“Canada,” Mga Hisgutanan sa Kasaysayan sa Simbahan
“Canada”
Canada
Bisan sa wala pa ang unang gimantala nga mga kopya sa Basahon ni Mormon makompleto, si Solomon Chamberlin, usa ka nagbiyahe nga magsasangyaw, mibisita sa pamilyang Smith duol sa Palmyra, New York, human siya makadungog sa mga huhungihong mahitungod sa Basahon ni Mormon. Si Hyrum Smith midala ni Chamberlin ngadto sa opisina diin giimprinta ang basahon, ug si Chamberlin sa wala madugay mibiya padulong sa Upper Canada (karon mao ang Ontario) dala ang 64 nga giimprinta nga mga pahina sa Basahon ni Mormon ug misangyaw sa “tanan nga [iyang] nahibaloan kabahin sa Mormonismo.”1 Ang pagsangyaw ni Chamberlin didto sa Canada mao ang labing unang nahibaloan nga ehemplo sa pagsangyaw sa Basahon ni Mormon. Sa misunod nga dekada, daghang mga Santos sa Ulahing mga Adlaw—lakip ni Joseph Smith; sa iyang inahan, nga si Lucy; Oliver Cowdery; ug unom sa orihinal nga Napulog Duha ka mga Apostoles—mibiyahe ngadto sa Canada aron mosangyaw ug moatiman sa mga buluhaton sa Simbahan.2
Nagsangyaw duol sa Toronto niadtong 1836, si Parley P. Pratt nakakita og gamay nga grupo sa mga Kristiyano nga nangita og simbahan nga dunay “orihinal nga kayano” nga makita sa kasulatan.3 Daghang mga miyembro niana nga grupo, lakip nila ni John ug Leonora Taylor ug Joseph, Mary, ug Mercy Fielding, sa wala madugay gibunyagan, ug si Pratt miorganisar og pipila ka gagmay nga mga branch niana nga dapit.4 Paglabay sa usa ka tuig, sa diha nga sila si Apostol Heber C. Kimball ug Orson Hyde nagsugod sa pagsangyaw sa England, miapil nila si Joseph Fielding, John Goodson, Isaac Russell, ug John Snyder—ang tanan mga kinabig sa misyon ni Pratt didto sa Canada.5
Sugod niadtong 1847, daghan sa kapin sa 2,000 ka mga taga-Canada nga miapil sa Simbahan mibalhin ngadto sa kasadpang Estados Unidos uban sa kinabag-ang pundok sa mga Santos.6 Niadtong 1887, si Charles Ora Card, usa ka presidente sa stake sa Cache Valley, Utah, migiya sa gamay nga pundok sa mga Santos ngadto sa Lee Creek (unya nahimong Cardston), Alberta, diin sila nanimuyo.7 Daghan sa unang mga nanimuyo sa Habagatang Alberta, lakip ni Card ug sa iyang asawa nga si Zina Young Card, mga miyembro sa mga pamilya nga adunay daghang mga asawa. Human ang Kongreso sa U.S. mipasar sa Edmunds Act niadtong 1882, kini nga mga Santos sa Ulahing mga Adlaw namiligro nga mamultahan ug mabilanggo sa pagpadayon sa pagpuyo sa mga relasyon nga daghan og mga asawa. Isip resulta, pipila kanila mipili nga molangyaw ngadto sa Mexico ug Canada. Ang Alberta mitanyag og ekonomikanhong mga oportunidad ug luwas nga dapit gikan sa mga balaod batok sa daghang mga asawa sa Estados Unidos, bisan og ang mga lalaki nga daghan og asawa kinahanglan lang nga magdala og usa sa ilang mga asawa uban kanila ngadto sa Canada.8
Sobra sa misunod nga tulo ka dekada, ang mga Santos sa Ulahing mga Adlaw milangyaw ngadto sa Habagatang Alberta sa dinaghan. Niadtong 1895, ang unang stake nga naorganisar sa gawas sa Estados Unidos mao ang Cardston Alberta Stake, ug niadtong 1923, ang unang templo sa gawas sa Estados Unidos gitukod sa Cardston. Nianang higayuna, sobra sa 9,500 ka mga Santos sa Ulahing mga Adlaw ang nagpuyo sa gibana-bana nga 20 ka Mormon nga mga komunidad didto sa Alberta.9 Sa katapusan sa mga tuig sa 1970, ang mga stake ug mga misyon natukod sa matag teritoryo ug sa probinsya sa Canada.10 Pipila ka lumulupyo sa Canada nakaserbisyo isip mga General Authority ug Kinatibuk-ang mga Opisyales sa Simbahan, lakip sa mga sakop sa Unang Kapangulohan nga sila si Hugh B. Brown ug N. Eldon Tanner ug Kinatibuk-ang Presidente sa Relief Society nga si Elaine L. Jack. Pagka-2018, sobra sa 195,000 ka miyembro sa Simbahan ang nagpuyo sa nasud, uban sa dugang nga mga templo nga natukod o giplano alang sa Toronto, Halifax, Regina, Edmonton, Montreal, Vancouver, Calgary, ug Winnipeg.11