Brigham Young

Sayo nga Bahin sa Kinabuhi, Pagkakabig, ug Pagkaapostol

Si Brigham Young natawo sa Vermont niadtong 1801 nga ika-siyam sa 11 ka managsuon. Nagtubo siya sa pamilya nga namalhin og puloy-anan sa daghang higayon sa pagpangita og maayo nga panginabuhian. Ang iyang mga ginikanan miinsister sa estrikto nga pagsunod sa Biblia ug indibidwal nga kakugi sa matag usa sa ilang mga anak. Si Brigham mibiya sa ilang panimalay sa edad nga 16, duha ka tuig human mamatay ang iyang inahan tungod sa tibi. Gipasabut siya bahin sa Basahon ni Mormon human mamantala ang basahon pagka 1830 apan nagtuon sa ebanghelyo sulod sa duha ka tuig sa wala pa modawat sa bunyag. Dali siyang nakat-on sa pagsuporta sa propeta diha sa “pailub ug hugot nga pagtuo” (Doktrina ug mga Pakigsaad 21:5) human makadungog sa panan-awon ni Joseph Smith bahin sa mga ang-ang sa himaya, nga maingon nga sukwahi sa pagsabut ni Brigham mahitungod sa pagkabanhaw. Iyang gidawat ang pagpadayag ug midasig sa uban sa paghimo sa ingon.¹

Si Brigham mimartsa ngadto sa Missouri uban sa Kampo sa Israel (sa kadugayan gitawag nga “Kampo sa Zion”)² niadtong 1834, ug sa wala madugay human nabalik ang Kampo ngadto sa Kirtland, Ohio, gitawag siya sa pagserbisyo isip Apostol sa Kurom sa Napulog Duha. Pagka 1837, dihang pipila ka mga lider, lakip sa mga Apostoles, misalikway sa pagkalider ni Joseph Smith didto sa Kirtland, si Brigham mipundok og mga tigsuporta aron protektahan ang Simbahan ug paluyohan ang Propeta. Human si Thomas B. Marsh mibiya sa Napulog Duha, si Brigham mipuli ni Marsh isip presidente sa kurom ug milihok sa usa ka mahinungdanong katungdanan sa pagdala sa mga Santos ngadto sa dangpanan panahon sa mga pagpanggukod didto sa Missouri.³ Sa misunod nga tuig, si Brigham milakaw kuyog sa ubang mga Apostoles sa usa ka misyon ngadto sa Britain, diin siya mipasiugda og kahiusahan sa Kurom sa Napulog Duha ug mitabang sa pagdala og liboan ka mga kinabig ngadto sa Simbahan.

Didto sa Nauvoo, si Brigham mao ang usa sa mga unang nakadawat sa bag-ong gipadayag nga pagtuga sa templo.⁴ Human si Joseph Smith mitudlo kaniya mahitungod sa dinaghang kaminyoon, si Brigham, nga gihatagan og pagtugot sa iyang asawa nga si Mary Ann, nakigminyo ni Lucy Ann Decker pagka 1842.⁵ Sa sayong bahin sa 1844 miapil siya sa Konseho sa Kalim-an, usa ka grupo nga gitahasan sa pagpangita og mga bag-ong kapuy-an nga mga dapit nga kaadtoan sa mga Santos sa Ulahing mga Adlaw.⁶

Sa 1844, samtang nangampanya sa kandidatura ni Joseph Smith alang sa pagka presidente sa Estados Unidos, nahibaloan ni Brigham nga si Joseph ug si Hyrum gibuno.⁷ Migikan dayon siya aron moadto sa Nauvoo, miabut pagka Agosto ug nakigmiting sa ubang mga lider sa Simbahan aron pagsuta og paagi sa pagpadayon. Sa kinatibuk-ang miting sa mga Santos, iyang gisugyot nga ang Napulog Duha kinahanglan mangulo sa Simbahan isip usa ka korum, usa ka mosyon nga gipaluyohan halos sa tanan nga nagkapundok.⁸ Si Brigham usab mipasabut pag-ayo sa panginahanglan nga humanon ang Nauvoo Temple sa dili pa ang mga Santos mobiya sa siyudad. Human sa parsyal nga pag pagpahinungod niadtong Disyembre 1845, siya miasikaso sa buhat sa ordinansa sa liboan ka mga Santos sulod sa templo, kasagaran gipahigayon sulod sa tag-as ug makahago nga mga rotisyon [shift], sa wala pa mobiya sa siyudad padulong sa Kasadpan.⁹ Niadtong 1847 nakadawat siya og pagpadayag (sa kadugayan giaprobahan isip kasulatan ang Doktrina ug mga Pakigsaad 136) misubli sa pagpasabut unsaon sa mga lider pag-organisar sa exodo sa mga Santos ug migiya sa pasiunang kapundokan ngadto sa Walog sa Salt Lake sa samang tuig.¹⁰ Niana nga Disyembre, human mabalik gikan sa Iowa, si Brigham miorganisar sa Unang Kapangulohan didto sa Kanesville, Iowa, uban ni Heber C. Kimball ug Willard Richards isip iyang mga magtatambag.¹¹

