Kasaysayan sa Simbahan ug Pagtipig og Rekord
Gikan sa sinugdanan niini, gihatagan og gibug-aton sa Simbahan ang pagtipig og mga rekord ug pagsulat sa kasaysayan base sa lawom nga pagtuo, nga gipasabot og maayo sa Basahon ni Mormon, nga ang sagradong mga rekord mogiya sa mga matinud-anon ug mopreserbar sa presensya sa Dios sa kasaysayan alang sa umaabot nga mga henerasyon. Ang pasalig sa Simbahan sa pagtipig og mga rekord dayag gikan sa pagkatukod niini niadtong 1830, sa dihang ang pagpadayag misugo sa mga miyembro sa pagdokumento sa propetikanhong pangalagad ni Joseph Smith. Si Joseph mismo miapil pag-ayo sa pagpalambo ug pagpreserbar sa sagradong mga rekord, ilabi na sa paghubad ug pagmantala sa Basahon ni Mormon ug sa pagsulat sa daghang mga pagpadayag nga iyang nadawat gikan sa Ginoo.
Samtang nagtubo ang Simbahan, mao usab ang panginahanglan niini sa mga rekord. Niadtong 1831, si John Whitmer gitudlo isip Magsasaysay sa Simbahan ug gitahasan sa pagsulat alang ni Joseph Smith ug pagmintinar sa usa ka running account. Niadtong 1832, gilusad ni Joseph ang usa ka mahinungdanong kampanya sa pagtipig og rekord nga naglakip sa iyang kasaysayan ug journal, usa ka koleksyon sa mga pagpadayag, usa ka talaan sa mga miting, ug usa ka basahon sa mga sulat. Paglabay sa duha ka tuig, iyang gisugo si Whitmer, nga nagpuyo niadtong higayona sa Missouri, sa pagtipig og mga lista sa mga Santos sa Ulahing mga Adlaw nga nagpuyo didto. Niadtong 1835, iyang gitudlo si Oliver Cowdery nga mahimong “rekorder sa Simbahan,” nga miresulta sa mas sistematikong proseso sa pag-isyu ug pagdumala sa mga lisensya sa ministerya. Labaw pa kining tanan sa administratibo nga panginahanglan; mipahayag si Joseph og pagmahay nga ang Simbahan wala magtipig og mas maayong mga talaan sa sinugdanan, namahayag nga ang ingon nga talaan mahimo untang “dili maihap nga bili sa mga santos.”
Pagka 1838, gibag-o ni Joseph Smith ang iyang mga paningkamot sa pagsulat og kasaysayan sa sayong bahin sa iyang kinabuhi nga sa kasagaran gibase sa iyang panumdoman. Gidiktar niya kini nga kasaysayan ngadto ni George Robinson, nga niadtong panahona nagserbisyo isip Kinatibuk-ang Rekorder sa Simbahan ug klerk sa Unang Kapangulohan. Kana nga paningkamot nahunong sa dihang giabog sa mga taga-Missouri ang mga Santos sa Ulahing mga Adlaw gikan sa estado ug si James Mulholland, ang misunod nga klerk ni Joseph, namatay niadtong 1839. Sa dihang didto na sa Nauvoo, Illinois, ang sibiko ug relihiyoso nga mga kalihokan nagduso sa panginahanglan alang sa dugang nga mga klerk ug mga tresurero. Human mapahibalo ang mahitungod sa Templo sa Nauvoo, si Willard Richards gitudlo nga rekorder sa templo ug tigsulat ni Joseph Smith, inabagan ni William Clayton. Gipadayon ni Richards ang kasaysayan ni Joseph niadtong 1838 apan migamit og mas daghan pang nasulat na kaniadto nga mga asoy. Pormal siyang gitawag isip Magsasaysay sa Simbahan niadtong 1842 ug isip Rekorder sa Simbahan paglabay sa usa ka tuig, niadtong panahona nangita siya og mga katabang aron motabang sa pagkompleto sa kasaysayan. Ang ilang paglihok sa buluhaton sa wala madugay naila isip ang Opisina sa Magsasaysay.
Magsasaysay ug Rekorder sa Simbahan nga si Willard Richards, kinsa miorganisar sa Opisina sa Magsasaysay niadtong mga 1840.
Sa dihang gitudlo ni Joseph Smith nga ang mga rekord sa mga klerk sa sagradong mga ordinansa irekord usab sa langit, ang mga paningkamot sa pagtipig og rekord daling nalambigit sa pagsimba sa templo. Ang mga Santos sa Ulahing mga Adlaw sa wala madugay mitan-aw sa piho nga mga rekord dili lamang nga nagsumpay sa nangagi, karon, ug sa umaabot, apan usab isip usa ka “lig-on nga sumpay” tali sa langit ug yuta (Doktrina ug mga Pakigsaad 128). Ang Opisina sa Magsasaysay mitubo ngadto sa usa sa mga sentro sa pagkolekta ug pag-apod-apod og impormasyon sa Simbahan ug usa ka dapit sa daghang mahinungdanong miting. Pag-abot sa ika-20 nga siglo, ang Opisina sa Magsasaysay midumala sa pagmugna, pagpundok, ug pagtipig og mga rekord sa Simbahan nga naglakip sa mga seremonyas sa templo, indibidwal nga mga ordinansa, datos sa pagkasakop, lokal nga mga talaan sa miting [minutes], opisyal nga mga proseso, ug lain-laing mga dokumento.
