“Independence, Missouri,” Mga Hisgutanan sa Kasaysayan sa Simbahan
“Independence, Missouri
Independence, Missouri
Niadtong 1827, ang mga lumulupyo gikan sa habagatang bahin sa Estados Unidos nakakaplag og usa ka bag-ong lungsod nga gitawag og Independence sa bag-ong naorganisar nga Distrito sa Jackson, Missouri.1 Ang lungsod anaa sa maayong lokasyon diha sa mga utlanan sa nasud: nahimutang kini sa tumoy sa kasadpang bahin sa mga ruta sa suba gikan sa nahibiling dapit sa Estados Unidos ug sa tumoy sa silangang bahin sa Santa Fe Trail, nga milugway pa gayud ngadto sa halayoong teritoryo nga kaniadto giokupahan sa kadaghanan sa mga American Indian. Ang lungsod ginganlan gikan sa U.S. Ang pagdeklarar sa Independence, ug ang distrito ginganlan subay sa ngalan ni Andrew Jackson, kinsa nahimong usa ka nasudnong bayani isip usa ka heneral sa U.S army ug sa kadugayan napili nga presidente sa Estados Unidos.
Sa sinugdanan sa 1831, ang mga misyonaryo nga mga Santos sa Ulahing mga Adlaw miagi sa Independence sa unang higayon, nanghinaut sa pagsangyaw ngadto sa mga American Indian kinsa nanimuyo sa kayutaan sa kasadpan sa Missouri. Sa wala madugay si Joseph Smith mibisita sa Independence ug nakadawat og usa ka pagpadayag nga miila sa dapit isip “ang sentro nga dapit” sa Zion—ang lokasyon sa balaan nga siyudad diin ang pagkamatarung mopatigbabaw ug ang mga Santos moandam alang sa Ikaduhang Pag-anhi ni Jesukristo.2 Pagka Agosto 2, 1831, si Sidney Rigdon mipahayag sa yuta nga “gigahin ug gipahinungod ngadto sa Ginoo alang sa usa ka pagpanag-iya ug kabilin alang sa mga Santos.” Sa sunod nga adlaw, si Rigdon mipahinungod sa usa ka dapit nga anaa sa tunga sa milya sa kasadpang bahin sa sentro sa Independence alang sa pagtukod og usa ka templo, ug si Joseph ang mipahimutang sa unang bato nga pamag-ang.3
Ubos sa direksyon ni Bishop Edward Partridge, ang unang mga Santos kinsa mipuyo sa dapit misugod sa pagpalit og kabtangan ug nag-andam alang sa ubang mga Santos sa pagpundok aron sa pagtukod sa Zion. Taliwala sa mga tuig 1831 ug 1833, ang Simbahan mipalit og 73 ka ektarya didto sa Independence ug 486 ka ektarya sa mga dapit nga nagpalibut sa Distrito sa Jackson, ug gibanabana nga 1,200 ka mga Santos ang mipundok ngadto sa distrito ug miorganisar og lima ka mga branch.4 Niadtong Hunyo 1833, ang Unang Kapangulohan, nga kanhi sa Kirtland, Ohio, mipadala og usa ka laraw, o plano sa siyudad, ngadto sa mga lider sa Simbahan sa Missouri alang sa “Siyudad sa Zion,” nagpakita kon unsaon sa pag-organisar ang siyudad palibut sa usa ka complex nga adunay duha ka dosena nga templo, sagrado nga mga estraktura nga gipahinungod sa pagtuman sa temporal ug espirituhanon nga mga panginahanglan sa mga Santos.
Subo lang kay, ang mas nauna nga lumulupyo sa dapit nag-anam kadako ang pagkabalaka sa presensya sa mga Santos sa Ulahing mga Adlaw diha sa Missouri. Ang nagkadako nga tensyon tali sa mga Santos ug sa ilang mga silingan miabut sa punto nga kinahanglan dunay usbon niadtong ting-init sa 1833, nga miresulta sa pagpapahawa sa tibuok populasyon sa mga Santos gikan sa distrito. Bisan pa man sa ilang exodo, ang mga Santos midumili sa pagbaligya sa ilang kayutaan sa Distrito sa Jackson, naglaum nga ila pa kining mabawi sa tabang sa estado o federal nga pangagamhanan. Sa dihang ang ilang pagsulay sa pagbawi sa ilang mga kabtangan napakyas, gitutokan sa mga Santos ang pagtukod og bag-on mga dapit nga pundukanan didto sa Illinois ug sa kadugayan didto sa Utah.
Bisan human si Brigham Young ug ang Napulog Duha ka mga Apostoles nangulo sa kadaghanan sa mga Santos padulong sa kasadpan, daghan ang naglaum nga usa ka adlaw makabalik aron sa pagtukod sa Zion duol sa Independence. Sa kasamtangan, ang mga sakop sa ubang mga simbahan nga mibulag gikan sa Ang Simbahan ni Jesukristo sa mga Santos sa Ulahing mga Adlaw namalik ngadto sa dapit. Karon, daghan nga mga simbahan ang nangangkon nga si Joseph Smith ang ilang tigpasiugda nagkonsiderar sa dapit nga pinaningkamotan sa mga nag-unang mga Santos sa pagtukod sa Zion isip sagrado nga mga dapit.
May kalabutan nga mga Hisgutanan: Jackson County Violence, Zion/New Jerusalem, Gathering of Israel