Pag-opera sa Bitiis ni Joseph Smith

Sa dihang mitakboy ang sakit nga tipos didto sa New England sa mga 1811 ug 1814, ang pamilya nilang Joseph Sr. ug Lucy Mack Smith nagpuyo sa pinakasentro niini. Tanang pito ka mga anak natakbuyan sa sakit, lakip ni Joseph Smith Jr. ug ang iyang magulang nga babaye, si Sophronia, ang grabing naapiktohan. Tungod sa tukma nga panahon nga pag-opera nga gipasiugdahan sa usa ka lokal nga surgeon, naluwas ang batan-ong Joseph ug nalikayan ang pagkawala sa iyang wala nga bitiis.¹

Mga kahimanan sa pag-opera sa sayong bahin sa 1800

Mga kahimanan sa pag-opera gikan sa sayong bahin sa 1800.

Pipila ka bulan sa wala pa ang pag-opera, si Joseph ug ang iyang mga igsoon nag-antos sa grabing hilanat tungod sa tipos. Ang unang hinungdan sa impeksyon mao ang pagnana sa abaga ni Joseph ug wala madugay miapekto sa iyang wala nga bukog sa bitiis, nakaingon sa grabing paghubag. Tulo ka semana sa tumang kasakit ang giantus sa siyete anyos nga batang lalaki. Ang iyang inahan, si Lucy, nakahinumdom niya nga nagpanawag “Oh Amahan . . . ang kasakit grabe kaayo unsaon nga makaagwanta ko niini[?]” si Dr. Stone, usa ka surgeon gikan sa Hanover, New Hampshire, nag-atiman sa bitiis, giabisan og walo ka pulgada tali sa buol-buol ug sa tuhod, naglaum nga makuhaan ang paghupong. Nagsud-ong si Lucy sa nagkagrabe nga kasakit sa iyang anak, “misamot nga walay sama.”² Ang igsoon ni Joseph nga si Hyrum usahay molingkod sa iyang tupad ug iduot ang iyang bitiis aron moarang-arang ang kasakit.

Si Doktor Nathan Smith, nagtukod sa kasikbit nga Dartmouth Medical College, mibisita sa pamilya uban sa pipila ka lain pang mga surgeon, ingon og usa ka grupo sa mga estudyante nga medikal.³ Hugot nilang girekomendar ang pagputol sa apektado nga bitiis. Si Dr. Smith tingali misugyot sa pagputol aron maandam si Joseph ug ang iyang pamilya sa pagtugot sa usa ka pag-eksperimento nga pag-opera, usa ka risgo nga pamaagi nga giugmad ni Dr. Smith 15 katuig nang milabay. Ang pag-opera naglakip sa pagputol direkta ngadto sa bukog ug pagtangtang sa apektadong dapit, aron makatubo og balik ang kaunoran sa dapit niini. Si Lucy ug si Joseph Jr. miuyon sa pag-opera.

Mihinumdom si Lucy nga mibalibad ang iyang anak sa mga sedatibo ug paggaid kaniya sa higdaanan, mihangyo hinoon sa iyang amahan nga mogunit kaniya ug pagawason ang iyang inahan sa kwarto. Si Dr. Smith mitangtang sa siyam ka dagkong piraso sa apektado nga bukog, ug katorse ka lain pang mga tipik nga nakuha gikan sa bitiis ni Joseph sa dili pa kini maayo. Ang pagkaayo modangat og mga katuigan. Sa dihang mibalhin ang iyang pamilya ngadto sa New York upat katuig ang milabay, naggamit pa gihapon si Joseph og sungkod, ug nadala ang iyang pagtaki-ang ngadto na sa pagkahingkod. Ang pag-opera nakahatag og palas-anon nga panalapi sa pamilyang Smith samtang nanglimbasug sila sulod sa mga katuigan sa pagbayad sa medikal nga balayranan.

Bisan pa niana, ang pag-opera mismo maayo kaayo. Si Nathan Smith milya lang ang gilay-on sa iyang gipuy-an gikan sa pamilyang Smith ug tingali mao lang ang bugtong surgeon sa Estados Unidos niadtong 1813 nga may sarang sa pagluwas sa bitiis ni Joseph. Sa kaulahian gimantala niya ang mga pamaagi sa pag-opera kaniya, apan ang operasyon nagkinahanglan sa maong kahanas nga ang mga doktor wala kaayo mogamit niini hangtud sa Unang Gubat sa Kalibutan.

