“Wilford Woodruff,” Mga Hisgutanan sa Kasaysayan sa Simbahan
“Wilford Woodruff”
Wilford Woodruff
Si Wilford Woodruff miserbisyo isip ikaupat nga Presidente sa Ang Simbahan ni Jesukristo sa mga Santos sa Ulahing mga Adlaw tali sa 1889 ug hangtud sa iyang kamatayon sa 1898. Usa ka lumad nga taga Connecticut, gibunyagan siya niadtong 1833. Miapil siya sa ekspedisyon sa Kampo sa Israel ug miserbisyo og daghang mga misyon.1 Human maorden nga Apostoles sa 1839, miserbisyo siya isip usa ka miyembro sa Korum sa Napulog Duha sobra sa 50 ka tuig. Ang iyang makanunayon, detalyado nga mga diary nagpabiling usa sa mahinungdanong mga kapanguhaan sa unang kasaysayan sa Simbahan.
Hulagway ni Wilford Woodruff sa profile.
Sa maayong kabubut-on sa Dapartamento sa Kasaysayan sa Simbahan
Si Woodruff naminyo ni Phebe Whittemore Carter niadtong 1837. Sa mga tuig 1840 gidawat niya ang dinaghang kaminyoon nga gitudlo ni Joseph Smith, ug gikan sa 1846 hangtud sa 1877, naminyo siya og pinakaminos pito ka laing mga babaye. Amahan siya sa 34 ka anak.2
Pagka 1877 si Woodruff nahimong unang tawo nga nagserbisyo isip presidente sa templo dihang ang St. George Utah Temple nakompleto. Miserbisyo siya isip presidente niana nga templo hangtud sa 1884. Human sa kamatayon ni John Taylor sa 1887, si Woodruff nangulo sa Simbahan isip Presidente sa Korum sa Napulog Duha ka mga Apostoles, ug mga duha ka tuig ang milabay iyang gi-organisar pag-usab ang Unang Kapangulohan ug gipaluyohan siya isip Presidente sa Simbahan.3
Human mangita og pagpadayag mahitungod sa kaugmaon sa Simbahan niadtong 1890, si Woodruff nakadawat og dinasig nga direksyon sa pag-isyu og dokumento nga gitawag og Manifesto, nga nagpasiuna sa hinay-hinay nga pag-undang sa dinaghang kaminyoon.4 Sunod sa usa ka pagpadayag niadtong 1894, mipahibalo siya og mga kausaban sa naandang mga pamaagi sa Simbahan sa pagsilyo, nagtudlo sa mga Santos sa pagpasilyo sa ilang mga kaugalingon ngadto sa ilang mga katigulangan bisan kon ang ilang mga katigulangan wala mopasakop sa Simbahan. Gipuli kini sa tradisyon sa pagsilyo sa kaugalingon o sa mga katigulangan ngadto sa mga misyonaryo o ngadto sa mga lider sa Simbahan pinaagi sa mga pagsilyo isip mga sinagop. Aron sa pagsuporta niini nga buhat, si Woodruff milunsad og mga paningkamot sa pagpalambo sa genealogical research [pagsiksik sa mga kaliwat] lakip na sa pagtukod sa Genealogical Society of Utah. Si Presidente Woodruff midumala usab sa unang kahigayunan nga tawgon ang mga dalaga nga mag-misyon, nag-abli og bag-ong kapanahunan sa misyonaryo nga pagpangalagad sa mga igsoong kababayen-an.
Alang sa dugang impormasyon mahitungod sa kinabuhi ni Wilford Woodruff, tan-awa ang Prophets of the Restoration nga mga video sa history.ChurchofJesusChrist.org ug diha sa Gospel Library app.