Ang mga Magsasaysay ug mga Rekorder sa Simbahan nga naglakip nila ni George A. Smith ug Wilford Woodruff, ug mga miyembro sa staff lakip nila ni Larinda Weihe ug B. H. Roberts, mikolekta, mipreserbar, ug mimantala sa mga tinubdan sa kasaysayan ug mga asoy nga nahimong mapuslanon kaayo sa mga miyembro sa Simbahan. Ang Kaabag nga Magsasaysay sa Simbahan nga si Andrew Jenson mibiyahe sa kalibotan aron sa pagpangita og mga rekord nga gihimo sa mga misyonaryo ug lokal nga mga miyembro. Pinaagi sa pagtinabangay, ang ilang mga paningkamot nagtukod og usa ka lig-on nga tipiganan sa impormasyon [archive] nga padayong nag-uswag sa kadak-on ug kamapuslanon. Samtang nagkadako ang panginahanglan sa pagtipig og rekord, ang Opisina sa Magsasaysay gibalhin ngadto sa Administration Building sa Simbahan niadtong 1918, nagsagop sa bag-ong mga pamaagi gikan sa ubang mga tipiganan sa impormasyon samtang nagpadayon ang buhat. Pagka 1972, ang punoang tipiganan sa impormasyon gibalhin ngadto sa Church Office Building, diin migamit kini og labing bag-ong mga teknolohiya sa pag-microfilm, pagkopya, ug digitalization aron mas mapausbaw ang pagpreserbar sa mga rekord.
Ang mga istorya sa kasaysayan nga gisulat ni B. H. Roberts, Susa Young Gates, Joseph Fielding Smith, ug Gordon B. Hinckley mihulma sa pagsabot sa Simbahan sa kasaysayan niini sulod sa mga dekada. Samtang nag-uswag ang ika-20 nga siglo, nagkadaghan ang mga propesyonal nga magsasaysay nga naghimo sa kasaysayan sa mga Santos sa Ulahing mga Adlaw nga maoy gitutokan sa akademiko nga pagtuon, ug ang mga tigtipig ug mga magsasaysay nagtinabangay sa pagdiskobre ug pagpalapad sa paghatag og pagtugot sa mga tinubdan diin masabtan ang kasaysayan sa Simbahan. Ang bag-ong mga pamaagi sa pagtuon sa kasaysayan migamit og dugang nga mga tinubdan aron mas masabtan ang nangagi sa Simbahan, mibag-o sa pipila ka mga yugto gamit ang bag-ong mga tinubdan ug han-ay nga mga pamaagi, ug gipalapdan ang mga pagtuon aron maapil ang kasaysayan sa mga babaye, mga grupo sa minoriya, ug ang nagkadako nga tibuok kalibotan nga komunidad sa mga Santos sa Ulahing mga Adlaw.
Ang Librarya sa Kasaysayan sa Simbahan mao ang gibutangan sa nag-unang tipiganan sa impormasyon sa Simbahan sa Salt Lake City, Utah.
Ang kabag-ohan sa pagtipig og impormasyon gipaspasan sa sayong bahin sa ika-21 nga siglo. Ang Librarya sa Kasaysayan sa Simbahan, nga gitukod niadtong 2009, gibutangan og minilyon nga orihinal nga mga dokumento, mga litrato, audio-visual nga mga rekording, ug ubang mga materyal nga mga ginama sa kamot [artifact]. Ang Departamento sa Kasaysayan sa Simbahan, ang mipuli sa Opisina sa Magsasaysay, nagpadayon sa pagpalapad sa mga paningkamot sa pagpreserbar ug pagmantala sa kasaysayan sa Simbahan. Ang mga proyekto niini naglakip sa programa sa makasaysayanong mga dapit, ang Joseph Smith Papers Project, ang daghang volume sa mga istorya sa kasaysayan nga giulohan og mga Santos, ug usa ka tibuok kalibotan nga proyekto sa pagkolekta og mga tinubdan sa kasaysayan gikan sa tibuok kalibotan. Niadtong 2012, giablihan sa Simbahan ang nag-una nga mga sentro sa pagpreserbar og mga rekord, nga naglihok isip mga tipiganan sa impormasyon sa daghang mga dapit nga nagkolekta og lokal nga mga makasaysayanong mga butang nga ginama sa kamot. Pagka 2022, kapin sa 25 ka sentro sa pagpreserbar og mga rekord ang natukod sa luwas nga mga pasilidad sa tibuok kalibotan.
May Kalabotan nga mga Hisgotanan: Family History ug Genealogy, Mga Punoang Buhatan sa Simbahan, Susa Young Gates, B. H. Roberts, Joseph Fielding Smith