“Indian nga Pagkaulipon ug Kasabutan sa Pag-alagad,” Mga Hisgutanan sa Kasaysayan sa Simbahan
“Indian nga Pagkaulipon ug Kasabutan sa Pag-alagad”
Indian nga Pagkaulipon ug Kasabutan sa Pag-alagad
Sulod sa daghang mga katuigan sa wala pa ang mga pioneer nga Santos sa Ulahing mga Adlaw miabut sa Walog sa Salt Lake kaniadtong 1847, ang mga American Indian diha sa rehiyon mibaligya og mga babaye ug mga bata nga nadakpan gikan sa karibal nga mga pundok. Ang puti nga mga Amerikano ug taga Uropa nga mga magpapatigayon nakabaton ug nakabaligya usab og mga dinakpang American Indian isip mga ulipon o may kasabutan nga mga sulugoon, nagtukod og negosyo sa pamalit-pamaligya og ulipon didto sa Kasadpan.1 Sulod sa mga semana sa pagsulod sa walog, nakabangga ang mga Santos og mga tribong Indian kinsa nakadakop og mga bata gikan sa lain nga mga grupo. Pipila sa mga Santos mipalit og mga bata nga Indian gikan niining mga negosyante og ulipon, sa pipila ka mga higayon human makakita sa mga negosyante nga mipatay o mipasakit niadtong wala palita sa mga Santos sa Ulahing mga Adlaw.2 Mga pioneer nga pamilya misagop ug misulay sa pag-ipon niining mga bata ngadto sa mga komunidad sa mga Santos sa Ulahing mga adlaw, bisan pa sa mga kalainan sa kultura ug ngil-ad nga pagtagad sa kaliwatan [racial prejudice]. Ang uban mipahimulos ug midagmal niining mga batang Indian.
Sa Marso 1852 ang magbabalaod sa Teritoryo sa Utah mipasaka og “Balaod alang sa Kahupayan sa mga Indian nga Ulipon ug mga Binilanggo,” usa ka balaod nga naghan-ay sa pagbaton ug pag-amuma sa mga batang Indian. Ang mga bata mahimong may kasabutan isip mga sulugoon sa panimalay kutob ngadto sa 20 ka mga tuig, apan kadtong kinsa nakabaton og mga sulugoon gikinahanglan nga magproseso og usa ka kasabutan sa pag-alagad uban sa mga opisyal sa distrito, sa pagsinina sa mga bata “sa komportable ug maayo nga paagi,”ug sa pagpa-edukar kanila.3 Gitan-aw ni Brigham Young ang balaod nga usa ka positibong pagbungkag sa negosyo sa pamalit-pamaligya sa ulipon nga Indian; kay sa paliton ang mga dinakpan ngadto sa pagkaulipon, mituo si Young nga ang mga Santos sa Ulahing mga Adlaw “nagpalit kanila ngadto sa kagawasan.”4
Sobra sa 400 ka mga batang Indian gikan sa mga komunidad sa Ute, Paiute, Goshute, Soshone, ug Navajo ang gidala ngadto sa mga panimalay sa mga Santos sa Ulahing mga Adlaw isip mga sulugoong may kasabutan o mga sinagop tali sa pagpasar sa balaod sa 1852 ug sa sayo sa mga 1880.5 Mga 60 porsyento gipalit pinaagi sa pamalit-pamaligya sa mga tigsulong. Ang pipila nailo sa mga ginikanan pinaagi sa mapintas nga panag-away tali sa mga Indian ug sa mga Santos sa Ulahing mga Adlaw o ubang mga Euro-Amerikano. Duol sa 20 porsyento ang gibaligya o gihatag ngadto sa mga pamilya sa mga Santos sa Ulahing mga Adlaw pinaagi sa mga ginikanan o mga paryente, kinsa mibuhat sa mao tungod sa ekonomikanhong panginahanglan ug sa mga paglaum alang sa labing kaayohan sa mga bata. Samtang ang may kasabutan nga mga bata nahamtong, daghan ang nakigbisog sa paghinumdom sa ilang gigikanang mga pamilya, samtang ang uban mibalik ngadto sa mga komunidad sa Indian isip mga batan-on o nagkahamtong. Ang uban mipabilin diha sa puti nga mga komunidad, bisan og sila mibati nga gipakaubos. Gani ang uban nahimong mga misyonaryo ug mga pangulo sa Simbahan isip mga hamtong.6
Duol sa katapusan sa Gubat Sibil sa Amerikano, gipasaka sa Kongreso sa Estados Unidos ang Ikanapulog Tulo nga Kausaban sa Batakang Balaod, nga misalikway sa pagkaulipon ug pinugos nga pag-alagad. Sa kasadpang Estados Unidos, ang paghimo og kasabutan mipadayon, apan ang bag-ong pederal nga mga balaod mipakunhod sa gidaghanon sa bag-ong paghimo og mga kasabutan. Samtang ang gobyerno mipatuman niini nga mga balaod ug gipauswag ang pagpapuyo sa mga nasud nga Indian ngadto sa mga dapit nga giandam alang kanila, ang sistema sa kasabutan sa Utah mikunhod ug sa mga hinapos sa 1870 sa kinatibuk-an natapos.7