Mga Serbisyo sa Katilingban
Sama sa daghang relihiyoso nga mga komunidad, ang mga miyembro sa Simbahan adunay taas nga kasaysayan sa pagtabang sa mga kabos ug sa pagtubag niadtong nanginahanglan. Atol sa nahaunang katuigan sa Simbahan, ang mas halapad nga katilingban sa Amerika mihangop sa buhat sa kababayen-an sa kaluoy, ug ang kababayen-an sa kasagaran mao ang nagdumala sa mga paningkamot sa welfare sa relihiyoso ug sibiko nga mga kahimtang. Sa pagtukod niini niadtong 1842 ug atol sa pagpalig-on niini niadtong mga 1860, ang Relief Society naningkamot sa pagsunod sa Kristiyano nga mandato sa pag-atiman sa mga kabos pinaagi sa pagkolekta og mga donasyon ug pagdumala sa mga kapanguhaan sa komunidad sa pagtubag sa temporal nga mga panginahanglan. Ang kababayen-an nga mga Santos sa Ulahing mga Adlaw mitudlo og mga klase bahin sa pag-atiman sa mga masakiton ug mahitungod sa lawas sa tawo, ingon man mitigom ug mitipig og mga lugas, miestablisar sa Deseret Hospital, mibansay sa mga nars ug mga midwife, ug mikoordinar sa mga paningkamot sa kahupayan ngadto sa lokal nga mga bishop.
Pag-abot sa ika-20 nga siglo, ang Relief Society misugod sa paghangop sa bag-o, gieksperimentohan nga pamaagi sa pag-atiman sa mga panginahanglan sa katawhan, kasagaran gitawag og “siyentipikanhon nga kaluoy [scientific charity]” nianang higayona, pinaagi sa pagtukod og mga sistema sa suporta sa katilingban, sa pagpasiugda nga moapil sa komunidad, ug sa pagpakigtambayayong sa mga ahensyang pangsibiko. Ang paghiusa sa propesyon ug natad sa buhat alang sa katilingban nakahatag usab sa bag-ong henerasyon sa kababayen-an nga mga Santos sa Ulahing mga Adlaw og mga oportunidad nga moapil sa kalihokan sa pagpalambo sa katilingban nianang panahona ug sa pagpakigbahin sa naglambo nga kahibalo sa mga siyensya sa nutrisyon ug sa panimalay. Ang mga editor sa Relief Society Magazine mimantala og mga artikulo nga mihaom niadto nga mga interes ug nakapalambo og bag-ong kurikulom sa Relief Society nga may kalabotan niini nga mga hilisgotan. Ang mga lider sa Simbahan mitukod sa Social Advisory Committee niadtong 1916 sa pagtubag sa mga kabalaka bahin sa mga problema sa katilingban, lakip na ang kahimsog sa publiko ug moral nga mga isyu. Ang komitiba naningkamot sa pagbansay sa mga social worker isip kabahin sa gipasiugdahan sa Simbahan nga mga paningkamot sa pagpalig-on sa komunidad. Si Amy Brown Lyman, ang kinatibuk-ang secretary sa Relief Society ug propesyonal nga nabansay nga social worker, mitabang sa pagpalambo ug sa pagpalapad sa nag-uban nga mga programa.
Si Amy Brown Lyman ug ang usa ka grupo sa kababayen-an atol sa miting sa pagbansay sa pagserbisyo didto sa Anaconda, Montana, gibanabana nga 1920.
Atol sa Unang Gubat sa Kalibotan, ang mga social worker ug ang mga sakop sa Relief Society mitampo ngadto sa paningkamot nga masuportahan ang mga sundalo nga nakiggubat sa laing nasod, nagtabang sa produksiyon sa pagkaon ug sa mga proyekto sa Red Cross, lakip na sa paghimo og mga surgical bandage, mga mitten, ug mga medyas. Ilang gitutokan ang pagpalambo sa mortalidad sa bag-ong natawo ug sa inahan, miapil sa mga kampanya nga mapalambo ang pag-atiman sa kahimsog sa mga bata didto sa Estados Unidos, ug nakigkoordinar sa buhat sa kaluoy diha sa Simbahan ug sa mga kauban sa gawas. Sa wala pa siya mamatay, ang Presidente sa Simbahan nga si Joseph F. Smith misangon ni Amy Brown Lyman sa paglusad sa departamento sa mga serbisyo sa katilingban diha sa Relief Society, nga iyang natuman niadtong 1919. Sa kaulahian sa mga 1920, ang Social Service Department misugod sa pagdumala sa pagpahimutang sa pagsagop, usa ka nailhan nga buhat sa organisasyon hangtod niadtong 2014.
