“Mga Pagpadayag ni Joseph Smith,” Mga Hisgutanan sa Kasaysayan sa Simbahan
“Mga Pinadayag ni Joseph Smith”
Mga Pagpadayag ni Joseph Smith
Atol sa propetikanhon nga pagpangalagad ni Joseph Smith, nakadawat siya og kapin sa 100 ka mga pagpadayag nga narekord ug sa kaulahian opisyal nga gitugutan.1 Ang kadaghanan gisulti mismo diha sa tingog ni Jesukristo mismo, ug kadaghanan niini makita karon isip mga seksyon sa Doktrina ug mga Pakigsaad. Nadawat ni Joseph ang labing unang pagpadayag nga (karon ang Doktrina ug mga Pakigsaad 3) niadtong Hulyo 1828 ug ang iyang katapusang narekord nga pagpadayag mga tulo ka bulan sa wala pa ang iyang kamatayon niadtong 1844.2 Sa hapit matag higayon, kining mga pagpadayag miabut agig tubag sa pag-ampo, usahay kon adunay indibidwal nga mangutana ni Joseph aron magpakisayud sa Ginoo aron masayran ang Iyang kabubut-on mahitungod kanila, ug kasagaran kon si Joseph magtinguha og mga tubag sa mga pangutana bahin sa doktrina o direksyon diha sa polisiya ug pagdumala sa Simbahan. Ang nahaunang mga Santos sa Ulahing mga adlaw kanunayng moila sa pormal nga mga pagpadayag ni Joseph gikan sa uban niyang mga sinulat pinaagi sa pagpasabut niini isip “ang mga pagpadayag,” “ang mga sugo,” o “ang mga pakigsaad.”3 Daghan niining mga pagpadayag wala malakip diha sa mga kasulatan sa Simbahan o namantala atol sa buhi pa si Joseph Smith. Anaa kini karon sa The Joseph Smith Papers.4
Agig dugang niining pormal nga mga pagpadayag, si Joseph Smith nagbilin usab og mga asoy sa mga panan-awon, mihatag og dinasig nga mga pag-ampo ug mga wali, ug mihubad sa Basahon ni Mormon ug sa basahon ni Abraham ug gikompleto ang usa ka bag-ong “hubad” sa Biblia pinaagi sa pagpadayag.5
Kadaghanan sa mga pagpadayag ngadto ni Joseph Smith nga opisyal nga gitugutan nahatag taliwala sa mga 1828 ug 1835, sa dihang ang organisasyon sa Simbahan natukod. Kini nga mga pagpadayag mitubag sa mahinungdanon nga mga pangutana ug nagbutang og pundasyon alang sa panggamhanan sa Simbahan. Sukad niana, si Joseph midawat og ginagmayng pormal nga mga pagpadayag samtang ang mga opisyal sa Simbahan, mga konseho, ug mga korum gilauman sa pagpangalagad sa Simbahan pinasikad sa mga pinadayag nga nahatag na ug sa pagtinguha og padayon nga pagpadayag sulod sa ilang kaugalingong panglantaw, o hurisdiksyon.
Si William McLellin, usa sa eskriba ni Joseph Smith, mihulagway sa paagi nga ang pagpadayag narekord: “Ang eskriba naglingkod mismo diha sa usa ka lamesa, nga dunay igsusulat, tinta ug papel. Ang hisgutanan sa kasayuran nasabtan, ang Propeta ug Tigpadayag magpakisayud sa Dios. Siya sa espirituhanong paagi makakita, makadungog ug mobati, ug dayon mamulong kon siya gidasig pinaagi sa Espiritu Santo.” Si Joseph Smith mopadayon sa pagdiktar, mohulat sa eskriba “sa pagsulat ug basahon og kusog ang matag sentence” hangtud nga si Joseph mosinyas nga ang pagpadayag nahuman na pinaagi sa pag-ingon og “Amen.”6 Si Parley P. Pratt, kinsa nakasaksi sa pagrekord sa pipila ka mga pagpadayag, namahayag nga “wala gayuy pagduhaduha, pagbalik-balik, o pagbasa pag-usab, aron sa pagpatunhay sa pagkasunod-sunod sa hunahuna.”7 Sumala sa iyang opisyal nga kasaysayan, si Joseph migamit sa Urim ug Thummim kon modawat og pipila sa iyang nahauna nga mga pagpadayag, apan maklaro nga siya nakadawat og mga pagpadayag nga walay tabang sa maong butang human sa Hunyo 1829.8