Mga Kausaban sa Basahon ni Mormon

Niadtong 1829, ang kawani ni Egbert B. Grandin sa Palmyra, New York, misugod sa produksiyon sa pag-imprinta sa Basahon ni Mormon. Alang sa unang mga edisyon sa mga basahon, ang mga tig-imprinta niadtong higayona kasagaran makadawat og sinuwat sa kamot nga mga manuskrito gikan sa mga tagsulat ug pinadala nga mga kausaban sa editoryal sama sa punctuation, espeling, ug gramatika samtang gi-set ang type. Alang niini nga proyekto, ang kaabag ni Joseph Smith ug tigsulat, si Oliver Cowdery, mimugna og kopya sa orihinal nga manuskrito aron magamit sa typesetter, si John Gilbert. Kini nga “manuskrito sa tig-imprinta,” sama sa orihinal, adunay gamay ra kaayo nga punctuation ug pipila ka dili pareha og espeling. Ang manuskrito sa tig-imprinta usab naglangkob og gamay lang nga mga kalainan nga may kalabotan ngadto sa orihinal nga manuskrito. Sa pag-typeset sa basahon, si Gilbert mibutang og mga pagbahin sa punctuation ug parapo. Ang unang edisyon sa Basahon ni Mormon walay pagnumero sa bersikulo.¹

Orihinal nga manuskrito nga pahina sa Basahon ni Mormon nga naglangkob sa teksto sa 1 Nephi 8:11–27.

Si Joseph Smith ug Oliver Cowdery miandam og ikaduha nga edisyon pagka-1837. Kini nga paagi sa pag-update sa Basahon ni Mormon nahisama kon giunsa sa mga tigmantala sa Biblia nianang higayona pagpalambo sa mga edisyon alang sa mga mambabasa sa Iningles. Ang mga tigmantala ug mga mambabasa komon nga nakasabot nga ang mga sayop sa produksyon mahimong wala tuyoa nga nahitabo atol sa pag-typeset sa bisan unsang basahon, mao nga ang mga tigmantala kasagaran mohatag og mga preface sa pagpasalig sa mga mambabasa sa ilang mga paningkamot sa pagbantay ug pag-usab sa bisan unsang dili managsama nga nabantayan sa nangaging mga edisyon.² Sobra sa duha ka bulan niadtong 1837, si Joseph ug Oliver mipagawas sa unang edisyon sa Basahon ni Mormon nga may susama nga mga intensiyon, mipaila sa sobra sa usa ka libo nga ginagmay nga mga koreksiyon sa ikaduhang edisyon ingon man usab sa diyotay nga importanteng mga pagpatin-aw. Sama pananglit, ilang gipahiangay ang mga pakisayran mahitungod ni Jesus diha sa 1 Nephi nga gisulat diha sa mga manuskrito ug sa 1830 nga edisyon isip “ang inahan sa Dios,” “ang Mahangtoron nga Amahan,” ug “ang Walay Kataposan nga Dios” ngadto sa “ang inahan sa Anak sa Dios” ug “ang Anak sa walay kataposan nga Dios,” sa tinagsa.³ Sa pasiuna nila ni Joseph ug Oliver mipahayag, “Ang mga indibidwal nga nasinati sa pag-imprinta sa basahon, nahibalo sa daghang sayop sa pamatik [typographical error] nga kanunay mahitabo sa mga edisyon sa manuskrito. [Kini nga teksto] mainampingon nga gi-eksamin pag-usab ug gitandi sa orihinal nga mga manuskrito, ni elder Joseph Smith, Jr. ang tighubad sa basahon ni Mormon, gitabangan sa kasamtangan nga tig-imprinta, si brother O. Cowdery.”⁴

Ang kataposan nga edisyon sa Basahon ni Mormon nga gidumala ni Joseph Smith mao ang ikatulo nga edisyon nga gimantala sa Cincinnati, Ohio, niadtong 1840. Ang buhat sa ikatulo nga edisyon nagsugod ni Ebenezer Robinson, kinsa migamit og kopya sa ikaduha nga edisyon nga adunay mga rebisyon nga gimarkahan sa lapis ni Joseph Smith.⁵ Usa sa importanteng kausaban diha sa ikatulo nga edisyon mikorihir sa pinulongan nga naghulagway sa mga Nephita isip usa ka “puti ug makapahimuot nga katawhan” ngadto sa “putli ug makapahimuot nga katawhan.” Tungod kay pipila ka umaabot nga mga edisyon sa Basahon ni Mormon nagbase sa ilang teksto sa ikaduha nga edisyon sa 1837, ang wala makorihii nga daghang pulong [verbiage] mipadayon hangtod ang 1981 nga edisyon mibalik sa teksto ngadto sa koreksiyon ni Joseph Smith niadtong 1840. Si Robinson migamit sa mga palid nga stereotype sa pag-andam sa ikatulo nga edisyon alang sa pagprinta. Kini nga teknolohiya mitugot alang sa daghang mga pag-imprinta, usa ka una alang sa Basahon ni Mormon. Uban sa stereotype nga mga palid nga anaa, si Joseph Smith mitratar sa basahon nga kapin o kulang nga luwas alang sa malantawan nga umaabot, ug iyang gideposito ang orihinal nga manuskrito sa Basahon ni Mormon diha sa bato sa pamag-ang sa Nauvoo House niadtong 1841.⁶

