Templo sa Nauvoo

Ang mga Santos sa Ulahing mga Adlaw nanimuyo sa Commerce (sa wala madugay gitawag nga Nauvoo), Illinois, niadtong 1839 human giabug gikan sa Missouri. Ang nahitabo nga pagpapahawa kanila nakapugong nila sa pagkompleto sa tulo ka mga templo nga giplano diha sa Missouri apan wala kini makapawala sa ilang kadasig nga mosulay sa pagtukod og usa ka dakbayan nga nakasentro sa templo.¹ Ang yuta alang sa bag-ong templo sa Nauvoo napalit pagka-1840. Ang pagtukod sa templo hinay-hinay nga mipadayon sulod sa sobra lima ka tuig, ug sa dihang kadaghanan sa mga Santos mibiya na sa Illinois niadtong 1846, nakatukod sila og nindot nga templo, kasagaran pinaagi sa gipahinungod nga paghago ug mga paagi.

Sa Oktubre 1840 nga komperensya sa Simbahan, gipili ang usa ka komite nga modumala sa konstruksyon, ug gipahibalo ni Joseph Smith nga ang templo tukuron pinaagi sa ikapulo sa mga miyembro. Ang himsog nga mga kalalakin-an diha ug duol sa Nauvoo gihangyo nga modonar sa ilang paghago sa pagtabang og kuha og bato gikan sa duol nga mga quarry ug sa paghakot niini ngadto sa lokasyon sa templo. Daghan ang mihimo og dili kwarta o lain nga matang nga mga donasyon sa templo, ug ang mga miyembro nga nagpuyo sa lagyong mga dapit gihangyo sa pagdonar og kwarta. Ang kababayen-an mitampo og dagkong pinansyal nga mga kapanguhaan pinaagi sa pag-apil sa usa ka penny fund. Ang hanas nga mga kantero [stonecuttter] ug mga panday ang gipatrabaho sa pangtapos nga mga buluhaton ug gibayaran og gidonar nga mga butang.²

Sa samang higayon nga gitukod ang templo, nakadawat si Joseph Smith og pinadayag ug mihatag og bag-ong mga pagtulun-an nga miusab sa mismong katuyoan sa mga templo sa mga Santos sa Ulahing mga Adlaw. Gipaila ni Joseph ang proxy nga bunyag alang sa mga patay, mga kaminyoon alang sa kahangturan, ug usa ka ritwal nga gitawag og endowment, diin ang tanan, mitudlo siya, ipahigayon sulod sa templo. Sa ingon, agig dugang sa gamit niini isip usa ka dapit sa pagsimba sa publiko, ang Templo sa Nauvoo gidesinyo aron sa pagpahigayon niining sagrado nga mga ordinansa. Sama pananglit, usa ka bunyaganan nga gipatong sa mga buko-buko sa 12 ka kahoy nga mga baka ang gihimo diha sa basement alang sa mga bunyag. Ang gawas sa templo, gidesinyo ni William Weeks uban sa tabang ni Joseph Smith, nagpakita og talagsaon nga mga kinulit sa mga adlaw, mga bitoon, ug mga bulan, nga nagsimbolo sa mga pagtulun-an ug mga pinadayag ni Joseph Smith kalabut sa templo.³

Ang ambisyusong proyekto sa pagtukod nagkinahanglan usab og mga kausaban sa organisasyon ug polisiya sa Simbahan nga namatud-an nga malungtaron. Ang unang mga ward sa Simbahan gimugna isip paagi sa pag-awhag og managsamang distribusyon sa ikapulo nga mga mamumuo diha sa templo: adunay napulo ka mga ward sa Nauvoo, ug ang mga kalalakin-an sa matag ward midonar og usa ka adlaw sa matag napulo ka adlaw diha sa konstruksyon. Ang Relief Society nagsugod sa usa ka bahin isip paningkamot sa pag-organisar sa mga babaye nga makatampo sa pagtukod sa templo. Ang pagbayad sa ikapulo isip rekisito sa pagtambong sa templo nasugdan usab sa Nauvoo sa dihang ang mga Santos giawhag sa pagbayad sa ilang ikapulo isip kabahin sa pagkahimong takus nga mogamit sa baptismal font o modawat sa endowment sa templo.⁴

Sa tinglarag sa 1845, ang mga Santos sa Ulahing mga Adlaw nag-atubang og pagpanghasi ug tumang pagpamugos aron mobiya sa Illinois, apan determinado sila nga mahuman ang templo aron ang takus nga mga Santos makadawat sa mga ordinansa sa templo sa dili pa mobiya padulong sa Kasadpan. Nagdali sila sa paghuman sa templo ug gipahinungod ang lawting [attic] pagka-Disyembre 1845 alang sa katuyoan nga mapahigayon ang mga sealing sa kaminyoon ug endowment. Sa sayong bahin sa Pebrero 1846, kapin sa 6,000 ka mga Santos sa Ulahing mga Adlaw misulod sa templo ug midawat sa gisaad nga endowment.⁵ Kadaghanan niini nga mga Santos matinahuron kaayong mihisgot mahitungod sa kasinatian ug mibati nga nabayaran sa mga sakripisyo nga ilang gihimo sa pagtukod sa templo. “Kon dili pa tungod sa hugot nga pagtuo ug kahibalo nga gitugyan kanamo didto sa Templo,” miingon si Sarah Pea Rich, ang biyahe tabok sa Dakong Kapatagan [Great Plains] “susama ra unta sa pag-ambak diha sa kangitngit.”⁶

Bisan kon adunay mga parte sa templo nga wala pa mahuman, ang tibuok templo gipahinungod pagka-Mayo 1, 1846. Napugos sa pagbiya sa templo, ang mga lider sa Simbahan nakahukom sa pagbaligya niini aron makatabang sa galastuhan sa Simbahan sa paglalin ngadto sa Great Basin apan wala kini mahimo.⁷ Ang templo gisunog sa wala mailhi nga arsonista pagka-1848, ug ang kadaghanan sa istrakturang bato nahugno tungod sa buhawi niadtong 1850. Niadtong 1999, si Presidente Gordon B. Hinckley mipahibalo nga ang Templo sa Nauvoo Illinois tukuron og balik base sa samang plano sa orihinal nga building. Ang Simbahan mainampingong misiksik sa mga drowing ug mga litrato sa orihinal nga templo aron matakdo ang desinyo sa gawas, ug ang sulod gipahiangay sumala sa mga panginahanglan sa modernong pagsimba diha sa templo. Ang natukod og balik nga templo gipahinungod niadtong Hulyo 2002.⁸

Ang Nauvoo Illinois Temple, gipahinungod niadtong 2002.

May Kalabutan nga mga Hilisgutan: Kirtland Temple, Temple Endowment, Nauvoo (Commerce), Illinois, Baptism for the Dead