Sa wala pa ang Dakong Pagkahagsa sa Ekonomiya sa mga 1930, ang Social Service Department ang midumala sa mga kaso sa welfare sa nagkalisod sa ekonomiya nga mga miyembro sa Simbahan didto sa Utah. Kini nga han-ay sa buhat alang sa katilingban nagpadayon hangtod nga ang mga social worker gigamit sa pederal nga gobyerno sa nagkagrabe nga Pagkahagsa sa Ekonomiya. Atol niining kawalay kaseguroan sa ekonomiya, ang Simbahan nag-establisar og usa ka plano alang sa seguridad nga sa kaulahian napalambo ngadto sa permanente nga Welfare Department. Ang Social Service Department mipalambo usab sa mga paningkamot niini sa pag-atiman sa kabataan, ug niadtong 1937, ang Relief Society miusab sa departmento ngadto sa Social Service and Child Welfare Department. Ang mga kalihokan sa serbisyo sa katilingban sa tibuok Simbahan napalapdan didto sa Los Angeles, California, ug Ogden, Utah, niadtong mga 1930 ug mga 1940. Ang Social Service and Child Welfare Department nagpadayon sa pagdawat og propesyonal nga mga social worker, nagdugang og mga kapanguhaan alang sa nag-inusara nga mga inahan, naghimo og programa sa paggiya sa kabatan-onan, ug nagserbisyo isip ahensya sa panarbaho alang sa kababayen-an. Tungod kay kini nga departamento lisensyado sa pagsangkap og mga serbisyo sa welfare alang sa mga bata, niadtong 1954 gibalhin sa mga lider sa Simbahan ang Programa sa Pagpahimutang sa Indian nga Estudyante ngadto sa Panimalay sa usa ka Santos sa Ulahing mga Adlaw, usa ka programa sa pagpasiugda ug pagpakigdait alang sa mga estudyante nga Native American, ngadto sa katuyoan niini.
Ang mga worker nag-assemble og wheelchair atol sa pagbansay nga mga serbisyo sa welfare didto sa Kenya.
Sa ulahing mga dekada sa ika-20 nga siglo, ang mga lider nagtinabangay sa paglangkob ug sa pagkoordinar sa mga organisasyon ug mga programa isip kabahin sa paningkamot sa Simbahan sa pakigtambayayong. Niining higayona, ang Presiding Bishopric mao ang nagdumala sa buhat sa mga serbisyo sa katilingban. Pinaagi sa pipila ka kausaban sa ngalan tali sa 1969 ug 2019, ang organisasyon sa Simbahan sa mga serbisyo sa katilingban makanunayon nga nagsuporta sa wala makasal nga mabdos nga mga inahan ug pagsagop sa bata bisan unsa pa ang giapilan nga simbahan ug naglihok isip usa sa labing dako nga mga pribadong ahensya sa pagpanagop didto sa Estados Unidos. Ang mga Santos sa Ulahing mga Adlaw ug ang uban nakadawat og dugang nga suporta pinaagi sa mga referral gikan sa mga bishop, ilabi na alang sa propesyonal nga pagtambag, mga programa aron maulian gikan sa pagkaadik, mga klase alang sa mga ginikanan, ug giorganisar nga tabang alang sa nabilanggo nga mga indibidwal. Pagka-2000, ang organisasyon mimentinar og 6 ka opisina didto sa Canada, Great Britain, Australia, ug New Zealand, ingon man sa 57 ka opisina didto sa Estados Unidos. Bisan kon mihunong kini sa kalihokan isip ahensya sa pagpanagop niadtong 2014, pagka-2023 ang Family Services mipadayon sa pagsuporta sa mga pagpanagop pinaagi sa paggiya sa umaabot nga mosagop nga mga ginikanan diha sa proseso.
May Kalabotan nga mga Hisgotanan: Mga Programa sa Kaayohan, Relief Society, Amy Brown Lyman, Dakong Pagkahagsa sa Ekonomiya, Pioneer nga Kababayen-an ug Panambal