“Eliza R. Snow,” Mga Hisgutanan sa Kasaysayan sa Simbahan
“Eliza R. Snow”
Eliza R. Snow
Si Eliza Roxcy Snow natawo sa Massachusetts niadtong 1804 ug nagdako sa Ohio. Ang iyang pamilya tinahud kaayo ug nagtudlo kaniya og personal nga pagdisiplina uban sa literatura ug relihiyon. Nakat-on siya sa pagsulat og balak, pagmintinar sa pinansyal nga talaan alang sa iyang amahan, ug manahi ug mag-atiman sa balay kauban sa iyang inahan.
Hulagway ni Eliza R. Snow.
Sa maayong kabubut-on sa Departamento sa Kasaysayan sa Simbahan [Church History Department]
Si Sidney Rigdon, usa ka ministro sa Reformed Baptist ug higala sa pamilya, mipaila-ila sa mga Snow ngadto ni Joseph Smith niadtong 1831, ug ang inahan ug igsoong babaye ni Eliza nakabig dayon.1 Kapin sa upat ka tuig ang milabay, human sa daghan nga paghunahuna ug pagtuon, ang 31-anyos nga si Eliza nabunyagan. Mibalhin siya sa Kirtland, diin nagtudlo siya alang sa pamilyang Smith, nagsulat og himno alang sa una nga hymnal sa mga Santos sa Ulahing mga Adlaw, ug midonar sa iyang napanunod nga dakong kabtangan ngadto sa pagtukod sa templo.2 Kuyog sa uban nga mga Santos sa Kirtland, siya nakasaksi sa espirituhanong mga pagpakita nga misabay sa pagpahinungod sa templo.3
Sa tunga-tunga sa pagpanglutos nga nahitabo sa Missouri mga hinapos sa 1830, si Joseph Smith mitawag ni Eliza aron sa pagsulat alang sa iyang katawhan ug sa ilang panalipud.4 Iyang gidawat ang hagit, ug pagka 1850, naila siya isip ang “Magbabalak sa Zion.” Nakasulat siya og labaw sa 500 ka balak diin iyang gidetalye ang kasaysayan ug mga gituohan sa mga Santos. Daghan sa iyang mga balak ang nahimong minahal nga mga himno ug gikanta libut sa mga daob [campfires] sa mga pioneer, diha sa mga lawak mitinganan, ug sa mga templo. Ang iyang mga balak nagpreserbar sa mahinungdanon nga mga pagtulun-an gikan ni Joseph Smith (lakip na ang doktrina sa usa ka Inahan sa Langit), nagdasig sa mga Santos sa Ulahing mga Adlaw sa ilang mga buluhaton, ug nagtudlo sa mga bata sa mga baruganan sa ebanghelyo.5
Ang katakus ni Eliza sa pagpangulo naklaro diha sa Nauvoo niadtong 1842 sa dihang, ubos sa direksyon ni Joseph Smith, siya, kauban ni Emma Smith, Sarah Kimball, ug ubang kababayen-an, miporma sa Female Relief Society sa Nauvoo. Isip sekretarya, si Eliza nagrekord diha sa basahon nga naglangkob sa opisyal nga talaan sa mga miting sa organisasyon og mahinungdanong mga pagtulun-an kabahin sa tibuok nga tahas sa kababayen-an diha sa Pagpahiuli. Gidala niya kining mga talaan tabok sa kapatagan, sa kaulahian migamit niini nga mahimong dokumento ug sumbanan alang sa pag-organisar sa lokal nga mga Relief Society sa tibuok Utah ubos sa direksyon ni Brigham Young.6 Si Eliza miserbisyo isip ang ikaduhang Kinatibuk-ang Presidente sa Relief Society, misunod sa sangon nga gihatag sa nag-una niya, si Emma Smith, sa pagpatin-aw sa mga kasulatan ug pag-awhag sa mga miyembro sa Simbahan. Si Eliza nakigtambayayong sa ubang kababayen-an sa pag-organisar ug dayon pagdumala sa Young Ladies’ Mutual Improvement Association (gitukod niadtong 1870) ug ang Primary Association sa mga bata (gitukod niadtong 1878).
Isip tigtukod ug nag-una nga pangulo sa tanang tulo ka organisasyon sa kababayen-an sulod sa Simbahan, si Eliza R. Snow malukpanong mibiyahe ug kanunayng nakigpulong ngadto sa kababayen-an sa Simbahan. “Nagbarug kita sa lahi nga posisyon gikan sa mga babaye sa kalibutan,” nagtudlo siya kanila. “Naghimo kita og pakigsaad uban sa Dios, nakasabut kita sa iyang mando.”7 Ang iyang mga wali nakatutok dili lamang sa praktikal nga mga aspeto sa kinabuhi sa pioneer, apan usab diha sa doktrina sa ebanghelyo, sa pagpahiuli sa pagkapari, ang pagka may-tulubagon diha sa pagtukod sa gingharian, ug ang panginahanglan alang sa kababayen-an sa pagpalapad sa ilang panglantaw kabahin sa ilang potensyal. “Nakahibalo ba kamo og bisan asa nga lugar sa kalibutan,” nangutana siya niadtong 1870, “diin ang babaye mas adunay kagawasan, ug diin iyang matagamtam ang ingon ka taas ug kamahimayaon nga mga pribilehiyo sama sa iyang nahimo dinhi, isip Santos sa Ulahing Adlaw?”8
Si Eliza naila usab sa iyang serbisyo diha sa templo. Nadawat niya ang iyang tuga sa Nauvoo ug nagserbisyo isip ordinance worker sa daghang katuigan diha sa Endowment House sa Siyudad sa Salt Lake, naggiya sa kababayen-an pinaagi sa mga ordinansa sa templo.9 Sa panahon dihang ang dinaghan nga kaminyoon nagkonektar sa daghan nga mga Santos sa Ulahing mga Adlaw diha sa nagsapaway nga mga pamilya, si Eliza adunay aktibo nga tahas diha sa daghan kaayong pamilya.10 Usa siya sa mga asawa ni Joseph Smith ug dayon ni Brigham Young. Bisan kon wala gayud siyay kaugalingon nga anak, siya ang nagmatuto sa mga anak sa pamilyang Young ug nakaamuma og relasyon tali sa mga Young ug sa uban nga mga pamilya sa mga pioneer. Ikaduha sa pito ka managsoong Snow, iyang napadayon ang suod nga koneksyon sa iyang mga igsoon ug sa ilang mga pamilya, lakip na sa iyang manghud nga si Lorenzo, kinsa sa kaulahian nahimong Presidente sa Simbahan.
Si Eliza namatay pagka Disyembre 5, 1887. Sa iyang lubong diha sa Assembly Hall sa Temple Square, usa ka choir ang mikanta sa iyang tanyag kaayo nga himno “O My Father.” Ang mga apostoles, pamilya, ug kahigalaan mihatag og pahinungod ngadto niya pinaagi sa balak, mga diskurso, personal nga mga handumanan, ug lig-on nga mga pagpamatuod.11 Ang iyang obitwaryo diha sa New York Times naghulagway kaniya isip “usa sa mga inila sa Mormon nga komunidad.”12
May Kalabutan nga mga Hisgutanan: Female Relief Society of Nauvoo, Primary, Young Women Organizations