“Dinihugan nga Korum (‘Balaan nga Kapunongan sa Dios’),” Mga Hisgutanan sa Kasaysayan sa Simbahan
“Dinihugan nga Korum”
Dinihugan nga Korum (“Balaan nga Kapunongan sa Dios”)
Niadtong Mayo 4, 1842, gipaila-ila ni Joseph Smith ang endowment sa templo ngadto sa usa ka grupo sa siyam ka mga kaubanan sa taas nga kwarto sa iyang tindahan sa Nauvoo. Paglabay sa sunod nga duha ka tuig, si Joseph mipahigayon niining ordinansa ngadto sa 50 kapin ka kalalakin-an ug kababayen-an. Kini nga grupo nakadawat og usa ka seremonya sa paghugas ug pagdihog isip kabahin sa endowment, ug sa kaulahian gitawag og “dinihugan nga Korum,” “ang Korum,” ang “konseho,” o ang “Balaan nga Kapunongan sa Dios.”1
Gitukod pag-usab nga tindahan didto sa Nauvoo diin unang gipaila ni Joseph Smith ang endowment sa templo ngadto sa mga miyembro sa Dinihugan nga Korum.
Usa ka pagpadayag niadtong 1841 ngadto kang Joseph Smith nagtudlo nga ang endowment kinahanglan mahatag ngadto sa mga miyembro sa Simbahan diha sa nakompleto nga Templo sa Nauvoo.2 Apan sumala pa ni Orson Hyde, si Joseph mipasabut, “Wala ko masayud kon ngano, apan ang Ginoo nagsugo kanako sa pagpadali ug ihatag kaninyo ang inyong endowment sa dili pa mahuman ang templo.”3 Mipili siya og mga kalalakin-an ug kababayen-an kinsa iyang gisaligan nga motahud sa sagradong mga ordinansa sa templo inubanan sa balaang pagtahud ug pagkakompidensyal. Si Heber C. Kimball, usa sa orihinal nga sakop sa Dinihugan nga Korum, mipasabut nga si Joseph “miorganisar og gamay nga grupo” nga “siya makapadayag sa kinahiladman sa iyang pagbati ug mobati mismo nga luwas.”4
Bisan og sa sinugdanan si Joseph midapit lang og pipila ka tawo sa pag-apil sa endowment, iyang giklaro ang iyang tumong sa pag-abli sa mga seremonya sa templo ngadto sa kadaghanan sa takus nga mga Santos sa Ulahing mga Adlaw. Ang paghulagway sa pasiuna sa endowment diha sa opisyal nga kasaysayan sa Simbahan niadtong 1845, si Willard Richards mipasabut, “Walay laing gipahibalo niining mga tawhana, kon dili unsa ang ipahibalo ngadto sa tanan nga mga Santos sa ulahing mga adlaw, sa labing madali kon sila andam na sa pagdawat niini, ug usa ka tukma nga dapit ang giandam aron paghatag niini.”5 Si Joseph Smith miawhag nga tapuson ang Templo sa Nauvoo aron ang tanan nga mga Santos makaangkon og usa ka dapit aron sa pagdawat sa ilang mga endowment. Si George Q. Cannon, tin-edyer pa lang sa dihang mibalhin ngadto sa Nauvoo niadtong 1843, sa kaulahian mihinumdom, “Dihang gipahibalo [ni Joseph] ang mga endowment ngadto sa pipila ka mga tawo sa wala pa makompleto ang Templo, ang tanang mga tawo nadasig inubanan sa tinguha nga humanon ang Templo, aron nga sila mahimo nang makadawat niining talagsaong mga panalangin.”6
Ang mga sakop sa Dinihugan nga Korum naghimo og pipila ka panagtigum taliwala sa Mayo 1842 ug sa Septyembre 1843 ug dayon mas nahimong regular hangtud sa Disyembre 1845, kasagaran diha sa taas sa tindahan ni Joseph o sa mga balay sa mga miyembro. Sa ilang mga miting, ilang gipaila ang mga seremonya ngadto sa bag-ong mga sakop sa korum, gi-seal ang mga kaminyoon alang sa kahangturan, nakigtambag ug nakadawat og mga instruksyon gikan ni Joseph Smith, ug dungan nga nag-ampo isip usa ka grupo. Mao nga, kining mga panagtigum kanunayng gitawag og “mga miting sa pag-ampo” o “mga miting sa konseho.” Kon magkapundok sila, ang kalalakin-an ug kababayen-an sa korum makaangkon og kasinatian sa pagpangalagad sa endowment ngadto sa uban.
Human sa pagpatay ni Joseph Smith, ang importanting bahin diha sa pag-apil sa Dinihugan nga Korum mao ang pagadebatihan kon kinsa ang mosunod nga Propeta. Usa ka gamhanang aspeto sa argumento nga himoon sa Korum sa Napulog Duha sa mga semana human sa kamatayon ni Joseph mao nga sila, dili sama sa pagpangangkon ni Sidney Rigdon, nakadawat sa tanang mga ordinansa sa templo ug gihatagan og katungod ni Joseph Smith sa paghatag niini ngadto sa uban.7
Taliwala sa Agosto 1844 ug Disyembre 1845, si Brigham Young, isip Presidente sa Napulog Duha, nangulo sa Dinihugan nga Korum, nagdapit og dugang mga kalalakin-an ug kababayen-an sa pag-apil. Sa ulahing bahin sa 1845, ang mga sakop sa Korum miandam sa lawting [attic] nga andana sa Templo sa Nauvoo alang sa pagpahigayon sa endowment, ug sa tunga-tungang bahin sa Disyembre, si Brigham Young ug ang uban nagsugod sa pagdapit og dagkong mga grupo sa mga Santos sa pagdawat sa ilang endowment.
Ang kalalakin-an ug kababayen-an sa Dinihugan nga Korum mao ang unang mga temple worker, nangalagad sa kapin 5,000 ka mga Santos sa mga ordinansa nga ilang nadawat gikan ni Joseph Smith, Brigham Young, ug sa ilang isig ka sakop sa korum. Nakigtigum usab sila sa bag-ong na-endow nga mga Santos sulod sa templo aron sa pagpasa sa mga pagtulun-an sa templo nga ilang nadawat gikan ni Joseph Smith. Ang ilang buhat diha sa templo mipadayon hangtud sa Pebrero 1846, sa dihang ang unang mga grupo sa mga Santos gipwersa sa pagbiya sa Nauvoo aron mobyahe sa kasadpan. Tungod sa kadaghan sa mga miyembro nga na-endow, ang Dinihugan nga Korum epektibong nahunong na.
May Kalabutan nga mga Hisgutanan: Endowment of Power, Temple Endowment, Nauvoo Temple