“Repormasyon sa 1856–57,” Mga Hisgutanan sa Kasaysayan sa Simbahan
“Repormasyon sa 1856–57”
Repormasyon sa 1856–57
Sulod sa gibana-bana nga pito ka bulan gikan Septyembre 1856 hangtud Abril 1857, si Brigham Young ug ubang mga lider sa Simbahan misangyaw sa tibuok Teritoryo sa Utah aron sa pag-ugmad og mas dakong relihiyusong pasalig taliwala sa mga Santos sa Ulahing mga Adlaw. Kining panahon sa debosyonal nga kalihokan, nga nailhan isip “ang Mormon nga Repormasyon,” nagrepresentar og punto sa dakong kausaban alang sa daghan kinsa mireport nga nakasinati og espirituhanong pagbag-o ug napausbaw nga kasibot sulod sa ilang mga komunidad.1
Sa ilang mga paningkamot sa pagtukod sa gingharian sa Dios ug pagpangandam alang sa Ikaduhang Pag-anhi ni Jesukristo, ang mga Santos sa Ulahing mga Adlaw kanunay nga mopahayag og kasagmuyo sa namatikdan nga mga pagkulang sa pagsunod sa gipahiuli nga ebanghelyo. Samtang nag-ugmad sila og mga komunidad sa dili pamilyar nga kayutaan sa Teritoryo sa Utah, nakasinati sila sa sayong bahin og daghang kapakyasan ug natural nga mga kalamidad, ilabi na sa mga kapakyasan sa pananom, mga sunog sa kayutaan, mga hampak sa dulon, ug kagutom sa tingtugnaw. Gikonsiderar ni Brigham Young kini nga mga hagit isip balaanon nga mga silot, ug sa Oktubre 1855 nga kinatibuk-ang komperensya giawhag niya ang mga Santos sa paghinulsol “aron [sila] dili na pagapantunon.”2 Sa misunod nga tingpamulak, miawhag siya og mga wali nga mopalanog og “mga pagdahunog sa dalugdog” ug modasig og tingub nga paghinulsol. Niadtong Septyembre 1856 mipahibalo si Brigham sa pipila ka mga Apostoles sa mga plano sa “paghimo og dakong kausaban” sa tibuok teritoryo.3 Sulod sa pipila lang ka adlaw, si Jedediah M. Grant, magtatambag sa Unang Kapangulohan, misugod sa paningkamot sa usa ka komperensya sa amihanan sa Siyudad sa Salt Lake. Pagkahuman dayon sa pagsangyaw ni Grant, 500 ka mga Santos gibunyagan pag-usab aron sa pagpakita sa ilang nabag-o nga debosyon.4
Ang susama nga mga wali gihatag sa tibuok nga mga pamuy-anan. Sa ubang mga dapit, ang “mga misyonaryo sa panimalay” mibisita og mga panimalay sa matag ward dala ang usa ka lista sa mga pangutana nga gituyo aron makaaghat og pagpamalandong ug pagkamasulundon sa tag-as nga mga sumbanan. “Aduna ka bay gikaibgan nga butang nga dili imoha?” usa sa ingon nga pangutana, nagsubli sa usa sa Napulo ka mga Sugo. Ang uban mihatag og gibug-aton sa pagrespeto sa mga katungod sa kabtangan ug pagkamatinud-anon ngadto sa pamilya ug sa Simbahan: “Gimarkahan ba nimo ang usa ka mananap nga wala nimo mahibaloi nga imoha? … Nag-ampo ba kamo sa inyong pamilya magabii ug mabuntag ug mohimo og sekreto nga pag-ampo?” Ang mga misyonaryo sa panimalay miawhag usab sa mga lalaki sa pagminyo og dugang nga mga asawa aron sa pagpakita og mas dakong pasalig sa tinuohan.5
Ang mapugsanong pagpamulong ug relihiyusong kasibot maoy nakapadaghan sa nanambong sa simbahan ug sa mga halad sa ikapulo. Lima ka bulan human gisugdan ang repormasyon, gipahibalo ni Brigham Young ang pagdawat sa Dios sa paghinulsol sa mga tawo. Human makompleto sa mga misyonaryo sa panimalay ang ilang mga paglibut niadtong Abril 1857, kadaghanan sa mga Santos sa Ulahing mga Adlaw nabunyagan pag-usab.6
Ang wala tuyoa nga mga sangputanan nahitabo human sa panahon sa repormasyon. Matag karon ug unya, si Brigham Young, Jedediah Grant, ug ubang mga lider mipasidaan batok sa mga masupilon ug mga mibiya sa kamatuoran. Migamit og mga tudling sa biblia, ilabi na sa Daang Tugon, kini nga mga lider mitudlo usab nga ang ubang mga sala hilabihan ka dautan nga ang kapasayloan mahitabo lamang pinaagi sa pagpaagas sa dugo sa makasasala. Ang mga report sa nagkagrabe nga mga pinulongan ug mga hungihong sa “pagsukol sa Mormon” ngadto sa federal nga gobyerno miabut sa presidente sa Estados Unidos, kinsa mihimo og militar nga aksyon aron pagsupil sa gituohan nga pagpanggubot. Ang hulga sa armadong away mipasamot sa kainit tali sa lain-laing mga grupo, ug sa ubang dapit sa Teritoryo sa Utah ang grabeng panamastamas nahitabo. Kini nga panahon, nailhan isip ang Gubat sa Utah, natapos human ang mga opisyal sa gobyerno mihan-ay og gikauyunan nga paghunong sa away tali ni Brigham Young ug ubang mga lider sa teritoryo.7
Samtang ang mga kabalaka mahitungod sa kagutom ug pagpakabuhi nagkaminos, ang mga Santos sa Ulahing mga Adlaw kasagarang milikay sa sobra ka militante nga estilo sa pagsangyaw sa tunga-tungang bahin sa mga 1850. Giusab ni Brigham Young ang mga pamaagi aron mas matagad ang nagkadaghan nga mga nanimuyo ug namulong siya batok sa pagpapahawa sa uban gikan sa teritoryo. Ang mga Santos mipadayon sa pagdasig sa usag usa ngadto sa pagsentro sa ilang mga komunidad diha sa pagtuo ug debosyon, usa ka aspeto sa repormasyon nga gihangup sa daghang pamuy-anan sa Kasadpang Bahin sa Amihanang Amerika.8
May Kalabutan nga mga Hisgutanan: Mga Gangis ug mga Kanaway, Gubat sa Utah, Masaker sa Mountain Meadows