Ang pinakaunang nailhan nga hulagay ni Brigham Young, circa 1845.

Propeta sa Prontera [bag-ong kaplag nga dapit nga katukoran og komunidad sa kamingawan]

Ubos sa pangdumala ni Brigham Young, ang mga Santos nagtinabangay sa pagtukod og mga komunidad sa dili kabisado nga kayutaan sa Great Basin .¹² Sa pagpahaum sa mga kahimtang sa ilang palibut, ang mga Santos mipalig-on sa ilang pasalig ngadto sa talagsaon, makiusa nga kultura, milahutay sa kagutom, ug mipundar og daghang mga komunidad buyon sa dakong wanang gikan sa Mexico ug sa habagatang California hangtod sa Idaho ug Canada. Si Brigham nagpakita og dili hitupngan nga panglantaw alang sa pag-organisar og mga komunidad, pag sustiner sa walay hunong nga kausaban nga ekonomiya sa prontera, ug pagpahiluna sa kanunay nga pagdagsang sa mga langyaw. Sa tanan niini, nagpabilin ang iyang pagtutok sa makapahiusa nga tumong sa pagtukod sa Zion.¹³ “Kanunayng anaa sa akong panglantaw ang Zion,” miingon siya. “Dili ta maghuwat og mga anghel, o ni Enoch ug sa iyang mga kauban aron moanhi og motukod sa Zion, apan kita ang motukod niini.”¹⁴ Bisan tuod direkta siyang manulti ug hait usahay, ang iyang isig ka mga Santos nahinumdom kaniya nga usa ka hikutado, minahal nga lider kinsa nagpakabana sa ilang mga kaikag [interest].¹⁵

Si Brigham naglaum sa pagpasiugda og kalinaw uban sa mga grupo sa Amerikano nga mga Indian sa rehiyon. Usahay, hinuon, ang mga Santos sa Ulahing mga Adlaw nakig away kanila, ug si Brigham mipadayag og pagmahay nga nahitabo kini nga mga kagubot.¹⁶ Nangalagad siya isip Territorial Governor sa Utah pagka 1857–58 sa dihang ang gobiyerno sa Estados Unidos mipadala og mga tropa aron sa pag-undang sa gituohang pagkamalapason sa balaod sa mga Santos sa Ulahing mga Adlaw sa Utah.¹⁷ Panahon sa kagubot nga unang nahitabo sa wala pa miabut ang mga sundalo sa Estados Unidos, ang ubang mga Santos sa Ulahing mga Adlaw mimasaker og grupo sa mga migrante nga miagi sa Teritoryo sa Utah didto sa Mountain Meadows.¹⁸ Bisan tuod ang makasilaob sa kasuko nga mga pamahayag nga iyang gipamulong ug sa ubang mga lider tingali nakaaghat sa klima sa kalagot nga nagtulod sa maong trahedya, si Brigham mipahimangno sa mga Santos nga pasagdan lang ang mga migrante.¹⁹

Bisan kon ang iyang atensyon sa kasagaran nakatutok sa mga panglimbasog sa mga Santos sa Utah, si Brigham Young nagmanggihunahunaon sa iyang propetikanhong katungdanan sa kalibutan. Miisyu siya og mga tawag sa mga misyonaryo sa pagserbisyo ngadto sa mga kontinente sa Uropa, Africa, Asya, ug Habagatang Amerika.²⁰ Sa wala pa ang iyang kamatayon, tanan o halos tanan sa Basahon ni Mormon gimantala na sa Danish, French, Welsh, German, Italyano, Hawaiian, Swedish, ug Espanyol. Si Brigham misagubang labaw pa sa ubang piho nga mga babag sa kultura sa maong panahon samtang mitabang siya sa mga migrante gikan sa nagkalain-laing mga grupo sa etniko ug pinulongan aron mapundok ngadto sa Teritoryo sa Utah ug makaestablisar og mga panimalay kauban sa ilang mga isig ka Santos.²¹

Hulagway ni Brigham Young sa Utah, circa 1870.

