Hubad sa Basahon ni Mormon

Gihubad ni Joseph Smith ang karaan nga teksto “pinaagi sa gasa ug gahum sa Dios” aron sa pagpagawas sa Basahon ni Mormon. Ang iyang unang gitrabaho nga hubad, uban ni Emma Smith ug Martin Harris nga nagsilbi isip nga nag-unang mga eskriba, nawala niadtong 1828. Hapit ang tanan nga kasamtangang teksto sa Basahon ni Mormon nahubad sulod sa tulo ka bulan taliwala sa Abril ug Hunyo 1829 uban ni Oliver Cowdery isip ang tigsulat. Daghan ang nahibaloan bahin sa paggawas sa Ingles nga teksto sa Basahon ni Mormon pinaagi sa makuti nga pagtuon sa mga pamahayag nga gihimo ni Joseph Smith, sa iyang mga eskriba, ug sa uban nga suod nga kaubanan sa paghubad sa Basahon ni Mormon.

gilitratuhan gikan sa reenactment sa pelikula, si Joseph ug Oliver nag-atbang nga naglingkod diha sa lamesa, si Oliver nagsulat

Si Joseph Smith naghubad sa Basahon ni Mormon, nagdiktar sa teksto ngadto sa iyang eskriba nga si Oliver Cowdery.

Ang manuskrito nga gidiktar ni Joseph Smith ngadto kang Oliver Cowdery ug sa uban naila karon isip ang orihinal nga manuskrito, mga 28 porsyento niini anaa lang gihapon. Kini nga manuskrito misuporta sa pamahayag ni Joseph nga siya midiktar sa teksto gikan sa laing pinulongan sulod lang sa hamubo nga panahon. Pananglitan, naglakip kini sa mga sayop nga nagsugyot nga ang tigsulat nasayop sa pagpaminaw kay sa sayop nga pagkabasa sa mga pulong nga gikopya gikan sa laing manuskrito. Agi og dugang, pipila sa mga gramatikanhon nga pagkahan-ay daghan ang matang nga duol ra sa mga pinulongan sa Silangang bahin kay sa Iningles ang makita diha sa orihinal nga manuskrito, nagsugyot nga ang sukaranan nga pinulongan sa hubad dili Iningles.¹

Si Joseph ug ang iyang mga eskriba nagsulat gamit ang duha ka instrumento sa paghubad sa Basahon ni Mormon. Usa sa instrumento, gitawag diha sa Basahon ni Mormon nga ang “mga tighubad,” nga mas naila sa mga Santos sa Ulahing mga Adlaw karon isip ang “Urim ug Thummim.” Nakaplagan ni Joseph ang mga tighubad nga gilubong didto sa bungtod kauban sa mga palid. Ang laing instrumento, nga nadiskubrihan ni Joseph diha sa yuta mga tuig na sa wala pa makuha ang mga palid, mao ang usa ka gamay nga oblong nga bato, o “bato sa manalagna.” Isip usa ka batan-on panahon sa mga 1820, si Joseph, sama sa uban sa iyang panahon, migamit sa bato sa manalagna sa pagpangita sa mga nawala nga mga butang ug gilubong nga mga bahandi. Sa dihang mas nasabtan na niya ang iyang propetikanhong tawag, nahibaloan niya nga magamit niya kining bato alang sa mas taas nga katuyoan sa paghubad sa kasulatan.²

Ang mga eskriba ug ang uban nga nag-obserbar sa hubad nagbilin og mga saysay nga naghatag og mga panabut sa proseso. Ang pipila sa mga saysay nagpakita nga gitun-an ni Joseph ang mga titik diha sa mga palid. Kadaghanan sa mga saysay namulong bahin sa paggamit ni Joseph sa mga tighubad o bato sa manalagna. Sumala niini nga mga saysay, gibutang ni Joseph ang mga tighubad o bato sa manalagna sulod sa usa ka kalo, idul-it ang iyang nawong ngadto sa kalo aron masampungan ang molusot nga kahayag, ug isulti og kusog ang Iningles nga mga pulong nga nakita diha sa instrumento. Ang proseso sumala sa gihulagway makapahinumdom sa usa ka tudling gikan sa Basahon ni Mormon nga namulong nga ang Dios nag-andam og “usa ka bato, diin mohayag diha sa kangitngit ngadto sa kahayag.”³

Ang mga eskriba nga miabag sa paghubad walay pagduhaduha nga mituo nga si Joseph mihubad pinaagi sa balaanong gahum. Ang asawa ni Joseph nga si Emma mituo nga ang teksto sa Basahon ni Mormon lapas na kaayo sa abilidad sa iyang bana sa pagsulat. Mipamatuod si Oliver Cowdery ubos sa panumpa niadtong 1831 nga si Joseph “nakita nga anaa ang mga palid, diin siya mihubad sa iyang basahon, sa duha ka sihag nga mga bato, nga parehas sa bildo, nga gipahimutang og duha ka bayanan. Nga pinaagi sa pagtan-aw niini, mabasa niya ngadto sa Iningles, ang mga nareporma nga mga Ehiptuhanon nga mga titik, nga gikulit diha sa mga palid.”⁴

Ang mga pangutana nga mitumaw atol sa proseso sa paghubad misangpot ngadto sa daghang mga nag-unang mga pagpadayag nga karon narekord sa Doktrina ug mga Pakigsaad ug sa mga dagkong panghitabo sama sa pagpahiuli sa priesthood. Ang hubad ug pagmantala sa Basahon ni Mormon daling gisundan sa pag-organisar sa Simbahan niadtong tingpamulak sa 1830.

