Kasaysayan sa Simbahan
Si Sidney Rigdon


“Sidney Rigdon,” Mga Hisgutanan sa Kasaysayan sa Simbahan

“Sidney Rigdon”

Si Sidney Rigdon

Niadtong Oktubre 29, 1830, duha ka bisita ang miabut sa panimalay nila ni Sidney ug Phebe Rigdon. Si Sidney Rigdon usa ka Kristiyano nga ministro, ug usa sa mga bisita, si Parley P. Pratt, usa ka kanhi sakop sa iyang kongregasyon kinsa mibalik aron sa pagpaambit sa Basahon ni Mormon ug sa balita sa Pagpahiuli ngadto sa iyang tigtudlo. Ang laing tawo mao si Oliver Cowdery, kinsa nakaserbisyo isip tigsulat sa kadaghanan sa paghubad sa basahon. Bisan tuod ang mga Rigdon nagpuyo sa usa ka panimalay nga hinatag sa ilang kongregasyon ug mawad-an niana nga panimalay kon magpakabig sila sa usa ka bag-ong tinuohan, mainampoon nilang gikonsiderar ang mensahe sa mga misyonaryo ug nabunyagan niadtong Nobyembre 8. Sa misunod nga 14 ka tuig, si Sidney Rigdon adunay dakong impluwensya sa Simbahan.

Imahe
Hulagway ni Sidney Rigdon

Hulagway ni Sidney Rigdon.

Nahauna nga Pagpangalagad

Sa wala pa moabut si Pratt ug Cowdery sa iyang pultahan isip mga misyonaryo, si Sidney Rigdon nangandoy na sa pagpahiuli sa Kristiyanismo sa Bag-ong Tugon. Natawo siya sa 1793 sa gawas lang sa Pittsburgh, Pennsylvania, ug nagbansay nga mahimong magtitina sa panit [tanner], apan ang iyang tinguha nga makat-on ug mosangyaw sa pulong sa Dios midala kaniya ngadto sa Kristiyano nga pagpangalagad. Sa dihang naminyo siya kang Phebe Brooks niadtong 1820, gisugdan na niya ang iyang panarbaho sa pagsangyaw taliwala sa mga United Baptist. Nakaplagan niya ang iyang kaugalingon wala madugay sulod sa nagkadako nga impluwensya sa Reformed Baptist nga kalihokan ni Alexander Campbell, nga nagtinguha sa pagbalik ngadto sa mga sumbanan sa Kristiyanismo sa Bag-ong Tugon.

Gipalambo ni Sidney Rigdon ang iyang kahanas sa pagpamulong sa publiko isip ministro sa First Baptist Church sa Pittsburgh. Ang interes ni Rigdon sa pagreporma miresulta sa katapusan sa panagbangi sa mas konserbatibo nga kapangulohan sa Baptist sa Pittsburgh, ug mibalhin siya uban sa nagkadako niyang pamilya ngadto sa amihanang-silangang Ohio, diin nahimo siya nga usa ka impluwensyal nga tigsangyaw sa pipila ka mga distrito.1 Wala madugay gipili siya nga mangulo sa usa ka kongregasyon sa usa ka lungsod nga gitawag og Mentor. Gihatagan ni Rigdon og gibug-aton ang binuhatan sa nahaunang Kristiyano, ug ang ubang mga miyembro sa iyang kongregasyon misugod pa gani sa kaugalingon nilang pagsulay nga magpuyo nga “gipanag-usahan sa pag-ambit ang tanang mga butang,” sama sa gihulagway diha sa basahon sa Mga Buhat.2

Pagserbisyo sa Simbahan

Sa dihang si Pratt, Cowdery, ug ang ubang mga misyonaryo mihapit sa Ohio sa ilang pagpadulong aron mosangyaw sa mga American Indian nga nagpuyo sa kasadpan sa Missouri, daghang mga sakop sa kongregasyon ni Sidney Rigdon ang midawat sa ilang mensahe.3 Human sa iyang kaugalingong pagkakabig, mibiyahe si Rigdon ngadto sa estado sa New York uban sa iyang kanhi sakop sa kongregasyon nga si Edward Partridge aron makighimamat kang Joseph Smith.4

Ang malukpanong kahibalo ni Rigdon sa biblia ug kusganong pagsangyaw nakatabang sa pagpadako sa linghud pa nga Simbahan. Miserbisyo usab si Rigdon isip tigsulat sa dinasig nga pag-usab ni Joseph Smith sa Biblia ug maoy gihisgutan sa pipila sa nahauna nga mga pinadayag. Sa dihang ang Unang Kapangulohan sa Simbahan unang giorganisar, gitawag si Rigdon isip magtatambag ni Joseph. Pagka-Pebrero 1832, si Sidney ug Joseph parehong nakasinati og importanting panan-awon sa tulo ka ang-ang sa himaya, diin ang ilang pagsaysay naglakip og usa ka gamhanang hiniusa nga pagpamatuod mahitungod ni Jesukristo.5 Pagkasunod bulan, usa ka panon sa mga manggugubot miguyod ni Sidney ug Joseph gikan sa ilang mga panimalay ug dayon bangis nga miatake ug mipapilit og alkitran ug balahibo kanila.

