Kasaysayan sa Simbahan
Far West


“Far West,” Mga Hisgutanan sa Kasaysayan sa Simbahan

“Far West”

Far West

Niadtong 1836, tulo ka tuig human ang mga Santos sa Ulahing mga Adlaw gipapahawa gikan sa Distrito sa Jackson, ang lehislatura sa Missouri mimugna sa Distrito sa Caldwell, usa ka bag-ong distrito sa parte sa estado nga gamay ra og namuyo, nga gituyo nila nga kapuy-an sa mga Santos sa Ulahing mga Adlaw. Ang mga Santos namalit og yuta didto ug misugod sa pagtukod og usa ka siyudad nga gitawag og Far West.1 Niadtong Abril 1838, ang Ginoo mipadayag kang Joseph Smith nga ang Far West mahimong “usa ka balaan ug gipahinungod nga yuta” samtang ang mga Santos magpundok didto aron magtukod og templo ug mosimba Kaniya.2

Gikan sa ulahing bahin sa 1836 hangtud sa 1839, miabut og lima ka libo ka mga Santos ang miestablisar og mga panimalay diha ug libut sa Far West, nga maoy nagsilbing punoang buhatan sa Simbahan human miabut si Joseph Smith niadtong Marso 1838 .3 Panahon sa iyang pagpuyo sa Far West, ang Propeta nakadawat og pito ka pinadayag nga gimantala wala madugay diha sa Doktrina ug mga Pakigsaad. Niini nga mga pinadayag, ang Ginoo mipadayag sa hingpit nga ngalan sa Ang Simbahan ni Jesukristo sa mga Santos sa Ulahing mga Adlaw ug miestablisar sa balaod sa ikapulo, lakip sa uban pang mga butang.4

Ang pamuy-anan sa Far West gibase sa “Plano sa Dakbayan sa Zion,” usa ka plano sa pamuy-anan nga orihinal nga gituyo alang sa pagtukod sa Zion diha sa Distrito sa Jackson, Missouri.5 Niadtong Hulyo 4, 1838, ang mga Santos mibutang ug mipahinungod sa upat ka bato sa pamag-ang [cornerstone] alang sa templo sa ilang bag-ong siyudad.6

Imahe
Bato sa pamag-ang sa templo ug monumento sa Far West

Ang bato sa pamag-ang sa templo ug monumento sa Far West, Missouri.

Walay dugang nga buhat ang nahimo diha sa templo. Ang kabangis sa mga manggugubot batok sa mga Santos sa Caldwell ug sa kasilinganan nga mga distrito sa tinglarag sa 1838 sa wala madugay nahimong dakong armadong panag-away. Ang gobernador sa Missouri nga si Lilburn W. Boggs mimando sa militar sa estado nga palibutan ang Far West ug papahawaon ang mga Santos gikan sa estado. Si Major General Samuel D. Lucas, ang komander sa militar sa estado, nakigkita sa usa ka delegasyon sa mga Santos sa gawas lang sa Far West ug mimando nga si Joseph Smith ug ang ubang mga lider sa Simbahan magpadakop o iyang sulungon ang siyudad. Sa dihang ang delegasyon mibalik sa Far West, usa sa mga sakop niini, si George M. Hinkle, misulti kang Joseph nga si Lucas “gusto nga makig-istorya” apan tataw nga wala mopasabut nga tuyo sa heneral nga dakpon siya. Si Joseph ug ang uban miuyon nga makigkita ni Lucas ug kalit nga gidakop ug gihulga nga patyon, apan sa katapusan gibilanggo sila samtang naghulat og husay sa hukmanan.7

Imahe
Ang paghural sa Far West

Paghulagway sa paghural sa Far West niadtong Nobyembre 1838.

Samtang anaa sa bilanggoan si Joseph Smith, mituman ang mga Santos sa mga gipangayo sa estado nga mobiya sa Missouri ug migamit sa Far West isip panukaran sa ilang paglalin. Usa sa mga pinadayag nga nadawat ni Joseph nagsugo sa Napulog Duha sa pagbiya sa Far West sa pagka-Abril 26, 1839, alang sa usa ka misyon ngadto sa England.8 Ang pipila ka mga kontra sa Simbahan nanghambog nga napugngan nila ang katumanan niining balaan nga instruksyon. Hinoon, sa wala pa ang misyon sa Napulog Duha ngadto sa England, si Brigham Young ug ang ubang mga Apostoles mibalik sa luna sa templo sa Far West panahon sa kagabhion aron matuman ang pinadayag sa gitakda nga adlaw.9

Mubo nga mga Sulat

  1. Clark V. Johnson, “Let Far West Be Holy and Consecrated,” sa Larry C. Porter ug Susan Easton Black, eds., The Prophet Joseph: Essays on the Life and Mission of Joseph Smith (Siyudad sa Salt Lake: Deseret Book, 1988), 228–29.

  2. Revelation, 26 April 1838 [D&C 115],” sa Joseph Smith, Journal, March–September 1838, 33, josephsmithpapers.org; tan-awa usab sa Doktrina ug mga Pakigsaad 115:7–8.

  3. Journal, March–September 1838,” 16–17, josephsmithpapers.org. Tan-awa usab sa James B. Allen ug Glen M. Leonard, The Story of the Latter-day Saints, 2nd ed. (Siyudad sa Salt Lake: Deseret Book, 1992), 116–17.

  4. Revelation, 26 April 1838 [D&C 115]”; “Revelation, 8 July 1838–C [D&C 119],” josephsmithpapers.org. Tan-awa sa Doktrina ug mga Pakigsaad 113–115, 117–120.

  5. Revised Plat of the City of Zion, circa Early August 1833,” josephsmithpapers.org; tan-awa usab sa Steven L. Olsen, The Mormon Ideology of Place: Cosmic Symbolism of the City of Zion, 1830–1846, Dissertations in Latter-day Saint History (Provo, Utah: Joseph Fielding Smith Institute for Latter-day Saint History and BYU Studies, 2002), Figure 11.

  6. Alexander L. Baugh, “The Mormon Temple Site at Far West, Caldwell County, Missouri,” sa Thomas M. Spencer, ed., The Missouri Mormon Experience (Columbia: University of Missouri Press, 2010), 80–81.

  7. Mark Ashurst-McGee, David W. Grua, Elizabeth Kuehn, Brenden W. Rensink, ug Alexander L. Baugh, eds., Documents, Volume 6: February 1838–August 1839. Vol. 6 sa mga Dokumento nga serye sa The Joseph Smith Papers, gi-edit nilang Ronald K. Esplin, Matthew J. Grow, ug Matthew C. Godfrey (Siyudad sa Salt Lake: Church Historian’s Press, 2017), 269–271. Gibati ni Joseph nga tuyo siyang gibudhian, bisan tuod si Hinkle ug ang uban miinsister sa kaulahian nga nakasabut si Joseph sa tanang gipangayo ni Lucas.

  8. Revelation, 8 July 1838–A [D&C 118],” sa Joseph Smith, Journal, March–September 1838, 54, josephsmithpapers.org.

  9. Revelation, 8 July 1838–A [D&C 118],” 55, josephsmithpapers.org; tan-awa usab sa Doktrina ug mga Pakigsaad 118:4–5; Baugh, “The Mormon Temple Site at Far West,” 82–83.