Kinabuhi sa Pamilya

Si Brigham Young naminyo sa iyang unang asawa, si Miriam Works, sa New York niadtong 1824. Pipila ka bulan ang milabay human silang duha nabunyagan, si Miriam namatay tungod sa sakit nga tibi. Ang ikaduhang asawa ni Brigham, si Mary Ann Angell, mitabang sa pagpadako sa mga anak ni Miriam ug sa iya usab mismong mga anak, miatiman sa ilang panimalay nga nag-inusara panahon sa sagad nga paglakaw ni Brigham sa iyang mga misyon, ug midawat sa dinaghan nga kaminyoon sa dihang gipahibalo siya sa maong baruganan.

Bisan kon sa una may pagduha-duha, si Brigham Young dali rang nahimo nga lig-ong tiglaban sa buhat sa dinaghang kaminyoon. Sa hinapos na sa iyang kinabuhi, si Brigham nailhan sa kadaghanan isip amahan sa dako kaayong dinaghan nga pamilya. Nasilyo siya sa sobra sa 50 ka babaye, daghan kanila apan dili tanan nagpuyo uban kaniya. Ang uban sagad nakasabut nga ang ilang pagkasilyo ngadto ni Brigham isip adunay espiritwal kay sa ikauban sa panimalay nga kahulogan. Si Brigham ug ang 16 sa iyang asawa adunay 56 ka anak. Isip mga ginikanan, nakaugmad sila og bag-ong mga tradisyon sa pagdumala sa dako nga pamilya.²² Duha sa iyang mga asawa sa kaulahian mga Kinatibuk-ang Presidente sa Relief Society: Si Eliza R. Snow ug si Zina D. Huntington Jacobs.²³ Daghan sa mga anak ni Brigham, ingon man ang mga ilo nga gisagop sa pamilya, mirekord sa halandumong mga panumdoman sa iyang presensya isip amahan ug impluwensya sa ilang mga kinabuhi.

Litrato sa 8 ka asawa ni Brigham Young ug 16 sa iyang anak nga mga babaye, circa 1893.

Mga Kausaban sa Organisasyon sa Simbahan

Atol sa katapusang dekada sa iyang kinabuhi, si Brigham Young mipresentar og daghang mga kausaban sa organisasyon sa Simbahan. Niadtong 1867 si Brigham mihangyo sa mga kababayen-an nga buhion pag-usab ang Relief Society ug molunsad og mga grupo sa matag ward. Sa samang tuig, miorganisar siya og general board nga moasikaso sa lokal nga mga Sunday School. Niadtong 1869, inabagan sa iyang mga asawa ug mga anak nga mga babaye, mipasiugda siya og usa ka kalihokan sa pagdaginot, nga sa wala madugay miresulta sa pagkamugna sa usa ka mas dako nga organisasyon alang sa mga young women.²⁴ Ang kalamboan sa Salt Lake Temple nagpadayon sa hinay-hinay, ug sa mga 1870 mihatag siya og direksyon sa pagpanday sa templo sa St. George ug nagplano og ubang mga templo alang sa Manti ug sa Logan.²⁵ Samtang ang templo sa St. George hapit na mahuman pagka 1877, si Brigham mitrabaho aron masulat ang mga ordinansa sa templo sa unang higayon aron masiguro nga ang buhat sa templo magpadayon human sa iyang kamatayon sama sa iyang gilantaw. Uban sa iyang katapusang mga buhat isip Presidente sa Simbahan, si Brigham Young mihan-ay sa mga katungdanan ug mga relasyon sa mga korum sa pagkapari ug mipahinungod sa templo sa St George. Namatay siya niadtong Agosto 29, 1877, sa edad nga 76 anyos.

May Kalabutan nga mga Hisgutanan: Susa Young Gates, Zina D. H. Jacobs Young, Eliza R. Snow, Pioneer Trek, Pioneer Settlements, Salt Lake Temple, United Orders, Cooperative Movement, Mountain Meadows Massacre, Utah War, Reformation of 1856–1857, Succession of Church Leadership, Anointed Quorum (“Holy Order”), Council of Fifty, Departure from Nauvoo, Gift of Tongues, Plural Marriage in Utah, Quorum of the Twelve, Adjustments to Priesthood Organization, Emigration, Temple Building, Railroad, Deseret Alphabet, Retrenchment