Pagsilyo [Sealing]

Ang mga Santos sa Ulahing mga Adlaw nagtuo nga gipahiuli sa Dios dinhi sa yuta ang gahum nga gihatag ngadto sa karaang Apostol Pedro aron sa pagbugkos, o pagsilyo, dinhi sa yuta ug didto sa langit. Kining gahum sa pagsilyo gigamit sa mga templo sa pagsolemne sa mga kaminyoon ug sa pagsilyo sa pamilya sa tanang henerasyon. Ang Unang mga Santos sa Ulahing mga Adlaw migamit sa pulong nga silyo sa pipila ka lahi apan may kalabutan nga mga paagi. Ang mga silyo gigamit aron ang mga kontrata o mga kasabutan mahimong opisyal. Ang mga silyo sa tinta, talo [wax], o embossed nga mga stampa mibalido sa mga pirma diha sa kontrata.¹ Daghang mga magbabasa sa Biblia mihubad sa mga tudling nga naghisgot sa termino nga silyo isip nagpasabut nga ang usa ka butang gihimong opisyal diha sa mga mata sa Dios. Ang nag-unang mga Santos sa Ulahing mga Adlaw kanunayng namulong kabahin sa pagsilyo niining paagiha, nagpasabut sa mga pag-ampo, mga pagpamatuod, mga panalangin, mga pagdihog, mga ordinansa, ug mga gisolemne nga kaminyoon pinaagi sa priesthood isip gisilyohan, o gimarkahan sa balaan nga awtoridad, ug pinaagi niana nahimong epektibo didto sa langit.² Daghan sa nag-unang mga pagpadayag nga nahatag ngadto ni Joseph Smith nagtudlo nga ang gipahiuli nga awtoridad, mga ordinansa, ug mga pakigsaad mahimong mosilyo sa mga indibidwal ngadto sa kinabuhing dayon.³

Ang Gahum ni Elias

Sa pagbuhat sa padayon nga pagpadayag nga iyang nadawat, si Joseph Smith mipaila sa bag-ong mga pagtulun-an ug mga ordinansa didto sa Nauvoo, Illinois, nga midugang ug mihatag sa mas tukma nga pagsabut sa pagsilyo ngadto sa mga Santos. Gitudlo niya nga “ang espiritu ug gahum ni Elijah” naglangkob sa gahum sa pagpahimutang “sa mga silyo sa Melchizedek priesthood diha sa balay ni Israel.” Gitudlo usab niya nga siya may katungod sa paggamit niining gahum sa pagsilyo alang sa iyang mga minahal ug sa tanang Santos sa Ulahing mga Adlaw pinaagi sa mga ordinansa sa templo.⁴

Kini nga mga pagpasabut ngadto sa gahum ni Elias sa pagsilyo nagagikan sa 1836 nga panan-awon nilang Joseph Smith ug Oliver Cowdery didto sa Templo sa Kirtland. Bisan og si Joseph wala mamulong diha sa publiko kabahin sa kasinatian, ang asoy sa panan-awon diha sa journal ni Joseph natala nga si Elias mianhi sa “pagpabalik sa kasingkasing sa mga Amahan ngadto sa mga anak, ug ang mga anak ngadto sa mga amahan.” Ang karaang propeta misulti ni Joseph nga, “Ang mga Yawe niini nga dispensasyon gihatag ngadto sa imong mga kamot.”⁵

Ang Bunyag alang sa mga Patay ug ang Mahangturon nga mga Pamilya

Sa dihang gisugdan ni Joseph Smith ang pagpaila sa mga ordinansa sa templo diha sa Nauvoo, namulong siya kabahin sa ilang gahum sa pagbugkos, o pagsilyo, sa mga tawo sa tanang henerasyon. Sa mga sulat ngadto sa Simbahan nga naglangkob sa dinasig nga mga pagtulun-an kabahin sa mga bunyag alang sa mga patay, si Joseph namulong mahitungod sa proxy nga bunyag isip usa ka ordinansa nga mihimo og “lig-on nga sumpay” tali sa mga henerasyon pinaagi sa pagpadangat sa kaluwasan ngadto sa mga patay. Midugang pa siya nga, kon buot sabton, ang ordinansa adunay usa ka “gahum sa pagsilyo ug pagbugkos.”⁶ Sa pag-ubog sa mga Santos sa tubig sa bunyag alang sa namatay na nga mga sakop sa ilang pamilya, ilang gibugkos ang mga henerasyon sa kaparyentihan sulod sa usa ka pamilya sa pakigsaad.

