Kasaysayan sa Simbahan
Mga Bato sa Manalagna


“Mga Bato sa Manalagna,” Mga Hisgutanan sa Kasaysayan sa Simbahan

“Mga Bato sa Manalagna”

Mga Bato sa Manalagna

Sulod sa milenyum, daghang mga tawo sa tibuok kalibutan midawat sa ideya nga ang pisikal nga mga butang mahimong magamit sa sagrado nga mga katuyoan. Ang Biblia nagmatuod nga ang Dios nagtrabaho pinaagi sa mga butang sama sa sungkod ni Aaron, usa ka bitin nga tumbaga, ug ang arka sa pakigsaad. Si Jesus sa kaulahian miayo sa buta pinaagi sa pagpahid og laway nga dunay sagol sa lapok ngadto sa mata sa tawo.1

Ang Basahon ni Mormon naghulagway sa usa ka sagrado nga katuyoan alang sa espesyal nga pagkapili sa mga bato. Sa usa ka tudling, ang igsoon nga lalaki ni Jared mihangyo sa Ginoo sa paghikap sa 16 ka gagmay nga mga bato, diin “puti ug tin-aw, gani ingon sa sihag nga bildo” (Ether 3:1). Human ang tudlo sa Ginoo mihikap sa mga bato, nakahatag kini og kahayag alang sa mga Jaredite samtang sila mipanaw tabok sa dagat. Laing bersikulo nga namulong bahin sa sagrado nga mga bato nga “mopatin-aw ngadto sa mga mata sa mga tawo niini nga mga butang diin ikaw mosulat” (Ether 3:24).

Sa panahon ni Joseph Smith, ang ubang mga tawo nangangkon nga sila adunay gasa nga “makakita”, o makadawat og balaanon o hilabihan ka talagsaon nga mga mensahe, pinaagi sa mga bato sa manalagna. Kini nga mga tinuohan miabut gikan sa Biblia ug sa mga tradisyon sa kultura sa mga Taga-Europa nga nadala ngadto sa nahaunang mga milalin sa Amerika. Si Joseph Smith ug ang iyang pamilya midawat niini nga mga tinuohan, ug usahay gigamit ni Joseph ang mga bato nga anaa nahimutang sa yuta aron sa pagtabang sa mga silingan nga makit-an ang nawala nga mga butang o sa pagpangita sa nalubong nga mga bahandi.2

Imahe
oblong nga bato

Bato sa manalagna nga gipanag-iya ni Joseph Smith.

Sa dihang nadawat ni Joseph Smith ang bulawan nga mga palid niadtong 1827, nadawat usab niya ang instrumento sa paghubad uban niini, “duha ka mga bato nga anaa sa bayanan nga plata” gigamit pinaagi sa “‘manalagna’ sa karaan nga panahon” (Joseph Smith—Kasaysayan 1:35). Kini nga instrumento gipasabut diha sa Basahon ni Mormon isip “mga tighubad.” Panahon sa paghubad sa Basahon ni Mormon, klaro nga si Joseph Smith migamit niining duha ka mga instrumento—ang mga tighubad ug iyang mga bato sa manalagna—gipuli-pulihan. Parehas ra kaayo ang gamit niini, ug sa unang mga Santos usahay migamit sa termino nga “Urim ug Thummim” nga nagpasabut sa bato sa manalagna ingon man usab sa mga tighubad. Ang Propeta nakadawat usab og pipila sa mga pagpadayag nga makita karon sa Doktrina ug mga Pakigsaad pinaagi niining mga instrumento sa pagpadayag.3 Samtang si Joseph nahimo nga mas sinati na sa espirituhanon nga mga butang, siya sa katapusan misugod na sa pagdawat og pagpadayag bisan wala pa ang tabang niini.4

May kalabutan nga mga Hisgutanan: Hubad sa Basahon ni Mormon, Pagpangita og Bahandi, Ang paghusay ni Joseph Smith niadtong 1826

Mubo nga mga sulat

  1. Exodo 8:5–6, 16–17; Numeros 21:9; 1 Samuel 4:3–6; Juan 9:6.

  2. Richard E. Turley, Robin E. Jensen ug Mark Ashurst-McGee, “Si Joseph ang Manalagna,” Liahona, Okt. 2015, 10–17.

  3. James R. B. Vancleave, sulat ngadto ni Joseph Smith III sa Lyndon W. Cook, ed., David Whitmer Interviews: A Restoration Witness (Orem, Utah: Grandin Basahon, 1991), 239–40.

  4. Sayo sa tingpamulak sa 1830, si Joseph mihatag kang Oliver Cowdery sa bato sa manalagna nga gigamit sa paghubad sa Basahon ni Mormon. Si Phineas Young, kinsa mitabang ni Oliver Cowdery nga mahibalik sa Simbahan sa ulahing bahin sa 1840, nakaangkon sa bato gikan sa biyuda ni Cowdery, ug mihatag niini ngadto sa iyang igsoon, si Brigham Young. Human sa pagkamatay ni Brigham Young, usa sa iyang mga asawa, si Zina D. H. Young, nakakuha og usa ka manalagna nga bato nga tsokolate ang kolor gikan sa iyang kabtangan nga mitakdo sa deskripsyon sa bato nga gigamit ni Joseph sa paghubad sa Basahon ni Mormon, ug siya midonar niini ngadto sa Simbahan (tan-awa sa Richard E. Turley Jr., Robin S. Jensen ug Mark Ashurst-McGee, “Si Joseph ang Manalagna,” Liahona, Okt. 2015, 10–17).