Kasaysayan sa Simbahan
Maligdong nga mga Katiguman


“Maligdong nga mga Katiguman,” Mga Hisgutanan sa Kasaysayan sa Simbahan

“Maligdong nga mga Katiguman”

Maligdong nga mga Katiguman

Ang termino nga maligdong nga katiguman gigamit sa Daang Tugon aron sa paghulagway sa importante nga mga pagpundok sa mga katawhan atol sa Pagpalabay ug sa Pista sa mga Tabernakulo.1 Tungod kay ang pagpahinungod sa unang templo sa Jerusalem atol sa paghari ni Solomon nahitabo sa panahon sa maligdong nga katiguman, ang termino usab adunay karaan nga koneksyon sa pagpahinungod sa templo.

Ang mga Santos sa Ulahing mga Adlaw nangandam nga magtukod og templo sulod sa sobra usa ka tuig sa dihang ang Ginoo mimando kanila niadtong 1831 aron sa pagbalaan sa ilang kaugalingon ug magpatawag og maligdong nga katiguman pipila ka bulan human ang Simbahan mibalhin gikan sa New York ngadto sa Kirtland, Ohio.2 Sa dihang gamay ra nga pag-uswag ang nahimo sa pagtukod sulod sa usa og tunga ka tuig, laing duha ka pagpadayag ngadto kang Joseph Smith mipabalik-balik sa sugo. Ang Ginoo misulti sa mga Santos nga dili sila maglangay-langay sa buhat sa Ginoo tungod kay gikinahanglan nila ang maligdong nga katiguman, kon diin tuyo sa Ginoo sa pag-andam sa Iyang mga Apostoles “sa pagpul-ong sa akong ubasan alang sa katapusan nga higayon.”3

Sa sayong bahin sa 1836, ang mga Santos nahuman na og trabaho sa Kirtland Temple, ug si Joseph Smith nag-organisar sa mga korum sa priesthood alang sa mga deacon, teacher, priest, elder, high priest, ang Seventy, Napulog Duha ka mga Apostoles, ug Unang Kapangulohan.4 Si Joseph Smith mitawag og dungan sa mga Santos diha sa maligdong nga katiguman niadtong Marso 27, ug atol sa mga kahimoan, ang nagkalain-laing mga korum sa priesthood ug ang kinatibuk-ang mga miyembro mipaluyo sa mga lider sa Simbahan, ug si Joseph mihatag sa pagpahinungod nga pag-ampo sa templo. Diha sa pag-ampo, si Joseph miila giunsa pagtuman sa mga Santos ang sugo nga magpundok diha sa maligdong nga katiguman, ug siya mihangyo sa Ginoo nga itugot nga ang Iyang himaya “mokunsad nganha sa iyang mga katawhan” isip panalangin sa ilang pagkamasulundon.5 Ang mga Santos nga mitambong sa maligdong nga katiguman nakasinati og abunda nga espirituhanong mga pagpakita.6 Ang pagpahinungod nga mga kahimoan niini nga okasyon mohatag og panig-ingnan alang sa mga nagsunod nga maligdong nga mga katiguman.

Ang maligdong nga mga katiguman mipadayon human sa pagpahinungod sa Templo sa Kirtland, kasagaran isip mga seremonya sa pagpahinungod apan sa ubang importanting mga okasyon usab, sama sa pagpaluyo og bag-o nga Presidente sa Simbahan o sa pagdawat og dugang mga pagpadayag ngadto sa sumbanan sa kasulatan [scriptural canon].7 Ang mga lider sa Simbahan mipatawag usab og maligdong nga mga katiguman sa ubang sagrado nga mga okasyon, lakip ang pagpahinungod sa Conference Center niadtong 2000.8 Uban pang espesyal nga mga miting, sa lokal ug kinatibuk-an, giisip nga maligdong nga mga katiguman, ug ang pipila ka mga templo adunay mga lawak alang sa maligdong nga katiguman nga gidesinyo alang sa samang mga panagpundok.

May Kalabutan nga mga Hisgutanan: Kirtland Temple, Temple Dedications and Dedicatory Prayers