“Helen Mar Kimball Whitney,” Mga Hisgutanan sa Kasaysayan sa Simbahan
“Helen Mar Kimball Whitney”
Helen Mar Kimball Whitney
Natawo sa 1828 ni Heber C. ug Vilate Murray Kimball, si Helen Mar Kimball nakasaksi og daghang mga talan-awon kabahin sa Pagpahiuli. Sa dihang siya tres anyos, ang iyang mga ginikanan gibunyagan uban sa suod nga mga higala gikan sa pamilya ni Brigham Young. Ang duha ka pamilya “suod kaayo nga managhigala,” gihinumduman ni Helen sa kadugayan. Si “Tiyo Brigham,” sa pagka-tinuod, mibunyag ni Helen human ang ilang duha ka mga pamilya mibalhin og dungan ngadto sa Kirtland, Ohio, aron sa pagpundok sa mga Santos. Nalingaw siya sa paggahin sa mga hapon sa Dominggo sa mga klase sa Biblia diha sa mga kakahoyan sa Kirtland.1
Ang amahan ni Helen, si Heber, gi-orden nga Apostol sa 1835 ug kasagaran mibiya pag-adto og mga misyon. Sa panahon nga siya wala, mitabang si Helen sa pag-amuma sa panimalay, usa ka naandan nga buluhaton nga mipadayon human ang pamilya mibalhin ngadto sa Far West, Missouri, sa dihang si Helen nwebe anyos. Ang kapintas sa pundok sa manggugubot mipugos sa pamilyang Kimball sa pagbiya gikan sa estado, ug milayas sila ngadto sa Illinois ug mitabang sa pagpahiluna sa Nauvoo.2
Si Joseph Smith, usa ka suod nga higala sa mga Kimball, pribadong mitudlo ni Heber ug Vilate niadtong 1841 mahitungod sa dinaghan nga kaminyoon, diin siya gimandoan pinaagi sa pagpadayag sa pagpaila.3 Sa Mayo o Hunyo 1843, gipaila ni Heber ngadto ni Helen ang ideya sa dinaghan nga kaminyoon ug miawhag kaniya nga magpa-seal ngadto ni Joseph Smith isip usa ka dinaghang asawa. Miuyon siya sa sealing ug sa wala madugay gihulagway kini ingon og “alang lamang sa kahangturan,” nagsugyot nga ang relasyon wala maglakip og sekswal nga mga relasyon.4 Naghunahuna si Helen sa kaminyoon nga usa ka sakripisyo nga makahimo og mahangturong sumpay sa mga pamilyang Kimball ug Smith diha sa langitnong katilingban.5 Human sa kamatayon ni Joseph sa 1844, si Helen nagpaibug ug giminyoan si Horace Kimball Whitney, usa ka igsoon sa iyang suod nga higala nga si Sarah Ann Whitney ug anak nga lalaki ni Newel K. ug Elizabeth Ann Whitney. Naminyo si Helen ug Horace alang sa karon lamang nga panahon didto sa Templo sa Nauvoo sa Pebrero 3, 1846.6
Atol sa paglalin sa mga Santos sa Ulahing mga Adlaw ngadto sa Walog sa Salt Lake, nanganak si Helen og duha ka mga lalaki. Ang una patay daan sa pagkatawo, ug ang ikaduha namatay pila ka adlaw human matawo. Ang iyang ikatulo nga anak namatay sa samang adlaw nga siya natawo didto sa Walog sa Salt Lake. Ang ubang walo ka mga anak ni Helen nabuhi human matawo, bisan og ang iyang kinamagulangang babaye namatay sa tuberkulosis sa pagka-16, ang iyang kinamanghurang babaye namatay sa dupang sa pagka-4, ug usa ka anak nga lalaki namatay sa pagka-21. Uban sa pag-uyon ni Helen, si Horace nangasawa og duha ka dinaghang asawa, si Lucy Amelia Bloxham ug Mary Cravath. Namatay si Lucy wala pay usa ka tuig human sa iyang kaminyoon. Mipuyo si Mary tupad ni Helen, ug ang duha nagtinabangay sa pag-amuma sa ilang mga anak.7
Miapil si Helen diha sa Simbahan ug sa iyang komunidad sa Utah, ilabi na sa buhat sa kalooy ug mga pagsaulog sa Relief Society.8 Sa pagdasig ni Emmeline B. Wells, misulat si Helen og mga handumanan sa unang mga adlaw sa Simbahan nga gipangmantala diha sa Woman’s Exponent nga magasin. Nahimo siyang batid nga manunulat ug tigtipig og inadlaw nga talaan.9 Sa dihang gipahayag ni Joseph Smith lll nga ang iyang amahan wala misulod o mitudlo og dinaghang kaminyoon didto sa Nauvoo, gimantala ni Helen ang duha ka mga pamphlet nga nagpanalipod sa buhat: Plural Marriage as Taught by the Prophet Joseph Smith ug Why We Practice Plural Marriage.10
Namatay si Helen niadtong 1896 ug gikasub-an sa mga sakop sa pamilya ug sa suod nga mga higala. “Sa tinuod ako nalipay,” siya misulat, “nga ako may pribilehiyo nga usa niadtong kinsa milahutay ngadto sa daghan nga mga kagul-anan ug nakabaton og kahibalo alang sa akong kaugalingon nga kini buhat sa Dios.”11
Kalabut nga mga Hisgutanan: Joseph Smith and Plural Marriage, Relief Society, Plural Marriage in Utah