Sukad sa ikatulo nga edisyon niadtong 1840, ubang mga edisyon ug mga dinosena nga pagprinta og usab base sa 1837 ug sa 1841 nga European nga mga edisyon mipaila og ginagmay nga mga kausaban ngadto sa Basahon ni Mormon. Ang 1879 nga edisyon nga giandam ni Orson Pratt mipakita og mas mubo nga mga kapitulo ug ginumerohan nga mga bersikulo nga nagpabilin nga sumbanan sa tanang misunod nga mga edisyon.⁷ Ang 1920 nga edisyon nga giandam sa Komite sa mga Kasulatan sa Simbahan, usa ka grupo sa lima ka Apostoles nga gipangulohan ni George F. Richards, mipahiuyon sa mga ulohan sa mga basahon (sama sa Ikatulo nga Nephi ug Ikaupat nga Nephi) sulod sa Basahon ni Mormon, mitunga sa teksto ngadto sa duha ka kolum nga layout, ug midugang og mga summary sa kapitulo ug usa ka giya sa pagsulti [pronunciation].⁸

Bisan pa sa daghang cross-reference, ang 1920 nga edisyon gilahi gihapon og typeset gikan sa Iningles nga mga edisyon sa Biblia. Sa mga 1970, ang Scriptures Publication Committee [Komite sa Pagmantala sa mga Kasulatan] nga gipangulohan ni Elder Thomas S. Monson milusad og rebyo sa Biblia, Basahon ni Mormon, Doktrina ug mga Pakigsaad, ug Perlas nga Labing Bililhon aron sa pagpadayag og kompleto nga edisyon sa sumbanan nga mga buhat. Ang komite mikonsulta sa orihinal ug mga manuskrito sa tig-imprinta ug sa nangaging mga edisyon sa Basahon ni Mormon aron sa pag-ila ug pagsunod sa pamatik ug mga lainlain nga kahulogan sa pulong. Ang pipila ka sayop sa tawo nakorihian, sama sa straight nga nalibgan alang sa strait (mga pulong nga may susama og tingog apan lahi og mga gipasabot), ug formation sa manuskrito sa tig-imprinta nga na-typset og foundation diha sa 1 Nephi 13. Ang komite usab nakadiskobre og usab ug milakip sa mga rebisyon ni Joseph Smith sa 1840 nga edisyon. Ang 1981 nga edisyon mipailaila og bag-o nga layout sa sumbanan nga mga buhat ug mi-feature og gi-update nga mga cross-reference, mga pasiuna sa kapitulo, ug pakisayran nga mga gamit.⁹

Ang mga komite sa mga kasulatan sa 1920 ug sa mga 1970 mikonsulta sa buhat sa mga eskolar kinsa mieksamin sa tinubdan nga mga teksto ug miimprinta sa mga edisyon nga anaa sa ilang kaugalingong mga panahon. Ang mao nga scholarship gipaspasan pagka-1988 sa Book of Mormon Critical Text Project [Usa ka Proyekto nga Nagtutok sa Kritikal nga Teksto sa Basahon ni Mormon], sa kadugayan gipangulohan ni Royal Skousen, usa ka propesor sa pinulongan ug Iningles nga pinulongan sa Brigham Young University.¹⁰ Ang buhat ni Skousen sa pag-ila sa tanang kausaban sa tibuok nga mga teksto sa Basahon ni Mormon, ma-editoryal o dili tinuyo, miugkat sa nagkalain-laing mga sumbanan sa pagsulat diha sa mga manuskrito ug mga lain-lain sa giimprinta nga mga edisyon, nga maoy nagkapalambo sa scholarship diha sa teksto sa Basahon ni Mormon. Niadtong 2001, ang Joseph Smith Papers Project [Usa ka Proyekto sa tanang Sinulat ni Joseph Smith] misugod sa pagkolekta ug pagpresentar sa tanang nabilin nga mga papeles, lakip sa iyang mga kontribusyon ngadto sa Basahon ni Mormon. Ang moderno nga buhat sa pagtipig sa mga dukomento ug mga praktis sa dukomentaryo nga pag-edit niini nga proyekto nakapadayon sa pagtuon sa Basahon ni Mormon ug sa kasaysayan niini, gani nakapahimo nga maanaa ang mas daghang pagdokumento sa mga kausaban ngadto sa Basahon ni Mormon kaysa kaniadto.¹¹

Ang pisikal nga pagkadaot sa orihinal nga Iningles nga giimprinta sa 1981 nga edisyon miaghat sa dinalian nga produksyon sa bag-o nga edisyon. Ang miresulta nga 2013 nga edisyon nakapatarong sa nagpabilin nga walay kauyonan nga pamatik, sama sa pag-standardize pananglit sa first-born ngadto sa firstborn diha sa 2 Nephi 2, 4, ug 24, ug pagkorihir sa ginagmay nga mga sayop sa pamatik sama sa nahimo nga sama sa Dios ngadto sa nahimo nga sama sa dios diha sa Alma 12:31 ug sa mga katawhan ngadto sa sa katawhan diha sa Helaman 13:17.¹²

Ang mitungha nga digital nga mga teknolohiya nga pagmantala midala usab og bag-ong mga format alang sa digital nga publikasyon. Ang software mitanyag sa mga mambabasa sa pagpangita sa importanteng pulong, mga sumpay nga pakisayran, ug mga himan sa pag-marka sa kasulatan, ingon man usab sa mga opsiyon sa sobra sa gatosan nga pinulongan. Niadtong 2022, ang app sa Basahon sa Mormon nakadugang sa pag-uswag sa digital nga kagamitan, pagsumpay sa teksto ngadto sa multimedia ug ubang digital nga sulod ug paghatag og mga kasarang nga mapakigbahin dayon.

May Kalabotan nga mga Hilisgotan: Pag-imprinta ug Pagmantala sa Basahon ni Mormon