Kasaysayan sa Simbahan
Louisa Barnes Pratt


“Louisa Barnes Pratt,” Mga Hisgutanan sa Kasaysayan sa Simbahan

“Louisa Barnes Pratt”

Louisa Barnes Pratt

Natawo sa 1802 sa Massachusetts, naminyo si Louisa Barnes ni Addison Pratt sa dihang siya 28. Gipaila-ila sila ngadto sa Ang Simbahan ni Jesukristo sa mga Santos sa Ulahing mga Adlaw sa igsoong babaye ni Louisa ug bayaw, si Caroline ug Jonathan Crosby. Ang mga Pratt gibunyagan sa 1838 sa Massachusetts. Samtang nagpaingon ngadto sa Missouri aron makig-uban sa mga Santos, ilang nahibaloan ang mahitungod sa kapintas batok sa mga Santos sa Ulahing mga Adlaw sa Missouri ug mipili sa pagpabilin sa Indiana hangtud sa 1841, sa dihang sila mibalhin ngadto sa Nauvoo. Mipasakop si Louisa sa Nauvoo Relief Society sa Mayo 12, 1842, nag-atiman sa iyang mga anak nga gitipdas, ug miamot ngadto sa ginagmay nga sukli nga pundo sa mga babaye alang sa Templo sa Nauvoo.

Imahe
Louisa Barnes Pratt

Litrato ni Louisa Barnes Pratt

Sinugdanan sa 1843 misugod si Louisa og hapit usa ka dekada nga pagsuporta sa misyonaryo sa dihang si Addison gitawag sa pagserbisyo og misyon didto sa mga isla sa Pasipiko. Human mibiya si Addison alang sa iyang misyon, misangkap si Louisa alang sa iyang pamilya ug mibalhin sila gikan sa Nauvoo ngadto sa Winter Quarters ug sa wala madugay ngadto sa Siyudad sa Salt Lake. Samtang nagbiyahe ngadto sa Winter Quarters, nakighimamat siya sa ubang mga babaye aron sa pag-ampo ug sa paghinatagay og suporta sa usag usa.1 Human sa iyang pag-abut, nasinati niya ang daghang mga pagsulay, lakip ang pagpuyo sa usa ka umugon nga kinubkob nga puy-anan, nalisa ang iyang tuhod, nasakit og scurvy, ug napangag ang atubangan niyang mga ngipon.

Mipauli si Addison gikan sa iyang misyon sa 1848 ug gibagat si Louisa didto sa Siyudad sa Salt Lake. Sa pagkasunod nga tuig, gitawag siya og ikaduhang misyon ngadto sa Tahiti. Sa Mayo 1850 si Louisa ug ang ilang upat ka mga anak nga babaye misakay og bapor aron sa pakig-uban kaniya sulod sa duha ka mga tuig didto sa Tubuai, diin nakat-unan nila ang pinulongan, namulong sa mga miting, ug misangyaw sa ebanghelyo. Si Jonathan ug Caroline Crosby ug ang ilang anak nga lalaki nakig-uban usab kanila. Samtang nagpuyo uban sa mga babaye sa Tubuai didto sa Habagatang Pasipiko, mitudlo si Louisa kanila og Iningles ug mga kahanas sa panimalay. Mitudlo usab siya kanila sa ebanghelyo ug mipanalangin kanila kon nasakit sila.2

Mipauli si Louisa ug Addison gikan sa ilang misyon sa 1852 ug mipuyo og kadiyot sa San Bernardino, California. Apan gibati niya nga “hugot nga nakakonektar ngadto sa simbahan” ug determinado nga makig-uban sa mga Santos sa Utah. Sa 1858 gitalikdan niya ang iyang nindot nga panimalay sa California ug nakigbulag ni Addison, kinsa nag-anam og kabugnaw sa Simbahan.3 Mipahiluna siya sa Beaver, Utah, ug mipuyo didto sulod sa nahibilin niya nga kinabuhi, nagserbisyo isip magtatambag ug sekretarya sa lokal nga Relief Society. Mipabilin siyang suod sa iyang igsoong babaye nga si Caroline, ug ang duha mipuyo nga nagtupad ang balay didto sa Beaver. Namatay si Louisa sa Septyembre 8, 1880, sa pulmonya.

Ang mga kasinatian ni Louisa sa kinabuhi mitabang kaniya sa pagpalambo og usa ka madasigong “kinaiya sa pagpaningkamot sa kaugalingon,” samtang mipuyo siya layo sa iyang bana sulod sa katunga sa ilang minyo nga kinabuhi. Nagtudlo siya sa eskwelahan ug mitrabaho isip mananahi alang sa pinansyal nga suporta. Ang iyang journal ug mga halandumong kaagi kasagaran nga nag-asoy og balik-balik nga kahadlok ug pagkanawad-an og kadasig nga naghatag og agianan sa kalinaw ug paglaum. “Mibati og kahuyang ang akong kasingkasing sa una, apan determinado ako nga mosalig sa Ginoo ug mobarug nga maisugon sa atubangan sa mga kalisud sa kinabuhi,” misulat siya samtang nagpuyo sa Nauvoo. Didto sa Tubuai misulat siya, “Gamay ra ang atong mahibaloan kon unsay atong mahimo hangtud atong himoon ang hingpit nga pagsulay.”4

Mubo nga mga Sulat

  1. Tan-awa sa Louisa Barnes Pratt, Memoirs, Tingpamulak sa 1846 ngadto sa Septyembre 1848, sa S. George Ellsworth, ed., The History of Louisa Barnes Pratt: Mormon Missionary Widow and Pioneer (Logan: Utah State University Press, 1998), 82.

  2. Kathleen C. Perrin, “Louisa Barnes Pratt: Self-Reliant Missionary Wife,” sa Reid L. Nielson ug Fred E. Woods, eds., Go Ye into All the World: The Growth and Development of Mormon Missionary Work (Provo, Utah: Religious Studies Center, 2012), 261–88; tan-awa sa Hisgutanan: Pang-ayo.

  3. S. George Ellsworth, ed., The Journals of Addison Pratt (Siyudad sa Salt Lake: University of Utah Press, 1990), 513.

  4. Louisa Barnes Pratt, sa Ellsworth, The History of Louisa Barnes Pratt, 65, 78, 150, 222, 360.