Gisalig niya kang Eliza R Snow ug sa Relief Society ang pagpahigayon sa pormal nga pagbansay sa kababayen-an isip mga doktor sa panahon diin pipila lang ka mga Amerikana ang nakapahimulos sa ingon nga mga oportunidad sa edukasyon.6 Niadtong 1873 si Snow nangutana sa kababayen-ang Relief Society sa Ogden, Utah, alang sa mga boluntaryo: “Dinhi karon, duna bay mga sister, kinsa dunay igong ambisyon, ug kinsa nakaamgo sa panginahanglan niini, tungod og alang sa Zion, sa pag-angkon niini nga pagtuon[?]”7
Deseret Hospital sa Siyudad sa Salt Lake, mga tuig 1857–1900.
Ang kababayen-an mitubag sa tawag nga magtuon sa pagpanambal. Niadtong 1877 si Romania Pratt nahimong unang babaye nga Santos sa Ulahing mga Adlaw nga migradwar gikan sa eskwelahan sa pagpanambal sa panahon diin ang teyorya sa kagaw nakatabang nga ang mga tigbansay sa pagpanambal mahimong epektibo sa pagpugong ug pagbatok sa mga sakit.8 Dugang nga kababayen-an ang misunod sa ehemplo ni Romania, mibalik sa panimalay human sa ilang pag-eskwela aron motudlo dayon og mga klase sa pagpanabang ug pag-atiman sa pamilya. Ang kababayen-an sama ni Emma Liljenquist sa Hyrum, Utah, pormal nga gi-set apart isip mga mananabang, nga ang ilang mga bayranan sa pagbansay gibayaran sa ilang lokal nga mga Relief Society.9 Niadtong 1882 ang Relief Society mitukod sa Deseret Hospital sa Siyudad sa Salt Lake, diin ang mga pasyente makadawat og pag-atiman gikan sa nabansay nga mga doktor ingon man sa makapaayo nga mga panalangin.10 Samtang nagpadayon sa paglambo ang medikal nga siyensya, ang mga Santos sa Utah, sama sa ilang katalirongan [contemporaries] nga mga Amerikano, nagkadaghan sa pagpangita og propesyunal nga medikal nga pag-atiman.
May Kalabutan nga mga Hisgutanan: Healing, Relief Society, Church Academies