Mga Kapanguhaan sa Simbahan

“Book of Mormon Translation,” Mga Hisgutanan sa Ebanghelyo, topics.lds.org.

“The Gold Plates and the Translation of the Book of Mormon,” josephsmithpapers.org.

Royal Skousen ug Robin Scott Jensen, eds., Revelations and Translations, Volume 3, Part 1: Printer’s Manuscript of the Book of Mormon, 1 Nephi 1–Alma 35, facsimile ed., vol. 3 sa ang Revelations and Translations nga mga serye sa The Joseph Smith Papers, eds. Ronald K. Esplin ug Matthew J. Grow (Siyudad sa Salt Lake: Church Historian’s Press, 2015).

Royal Skousen ug Robin Scott Jensen, eds., Revelations and Translations, Volume 3, Part 2: Printer’s Manuscript of the Book of Mormon, Alma 36–Moroni 10, facsimile ed., vol. 3 sa ang Revelations and Translations nga mga serye sa The Joseph Smith Papers, eds. Ronald K. Esplin ug Matthew J. Grow (Siyudad sa Salt Lake: Church Historian’s Press, 2015).

Bibliograpiya

Ang mosunod nga pagmantala naghatag og dugang impormasyon kabahin niining hisgutanan. Pinaagi sa pag-refer o pag-link nimo ngadto niining kapanguhaan, wala kami mag-endorso o mogarantiya sa sulod o sa mga panglantaw sa tagsulat.

John W. Welch, “The Miraculous Translation of the Book of Mormon,” sa John W. Welch ug Erick B. Carlson, eds., Opening the Heavens: Accounts of Divine Manifestations, 1820–1844 (Provo, Utah: Brigham Young University Press, 2005), 76–213.

May kalabutan nga Hisgutanan: Seer Stones, Printing and Publishing the Book of Mormon, Ang pagkonsulta ni Martin Harris sa mga Iskolar, Joseph Smith Translation of the Bible [Hubad ni Joseph Smith sa Biblia], Book of Abraham Translation [Hubad sa Basahon ni Abraham], Joseph Smith Jr., Mga Saksi sa Basahon ni Mormon

Mubo nga mga sulat

1. Pananglitan, sa dihang si Joseph mihubad sa teksto nga naa karon sa 1 Nephi 13:29, ang eskriba misulat “&” sa usa ka dapit diin gisulat unta niya ang “usa ka.” Sa 1 Nephi 17:48, ang eskriba misulat og “weed” diin ang iya unta nga isulat kay “reed” (Royal Skousen, “Translating the Book of Mormon: Evidence from the Original Manuscript,” sa Noel B. Reynolds, ed., Book of Mormon Authorship Revisited: The Evidence for Ancient Origins [Provo, Utah: Foundation for Ancient Research and Mormon Studies, 1997], 67; tan-awa usab sa Grant Hardy, “Introduction,” sa The Book of Mormon: The Earliest Text, ed. Royal Skousen [New Haven, Conn.: Yale University Press, 2009], xv–xix).

2. Sumala ni Martin Harris, usa ka anghel ang misugo ni Joseph Smith sa paghunong niining mga kalihokan, nga iyang gihimo pagka 1826. Wala itago ni Joseph ang ilang pagka-ilado sauna sa pagkalambigit sa pagpangita og bahandi. Niadtong 1838, gimantala niya ang mga tubag sa mga kanunayng gipangutana ngadto kaniya. “Dili ba si Jo Smith usa ka tigpanapi,” mabasa ang usa ka pangutana. “Oo,” mitubag si Joseph, “apan dili kaayo kadto mapuslanon nga trabaho ngadto niya, tungod kay tag katorse dolyares ra ang bulan niini” (“Elders’ Journal, vol. 1, nu. 3, Hulyo 1838,” 43, josephsmithpapers.org; tan-awa usab sa Richard L. Bushman, Joseph Smith and the Beginnings of Mormonism [Urbana: University of Illinois Press, 1984], 64–76; Alan Taylor, “The Early Republic’s Supernatural Economy: Treasure Seeking in the American Northeast, 1780–1830,” American Quarterly, vol. 38, nu. 1 [Tingpamulak sa 1986], 6–34; Mark Ashurst-McGee, “A Pathway to Prophethood: Joseph Smith Junior as Rodsman, Village Seer, and Judeo-Christian Prophet” [master’s thesis, Utah State University, 2000]).

3. Alma 37:23. Tingali si Joseph Smith nanag-iya og sobra sa usa ka bato sa manalagna; mora og aduna pa siyay nakaplagang usa sa mga bato sa mga 1822 samtang nagkalot para sa tabay (Bushman, Joseph Smith and the Beginnings of Mormonism, 69–70).

4. A. W. B., “Mormonites,” Evangelical Magazine and Gospel Advocate, vol. 2 (Abr. 19, 1831), 120; Joseph Smith III, “Last Testimony of Sister Emma,” Saints’ Herald, vol. 26, nu. 19 (Okt. 1, 1879), 1–2.