Si Sidney Rigdon nangulo sa mga Santos sa Kirtland samtang daghang mga lider sa Simbahan ang miapil sa panaw sa Zion’s Camp, mitabang sa pagsulat sa Mga Panudlo sa Pagtuo [Lectures on Faith] nga gihatag diha sa Tulunghaan sa mga Propeta, namulong sa pagpahinungod sa Templo sa Kirtland, ug usa ka mahinungdanong tawo sa pag-organisar sa Kirtland Safety Society.6 Niadtong 1838, mibalhin siya ngadto sa Missouri uban ni Joseph Smith. Sa usa ka pakigpulong atol sa Fourth of July, mipahibalo siya nga ang mga Santos mosukol batok sa bisan unsang panon sa mga manggugubot nga modaug-daug kanila, mipasamot sa tensyon tali sa mga miyembro sa Simbahan ug sa ilang mga silingan. Gibilanggo siya wala madugay uban ni Joseph sa Liberty, Missouri.

Kagubot ug Kausaban

Human ang mga Santos nanimuyo sa Nauvoo, ang relasyon ni Sidney Rigdon ngadto ni Joseph Smith usahay dili maayo. Giakusahan ni Joseph si Rigdon sa pagbaliwala sa iyang mga katungdanan isip magtatambag ni Joseph, pagtabang sa mga kaaway sa Simbahan, ug “pag-ilad sa mga inosente.” Pagka-Agosto 1843, si Joseph miakusar ni Rigdon diha sa publiko ug mihangyo sa kongregasyon sa pagsuporta kaniya nga dili na pakigdaitan ang iyang magtatambag. Sa misunod nga komperensya sa Simbahan pagka-Oktubre, si Joseph nagpanagana nga miuyon nga ipabilin si Rigdon isip iyang magtatambag kon siya “mopalambo sa iyang katungdanan, ug molakaw ug mopahigayon sa iyang kaugalingon sa tanang pagkamatinuoron, pagkamatarung, ug integridad.”7

Bisan pa niini nga mga kasungian, si Rigdon gipili nga modagan isip kandidato sa pagka-bise presidente ni Joseph Smith sa 1844 nga presidensyal nga eleksyon sa Estados Unidos. Hinoon, ang kampanya nahunong pagka-Hunyo 1844 sa dihang ang mga manggugubot mipatay ni Joseph. Si Rigdon nagdali nga mibalik sa Nauvoo gikan sa Pittsburgh, diin siya nagpuyo, ug miangkon sa katungod nga molihok isip “magbalantay” sa Simbahan tungod sa pagkawala ni Joseph.8 Agig tubag, mideklarar si Brigham Young nga gihatagan ni Joseph ang Korum sa Napulog Duha ka mga Apostoles sa tanang mga yawe ug mga ordinansa nga gikinahanglan aron sa paggiya sa Simbahan sa pagpadayon. Ang kadaghanan sa mga Santos sa Nauvoo mibotar nga paluyohan ang pagpangulo sa Napulog Duha.

Bisan og ang mga sakop sa Napulog Duha misulay sa pakig-istorya kang Rigdon, nagdumili siya sa pagdawat sa ilang pagpangulo, gipahimulag gikan sa Simbahan niadtong Septyembre 1844, ug dayon mibalik sa Pittsburgh. Didto mitukod siya og independente nga organisasyon sa simbahan. Ang iyang Simbahan ni Kristo milungtad lamang hangtud sa 1847, dihang ang panagbangi sa sulod ug ang pakyas nga pagpanagna sa Ikaduhang Pag-anhi ni Kristo nakahugno sa organisasyon. Uban ni Stephen Post, si Rigdon sa kaulahian miorganisar og laing kalihokan nga gitawag og ang Simbahan ni Jesukristo sa mga Anak sa Zion, nga iyang gipangulohan hangtud sa iyang kamatayon niadtong 1876.9