“Ikapulo,” Mga Hisgotanan sa Kasaysayan sa Simbahan
“Ikapulo”
Ikapulo
Sa sayong mga katuigan sa Simbahan, ang mga lider nagtinguha sa pagpundo sa importante nga mga proyekto sama sa pagmantala sa mga kasulatan ug sa pagtukod sa Templo sa Kirtland pinaagi sa mga donasyon, panimpalad sa negosyo, ug ubang mga paningkamot sa pagkolekta og pundo. Sa Hulyo 1838, ang mga pangutana mitumaw bahin sa labing maayo nga paagi sa pagtubag sa pinansiyal nga mga panginahanglan sa Simbahan ug ang mabuhat sa gidonar nga mga pundo.1 Pagka-Hulyo 8, ang mga lider sa Simbahan sa Far West nagtagbo ug nangamuyo sa Ginoo nga “ipakita ngadto sa imong mga sulugoon kon pila ang imong gikinahanglan sa mga kabtangan sa imong katawhan alang sa ikapulo.”2 Nakadawat si Joseph Smith og duha ka pinadayag kon pila ang gikinahanglan ug unsaon sa paggamit ang kwarta.
Sa wala pa kining higayona, ang pulong nga ikapulo sumala sa paggamit diha sa Simbahan nagpasabot sa bisan unsa nga boluntaryong halad, bisan pila pa ang kantidad. Pagkahuman sa usa ka pinadayag sa 1831 ngadto kang Joseph Smith kalabot sa pagpahinungod ug pagkatinugyanan, ang mga Santos sa Missouri ug Ohio midonar og sobra nga mga kabtangan, mga luna sa yuta, mga himan, kagamitan sa balay, ug usahay kwarta.3 Ang sistema sa Simbahan sa paggamit sa gidonar nga mga kapanguhaan nagkadaiya. Usahay ang bishop migamit sa kwarta sa pagpalit og yuta o sa pagtabang sa mga kabus ug timawa. Alang sa mga proyekto sama sa pagtukod og mga building ug sa pag-imprinta sa mga literatura sa Simbahan, ang Nagkahiusa nga Kompanya [United Firm] o ang halangdong konseho midumala sa gidonar nga mga kwarta.4
Sa Hulyo 8, 1838, nga pinadayag, ang Ginoo mitubag sa pangutana sa mga Santos uban niini nga mga instruksyon: una, ang mga Santos kinahanglang mohimo og kausa nga donasyon sa tanan nilang sobra nga mga kabtangan; “ug human niana,” ang pinadayag nag-ingon, “kinsa kadto nga adunay ikapulo mobayad sa ikanapulo sa ilang tanan nga mga tubo sa matag tuig.”5 Usa ka dugang nga pinadayag nga gihatag nianang adlawa nagsugo sa mga lider sa Simbahan sa pag-establisar og konseho nga maoy tahasan sa paghukom kon unsaon sa paggamit niining gipahinungod nga mga kapanguhaan. Kini nga konseho sa orihinal naglakip sa mga sakop sa Unang Kapangulohan, sa konseho sa bishop, ug sa halangdong konseho sa Far West. Karon, ang konseho gilangkuban sa Unang Kapangulohan, Korum sa Napulog Duha, ug Presiding Bishopric ug gitawag nga Konseho sa Paggamit sa mga Ikapulo [Council on the Disposition of the Tithes]. Pagka-Hulyo 26,1838, ang konseho nag-abot sa unang higayon, apan ang mga pagpanglutos diha sa Missouri nakapugong sa mga Santos sa hingpit nga pagtuman sa mga direksyon niini nga mga pinadayag diha sa Far West.6
Sa sayong bahin sa mga 1840, ang mga lider sa Simbahan mihatag og gibug-aton sa pagbayad sa ikapulo aron sa pagtabang sa pagtukod sa Templo sa Nauvoo ug mihimo sa ikapulo nga usa ka kinahanglanon aron makasulod sa templo. Kini nga kinahanglanon gibag-o sa mga 1880 sa dihang ang mga templo gipahinungod diha sa Utah. Ang mga utang sa Simbahan midako sa kaulahian sa ika-19 nga siglo human ang gobyerno sa Estados Unidos misakmit sa mga kabtangan sa Simbahan sa tinguha nga mapugos ang Simbahan sa paghunong