Family History ug Genealogy

Ang interes ug pasalig sa mga Santos sa Ulahing mga Adlaw ngadto sa pagsiksik sa family history migawas gikan sa daghang importanting mga panghitabo sa nag-unang kasaysayan sa Simbahan. Sa panahon sa unang pagkakita ni Joseph Smith ni anghel Moroni kaniadtong 1823, gisultihan siya nga ang Ginoo “motanom diha sa mga kasingkasing sa mga anak sa mga saad nga gihimo ngadto sa mga amahan, ug ang mga kasingkasing sa mga anak mobati sa ilang mga amahan.”¹ Sa Nauvoo, Illinois, sayo sa mga 1840, gitudlo ni Joseph nga ang katumanan niini nga panagna nagkinahanglan sa pagpahigayon sa makaluwas nga mga ordinansa alang sa mga paryente nga nangamatay.² Kini naglakip sa pagpuli [proxy] nga mga pagbunyag ug mga pagkumpirma ug pagbugkos sa mga sakop sa pamilya, nagpatunhay sa ilang bililhong mga relasyon ngadto sa sunod nga kinabuhi. Ang mga Santos madasigon nga misugod sa pag-apil niini nga mga ordinansa.³

Sa una, ang mga miyembro sa Simbahan sa kasagaran gibugkos ngadto sa ilang labing duol nga mga katigulangan o ngadto sa importanting mga lider sa Simbahan isip “sinagop” nga kabanay.⁴ Kaniadtong 1894, si Presidente Wilford Woodruff mi-anunsiyo nga ang mga Santos sa Ulahing mga Adlaw kinahanglan nga magsiksik sa ilang mga family history ug sa pagdala sa mga ngalan sa ilang mga katigulangan ngadto sa templo aron ang mga pamilya mabugkos. “Gusto namo nga sukad niini nga panahon ang mga Santos sa Ulahing mga adlaw mosubay sa ilang mga genealogy kutob nga sila makahimo,” gitudlo niya sa kinatibuk-ang komperensiya, “ug magpabugkos ngadto sa ilang mga amahan ug mga inahan. Ipabugkos ang mga anak ngadto sa ilang mga ginikanan, ug ipadayon kining kutay kutob sa inyong maabot.”⁵ Ang mga templo nahimong mas nabantog ug kasagarang bahin sa pagsimba sa Santos sa Ulahing mga Adlaw samtang ang mga miyembro sa Simbahan naghugop ngadto niini sa pagpahigayon og pagpuli nga buhat alang sa ilang namatay nga mga sakop sa pamilya.⁶

Ang Kapunongan sa Genealogy

Kaniadtong 1895, ang Unang Kapangulohan ug ang Korum sa Napulog Duha ka Apostoles miuyon sa pagpaapil sa Kapunongan sa Genealogy sa Utah (usa ka institusyon nga ang Simbahan sa wala madugay misagop isip ang Family History Department [Departamento sa Family History] sa 1987).⁷ Si Joseph Fielding Smith, usa ka unang lider sa kapunongan ug sa kadugayan ang presidente niini, mipatuman og sistema sa pagkolekta ug pagtipig sa mga rekord gikan sa iyang mga pagsiksik sa mga librariya ug mga kapunongan sa genealogy sa amihanang-silangan sa Estados Unidos.⁸ Samtang ang mga pagpadagan sa Kapunongan sa Genealogy nagkadako, ang maunungong genealogist nga si Susa Young Gates mitukod og sistema sa paglista sa tanang mga ngalan ug impormasyon nga masubay ang mga rekord sa kada templo. Sayo sa ika-20 nga siglo, gitrabaho niya ang pagpalambo sa genealogy pinaagi sa pagsulat og mga artikulo, pagtudlo og mga klase, pag-awhag sa paglakip og genealogical nga edukasyon sa Relief Society, ug pagserbisyo isip presidente sa Daughters of the Utah Pioneers [Anak nga mga Babaye sa mga Pioneer sa Utah].⁹ Sila si Susa Young Gates ug Joseph Fielding Smith mitrabaho og mga komitiba nga mihatag og mga magasin ug mga klase sa pagtudlo sa kinatibuk-ang publiko sa pagkolekta og mga rekord sa katigulangan ug sa paggamit sa mga koleksiyon sa librariya.¹⁰

Opisina sa Kapunongan sa Genealogy sa Utah sa wala pay 1917.