Usa ka pagpadayag ngadto ni Joseph, unang natala niadtong 1843, mipasabut sa ordinansa sa pagsilyo sa kaminyoon. “Ang tanan nga mga pakigsaad, mga kasabutan, mga kauyonan, mga katungdanan, mga panumpa, mga binuhatan, mga kabanay, mga pagkakauban, o mga paglaum,” ang Ginoo mipahayag, “nga wala nahimo ug nasulod ngadto ug Nabugkos pinaagi sa Espiritu Santo sa saad kaniya kinsa nadihogan … sa walay sangputanan, hiyas o kusog dinhi o human sa pagkabanhaw sa mga tawo nga patay na.” Ang gahum sa pagsilyo makahimo sa mga kaminyoon nga mabugkos alang sa kahangturan, ug ang mga ordinansa sa pagsilyo mapahigayon lamang pinaagi sa “sumbanan sa akong dinihogan,” nagpasabut nga mao si Propeta Joseph Smith.⁷ Gipahayag diha sa pagpadayag nga “usa lang gayud sa usa ka panahon ibabaw sa yuta” ang maghupot sa mga yawe niining gahum. Busa, ang matag sumusunod ni Joseph Smith isip Presidente sa Simbahan nakadawat sa mga yawe ug awtoridad sa pagdumala sa pagpahigayon sa mga ordinansa sa pagsilyo.

Hapit usa ka bulan human sa pagpadayag sa mga pagsilyo sa kaminyoon, si Joseph mitudlo nga kining samang gahum makasilyo sa mga anak ngadto sa ilang mga ginikanan. “Kon na-seal ang amahan ug inahan,” siya mitudlo, “mobutang kini sa seguridad sa ilang kaliwatan, aron dili sila mawala, apan maluwas pinaagi sa pakigsaad sa ilang amahan.”⁸ Si Brigham Young mipamatuod nga si Joseph misugo kaniya sa pagpahigayon sa maong mga pagsilyo sa higayon nga ang Templo sa Nauvoo maandam na.⁹

Mga Pagsilyo sa Pagsagop

Human sa kamatayon ni Joseph Smith, ang mga Santos mihuman sa Templo sa Nauvoo aron sila makadawat sa mga endowment ug masilyohan. Si Brigham Young ug ang Korum sa Napulog Duha ka mga Apostoles mipahigayon sa liboan ka mga pagsilyo. Sila misilyo sa mga magtiayon diha sa kaminyoon ug misilyo sa ilang mga anak ngadto sa mga ginikanan sa dihang ang mga ginikanan nasilyuhan human matawo ang ilang mga anak. Hinoon, atol nianang panahona, ang mga Santos sa Ulahing mga Adlaw wala pa masilyo ngadto sa ilang namatay na nga mga ginikanan kinsa wala miapil sa Simbahan sa buhi pa. Hinoon, pipila ka mga Santos miapil sa mga pagsilyo sa “pagsagop” nga nagbugkos kanila ngadto sa laing mga hamtong nga mga Santos sa Ulahing mga Adlaw, hapit ang kasagaran mga inilang mga lider sa Simbahan. Kining mga pagsilyo misumpay nila ngadto sa uban kinsa ilang nailhan nga midawat sa gipahiuli nga mga pakigsaad sa ebanghelyo. Sa misunod nga 50 ka tuig, daghang komplikado nga mga nasumpay-sumpay [network] nga pagsagop nga resulta sa pagsilyo sa templo, nagdugtong sa mga higala ug mga kaedad nga daw sila mga lugway sa mga pamilya.

Kini nga buhat nagpadayon hangtud sa 1894, dihang si Presidente Wilford Woodruff nakadawat og pagpadayag nga limitahan ang mga sinagop nga pagsilyo ug tutokan hinoon ang pagsilyo sa mga kaminyoon ug ginikanan ngadto sa anak nga mga relasyon. Giawhag ni Presidente Woodruff ang mga Santos sa pagsiksik sa ilang mga genealogy “kutob sa ilang mahimo, ug ma-seal ngadto sa ilang mga amahan ug mga inahan.” Giawhag niya ang mga Santos nga magpasilyo ngadto sa namatay na nga mga kapikas ug sa mga ginikanan, bisan og kadtong wala namiyembro sa Simbahan, nagsaad nga “gamay ra gyud kaayo, kon duna man, ang dili modawat sa Ebanghelyo.”¹⁰

Mga Tigsilyo sa Templo

Human sa kamatayon ni Joseph Smith, si Brigham Young ug ang ubang mga sakop sa Napulog Duha mipahigayon og mga pagsilyo sa templo didto sa Nauvoo ug sa Siyudad sa Salt Lake. Niadtong 1877 ang presidente sa bag-ong gipahinungod nga Templo sa St. George, si Wilford Woodruff, mihangyo og pagtugot gikan sa Presidente sa Simbahan nga si Presidente Brigham Young sa pag-set apart sa uban aron makapahigayon sa mga pagsilyo. Gitugutan ni Young si Woodruff sa pag-set apart og daghan kutob sa mahimo, ug sa kadugayan ang mga tigsilyo sa templo regular nang makapahigayon og mga pagsilyo sa buhi ug sa mga patay. Sa sayong bahin sa ika-20 nga siglo, ang Unang Kapangulohan mihimo og sumbanan nga mga pamaagi alang sa kapangulohan sa templo sa pagtawag ug pag-set apart og mga tigsilyo.¹¹Kining mga tigsilyo nagpadayon sa paglihok sa gidelegar nga awtoridad ug ubos sa direksyon sa Presidente sa Simbahan.