sa buhat sa dinaghan nga kaminyoon, ug ang ubang mga miyembro nagpanagana sa pagbayad og ikapulo tungod sa kahadlok nga ang ilang mga donasyon sakmiton.7 Sa 1899, hapit usa ka dekada human ang mga lider sa Simbahan nakakab-ot og kasabotan uban sa gobyerno sa Estados Unidos, ang Simbahan nagpabilin nga nalubong sa utang. Si Presidente Lorenzo Snow nakadawat og balaanong pagpakita atol sa usa ka sermon diha sa tabernakulo sa St. George, Utah, nga nag-aghat kaniya sa paghatag og gibug-aton sa pagsunod sa balaod sa ikapulo. “Ang panahon miabot na,” mideklarar siya, “alang sa matag Santos sa Ulahing mga Adlaw, kinsa nagtinguha sa pagpangandam alang sa umaabot ug mobarog nga lig-on diha sa tukmang pundasyon, sa pagbuhat sa kabubut-on sa Ginoo ug sa pagbayad sa iyang ikapulo sa hingpit.”8 Mibiyahe siya ngadto sa mga pamuy-anan sa tibuok Utah, mihangyo sa mga miyembro sa pagbayad og matinuoron nga ikapulo ug misaad og espirituwal ug temporal nga mga panalangin. Ang mga paningkamot ni Presidente Snow miresulta sa mas dakong pasalig, ug sulod lamang sa pipila ka tuig ang mipuli kaniya, si Joseph F. Smith, nakahimo sa pagbayad sa mga utang sa Simbahan.9
Paglabay sa panahon, ang mga binuhatan sa mga Santos kalabot sa ikapulo nausab samtang ang ekonomiya ug mga sirkumstansiya sa mga Santos nausab. Sa sinugdanan, ang mga Lider sa Simbahan migamit og komplikado nga pormula aron sa pagsubay kon pila ang ikapulo nga kulang sa mga Santos. Sa mga 1840, hinoon, kini gipasayon ngadto sa gikinahanglan nga pagbayad og ikapulo sa ilang tubo o kinitaan.10 Kini nga pamaagi sa pagbayad sa ikapulo sa gihapon nausab sa paglabay sa panahon. Sa ika-19 nga siglo, ang mga Santos kasagaran mohimo og mga donasyon nga dili kwarta, sama sa mga hayop o mga naani. Sugod sa Nauvoo, daghang mga Santos midonar og usa ka adlaw sa napulo aron motrabaho sa templo o ubang mga proyekto sa Simbahan. Ang mga buhatan sa Nauvoo ug sa Siyudad sa Salt Lake adunay opisina ug tugkaran nga nagsilbing mga dapit nga kabutangan sa gidonar nga mga butang, sama sa mga pasi o ugas, utanon, mga baligya [merchandise], sinapsap nga bato, kahoy pang-atop, ug kahayopan.11 Sa lagyo nga mga pamuy-anan, ang lokal nga mga balay-tipiganan sa mga bishop susama nga gigamit aron matipon ang mga kapanguhaan sa komunidad.12 Kon mokwenta sa tinuig nga ikanapulo sumala sa gilatid sa 1838 nga pinadayag, ang mga miyembro sa Simbahan usahay moihap sa mga butang sama sa pagsaka sa bili sa yuta isip kita tungod kay daghang tawo ang walay kinitaan nga sweldo. Sa ika-20 nga siglo, ang kwarta nga kinitaan ug mga donasyon nahimong mas komon.13 Sa tanan niini nga mga kausaban, ang ikapulo nagpabilin nga usa sa labing klaro nga mga paagi nga ang mga Santos sa Ulahing mga Adlaw makatuman sa sugo nga ipahinungod ang ilang kinabuhi ngadto sa buhat sa Dios. Karon, ang mga kwarta sa ikapulo gigamit, lakip sa uban pang mga butang, sa pagtukod og mga templo ug mga meetinghouse, pagsuporta sa pagsiksik alang sa family history, pagpaambit sa ebanghelyo ngadto sa uban, ug sa paghatag og serbisyo alang sa tawhanong kaayohan [humanitarian service].
May Kalabotan nga mga Hisgotanan: Pagpahinungod ug Pagkatinugyanan, Nagkahiusa nga Kompaniya (“Nagkahiusa nga Kapunongan”), Kirtland Safety Society