“Nagkahiusang Kapunongan (‘Balaan nga Kapunongan’),” Mga Hisgutanan sa Kasaysayan sa Simbahan
“Nagkahiusang Kapunongan” (‘Balaan nga Kapunongan’)”
Nagkahiusang Kapunongan (“Balaan nga Kapunongan”)
Ang Nagkahiusang Kapunongan usa ka administratiba nga organisasyon nga midumala sa paggasto sa kwarta sa Simbahan taliwala sa mga tuig 1832 ug 1834. Niadtong Marso 1832, ang Ginoo misugo ni Joseph Smith sa pagtukod niining organisasyon aron masabutan “ang mga Katitikanhon ug Pang-negosyong mga patigayon” sa Simbahan sa Ohio ug sa Missouri.1 Si Joseph mipatawag sa konseho sa halangdong mga pari niadtong Abril 1832 didto sa Missouri alang niining katuyoan. Diha sa konseho, si Joseph nakadawat og laing pagpadayag nga nagpasabut nga siya, si Sidney Rigdon, si Newel K. Whitney, si Edward Partridge, si Sidney Gilbert, si John Whitmer, si Oliver Cowdery, si William W. Phelps, ug si Martin Harris mamahimong kabahin sa organisasyon. Ang pagpadayag naghatag og dugang pagpasabut nga kining mga kalalakin-an mahimong makagamit sa porsyon sa nakolektang kwarta alang sa ilang kaugalingon nga mga panginahanglan, ug ang bisan unsang nahabilin nga kwarta mahimong gamiton sa mga katuyoan sa Simbahan. Sila ang responsable sa mga utang sa kapunongan.
Ang siyam ka kalalakin-an nga gipili alang sa Nagkahiusang Kapunongan ang matag usa adunay piho nga kaakuhan. Ang unom “gipiyalan sa mga pagpadayag” (usa ka grupo nga nahimong inila isip ang “Katitikanhon nga Kapunongan”) ug midumala sa mga kalihokan sa pagmantala sa Simbahan. Sila si Partridge ug Whitney mao ang duha ka mga bishop diha sa Simbahan, ug si Gilbert usa ka sinaligan ni Partridge. Kining tulo, managsamang midumala sa mga balay tipiganan sa Simbahan didto sa Ohio ug Missouri. Pagka-1833, duha ka dugang nga mga miyembro—si Frederick G. Williams ug si John Johnson—gidugang ngadto sa kapunongan, pinaagi sa pagpadayag. Si Williams, usa ka sakop sa nagdumalang kapangulohan sa Simbahan, adunay dakong kayutaan sa Ohio, ingon man si Johnson. Ang ilang kayutaan nahimong kapanguhaan sa Nagkahiusang Kapunongan.
Sulod sa duha ka tuig, daghan sa mga patigayon sa Simbahan nahimo pinaagi sa Nagkahiusang Kapunongan, lakip sa pagpamalit og kabtangan diin ang Balay sa Ginoo didto sa Kirtland matukod pag-usab. Sa dihang ang mga Santos giabug gikan sa Distrito sa Jackson, Missouri, niadtong tinglarag sa 1833, ang Simbahan nawad-an og duha sa mahinungdanong tipik sa kapunongan: ang printahanan nga buhatan ni Phelps ug ang balay tipiganan ni Gilbert. Agi og dugang, ang Nagkahiusang Kapunongan nakautang gumikan sa pagpamalit og mga butang alang sa mga balay tipiganan, usa ka bag-ong printahanan sa Kirtland, yuta alang sa kalambuan sa Kirtland. Niadtong Abril 10, 1834, ang mga sakop sa Nagkahiusang Kapunongan sa Kirtland mihukom sa paghunong sa organisasyon ug paglabay sa pipila ka semana ang Nagkahiusang Kapunongan gihunong na. Ang halangdong konseho sa Kirtland, naporma niadtong Pebrero 1834, mipuli sa pagdumala sa patigayon ug mga paningkamot sa pagmantala sa Simbahan.
Sa pipila ka mga edisyon sa Doktrina ug mga Pakigsaad, ang “Nagkahiusang Kapunungan” gitawag og “Balaang Kapunongan” ug mga alyas gisukip diha sa mga ngalan sa mga sakop. Agig dugang, ang pinulongan mahitungod sa katuyoan sa kapunongan giusab aron magpasabut kini og mas kinatibuk-an nga pag-amuma sa kabus. Nahimo kini aron sa pagpanalipod sa pagkatawo sa mga sakop sa kapunongan ug sa pagpabilin sa mga katuyoan niini nga tinago. Ang mga ngalan sa mga indibidwal gipahiuli ngadto sa Doktrina ug mga Pakigsaad niadtong mga tuig 1980, apan ang pulong nga kapunongan gigamit gihapon sa kapunongan diha sa mga seksyon 78, 82, 92, 96, ug 104. Nakahatag kini sa pipila og kalibug tali sa kapunongan ug sa nagkahiusang kapunongan, usa ka sistema sa pagpakabuhi subay sa balaod sa pagpahinungod nga gi-establisar sa kadugayan ni Brigham Young didto sa Utah.
May Kalabutan nga mga Hisgutanan: Doktrina ug mga Pakigsaad