Sa istorya ni Lucy Mack Smith bahin sa pag-opera nakapadani og interest isip usa sa pipila ka mga istorya sa rekord sa pagkabata ni Joseph Smith. Nahisulat sa dul-an sa tulo ka dekada ang milabay human si Lucy mihangop sa mga sumbanan sa U.S temperance movement batok sa ilimnong makahubog, ang iyang istorya mipasabut sa pagdumili ni Joseph sa pag-inom og bino alang sa sakit. Agi og dugang, ang istorya naghatag og gibug-aton sa truma nga iyang gilahutay samtang ang iyang anak miantus sa makamatay nga operasyon.

Mga Kapanguhaan sa Simbahan

Joseph Smith, “History, 1838–1856, volume A-1 [23 December 1805–30 August 1834],” 131, josephsmithpapers.org.

Lucy Mack Smith, “Lucy Mack Smith, History, 1844–1845,” libro 2, pahina 9–libro 3, pahina 2, josephsmithpapers.org.

Vivian M. Adams, “Joseph Smith’s Boyhood Surgery: Mercy during a ‘Desperate Siege,’” Ensign, Hunyo 2013, 66–69.

Bibliograpiya

Ang mosunod nga mga pagmantala nakahatag og dugang impormasyon kabahin niining hisgutanan. Pinaagi sa pagpakita o pag-link nimo ngadto niining mga kapanguhaan, wala kami mag-indorso o mogarantiya sa sulod o sa mga panglantaw sa tagsulat.

LeRoy S. Wirthlin, “Nathan Smith (1762–1828): Surgical Consultant to Joseph Smith,” BYU Studies, vol. 17, nu. 3 (1977), 319-37.

LeRoy S. Wirthlin, “Joseph Smith’s Boyhood Operation: An 1813 Surgical Success,” BYU Studies, vol. 21, nu. 2 (Tingpamulak 1981), 131-54.

May Kalabutan nga Hisgutanan: Lucy Mack Smith, Joseph Sr. and Lucy Mack Smith Family

Mubo nga mga sulat

1. Mga istorya gikan sa panahon nga gipasabut ngadto niining sakit nga giila isip tipos, panurok, meningococcal meningitis, ug typhoid fever. Ang mga batang Smith natakbuyan sa typhoid nga hilanat, bisan og ang mga mananambal nakakita og mga timailhan sa hangga, scarlet fever ug kolera. Suma total, ang epidemya mihunos og unom ka libo ka kinabuhi, kadaghanan mga batang nag-edad tali sa tres ug nuwebe anyos, nga maoy kadaghanan maigo sa typhoid.

   Ang inahan ni Joseph, si Lucy, mihinumdom ni Sophronia nga nakigbisug sa sakit sulod sa 90 ka adlaw sa dihang ang nuwebe anyos nga naghigda wala na maglihok ug mihunong sa pagginhawa. Giputos si Sophronia sa habol ug gikugos sa iyang mga bukton, si Lucy milakaw samtang ang mga silingan nga diha sa kwarto misulay sa pagpugong kaniya sa pagdawat nga ang iyang anak namatay na. Mipadayon si Lucy sa punto sa kakapoy, ug si Sophronia sa katapusan mimata, miginhawa, ug mihilak. Naulian siya ug nabuhi hangtud 73 anyos (tan-awa sa Lucy Mack Smith, “Lucy Mack Smith, History, 1844–1845,” libro 2, mga pahina 10–11, josephsmithpapers.org).

2. Lucy Mack Smith, “Lucy Mack Smith, History, 1844–1845,” libro 2, pahina 11; josephsmithpapers.org. Mituo si Joseph nga ang nana nga misugod sa iyang abaga mipaingon ngadto sa iyang bitiis. Nahatagan sa posible nga diagnosis nga usa ka typhoid fever o susama nga impeksyon, si Joseph lagmit nakasinati og kinatibuk-ang pagtakboy sa impeksyon (tan-awa sa Joseph Smith, “Addenda, Note A, 1805–1820,” sa “History, 1838–1856, volume A-1 [23 Disyembre 1805–30 Agosto 1834],” 131, josephsmithpapers.org; LeRoy S. Wirthlin, “Joseph Smith’s Boyhood Operation: An 1813 Surgical Success,” BYU Studies, vol. 21, nu. 2 [Tingpamulak 1981], 148).

3. Oliver S. Hayward and Constance E. Putnam, Improve, Perfect, and Perpetuate: Dr. Nathan Smith and Early American Medical Education (Hanover, New Hampshire: University Press of New England, 1998), 183–84. Si Ethan Smith dili paryente ni Joseph Smith Sr.