Gikan sa Genealogy ngadto sa Family History

Atol sa ika-20 nga siglo, ang mga Santos sa Ulahing mga Adlaw gipalapad ang paggamit sa mga rekord sa genealogy. Sa 1938, usa sila sa unang naggamit og microfilming (paglitrato sa orihinal nga dokumento) nga teknolohiya sa pagpatunhay sa mga rekord. Ang mga kawani sa Kapunongan sa Genealogy ug sa wala madugay ang Family History Department nakigbuligay sa mga tipiganan og importanting karaan nga mga dokumento, mga simbahan, estado ug mga gobyerno sa county (probinsya), ug ubang mga institusyon sa paglitrato og mga rekord sa microfilm, nagkuha og mga 150 milyon ka mga pahina sa mga rekord sa pagka-1954 ug nagpasaka ngadto sa gidaghanon nga 130 milyon ka paglitrato kada tuig sa pagka-1992.¹¹ Sa 1969, ang Simbahan mihimo sa unang tibuok kalibotan nga komperensiya sa genealogy sa Siyudad sa Salt Lake nga tumong ang pagbansay sa nagsugod nga bag-ong mga tigsiksik ug sa paghiusa sa mga institusyon sa pakigbuligay sa pagpatunhay ug paggamit sa rekord.¹² Ang pagtambong sa ikaduhang World Conferene on Records [Tibuok Kalibotan nga Komperensiya Mahitungod sa mga Rekord] sa 1980 sobra pang midoble, sa laing bahin tungod sa nagtubo nga interes sa publiko sa genealogy human sa nag-unang mga serye sa telebisyon sa 1977 nga Roots, gibase sa libro ni Alex Haley nga sama og ulohan. Nadawat ni Haley ang doctorate nga pasidungog gikan sa Brigham Young University ug inabagan sa mga lider sa Simbahan sa pagpasiugda sa World Conference on Records ug pagsiksik sa family history sa kinatibuk-an.¹³

Sulod sa Granite Mountain Records Vault, diin ang minilyong mga rekord nga gi-microfilm gipatunhay.

Sa mga 1980, ang mga miyembro sa Simbahan giatubang ang dako kaayo nga paningkamot sa pagpundok ug pagrekord sa ilang mga family history balik gikan sa dili mominos sa tulo ka henerasyon.¹⁴ Nagtubo nga interes sa mga family history midasig sa pagtipig og rekord nga naglakip og lapas pa sa genealogical nga impormasyon. Sa 1987, giusab sa mga lider sa Simbahan ang ngalan sa Genealogical Department isip ang Family History Department, usa ka ulohan nga tuyo sa pagdani sa tanan sa pag-apil. “Ang pag-ilis ngadto sa ‘family history,’” miingon si Presidente Boyd K. Packer, “mohimo sa trabaho nga dili kaayo sa hinanas nga paagi ug mas madanihon. … Ang ingon ka sagradong family history importante ngadto sa mga ordinansa sa templo.”¹⁵

Mga Bag-ong Pamaagi ug mga Pakigbuligay

Sa 1999, ang Simbahan mipasiugda sa FamilySearch.org, usa ka website ug database [mga impormasyon nga anaa sa computer nga magamit dayon] alang sa pagsisik sa famiy history nga nagsubay usab sa buhat sa pagpuli nga ordinansa alang sa mga patay. Ang pagtukod diha sa pundasyon sa 60 ka tuig nga paglitrato sa mga rekord, ang FamilySearchg.org mihatag og agianan ngadto sa labaw pa kay sa duha ka bilyon nga mga litrato sulod sa duha ka dekada sa pagsugod niini.¹⁶ Ang FamilySearch Indexing misugod sa 2006, nga mihimo sa mga bulontaryong mga tiggamit sa pagtan-aw ug pagsulat sa makasaysayanong mga dokumento aron sa pagtabang sa mga tigsiksik.¹⁷ Ang ubang mga paningkamot sa pagpauswag sa pagsiksik sa family history alang sa kinatibuk-ang publiko natapos sa pagtukod og liboan ka sentro sa family history, mga pakigbuligay uban sa mga tipiganan og mga karaang mga dokumento sa rehiyon ug nasod sa pagpakaylap sa paggamit sa mga rekord, ug, sa 2011, sa unang RootsTech––ang labing dako nga katiguman sa family history.¹⁸

Dakong balay tigumanan alang sa RootsTech kaniadtong Pebrero 2021.

Ang Simbahan nagpabilin diha sa pangunahan sa pagsiksik sa family history. Ang mga paningkamot sa mga miyembro sa Simbahan sa pag-apil sa tulo ka henerasyong proyekto ug sa paghatag og pagpuli nga mga ordinansa alang sa ilang mga katigulangan, inubanan sa dugay na nga mga paninguha sa pagpatunhay ug sa pagpakigbahin sa mga rekord gikan sa tibuok kalibotan, mihimo sa serbisyo sa kadaghanan, pagbinuligay nga Family Tree diha sa FamilySearch.org kaniadtong 2013. Si Presidente Russell M. Nelson mipahayag nga ang maong hiniusa nga mga buluhaton mipauswag sa tumong sa “pag-organisar sa family tree sa tanang mga anak sa Dios.”¹⁹

Kalabot nga mga Hisgotanan: Bunyag alang sa mga Patay, Pagbugkos, Pagtukod og Templo, Nauvoo Temple, Salt Lake Temple