Mga Seminary ug mga Institute

Atol sa ulahing bahin sa mga 1800, ang Simbahan midumala og mga akademiya diha sa daghang pamuy-anan sa mga Santos sa Ulahing mga Adlaw nga mihatag og relihiyoso ug akademiko nga panudlo.¹ Sa pagsugod sa siglo, dako nga gidaghanon sa mga estudyante sa mga Santos sa Ulahing mga Adlaw ang misugod sa pagtungha sa publiko nga mga eskwelahan. Ang Church’s Board of Education, nga midumala sa mga akademiya sukad sa 1888, misugod sa pagtutok sa paghatag og relihiyoso nga edukasyon alang sa mga bata ug mga young adult.

Unang mga Seminary

Isip usa ka sakop sa kapangulohan sa Granite Stake, naglaom si Joseph F. Merrill sa pagdugang sa sekondarya nga edukasyon sa kabatan-onan diha sa iyang stake uban sa relihiyoso nga panudlo. Nakakuha siya og inspirasyon gikan sa iyang asawa, si Annie Laura Hyde Merrill, kinsa makanunayong mitudlo sa iyang mga anak sa mga istorya sa Basahon ni Mormon ug Biblia nga iyang nakat-onan diha sa klase sa teyolohiya ni James E. Talmage sa Akademiya sa Salt Lake. Mipalambo si Joseph og konsepto alang sa usa ka seminary nga iyang gidala ngadto sa lokal nga hunta sa eskwelahan, sa superintendente sa hunta sa edukasyon sa estado, ug sa Unang Kapangulohan alang sa pagtugot. Ang Granite Stake ang migasto sa pagpatukod sa usa ka gambalay sa seminary tabok sa dalan gikan sa lokal nga hayskol ug miempleyo ni Thomas J. Yates, usa ka sakop sa high council sa stake, aron sa pagtudlo sa unang mga klase niini bahin sa Biblia ug kasaysayan sa Simbahan. Ang unang mga sesyon miabli atol sa tinglarag sa 1912 uban sa usa ka grupo sa 70 ka estudyante.² Ang modelo ni Merrill nakapadasig sa Church Board of Education sa pag-abli og dugang nga mga seminary nga duol sa ubang mga eskwelahan.

Unang gambalay sa seminary, gitukod tabok sa dalan gikan sa Granite High School, Siyudad sa Salt Lake, Utah, mga 1912.

Pagka-1919, napulog tulo ka seminary ang miabli, nga adunay gidaghanon sa na-enrol nga estudyante nga mga 1,500. Sa misunod nga dekada, ang sistema sa edukasyon sa Simbahan mibalhin sa pagtutok gikan sa mga akademiya ngadto sa pagpalambo niini nga mga seminary, nga adunay mga magtutudlo ug mga estudyante nga naorganisar sa Utah, Idaho, ug Arizona. Gitudlo si Adam S. Bennion isip Superintendente sa mga Eskwelahan sa Simbahan ug naningkamot sa pagpalapad sa programa ngadto sa tanang eskwelahan diin adunay igong gidaghanon sa mga estudyante nga mga Santos sa Ulahing mga Adlaw. Gihimo usab niyang propesyonal ang programa sa edukasyon ug mikuha og mga magtutudlo nga mga Santos sa Ulahing mga Adlaw nga adunay edukasyon sa kolehiyo.³

Ang publiko nga mga eskwelahan sa Utah ug sa ubang dapit nga adunay dakong populasyon sa mga Santos sa Ulahing mga Adlaw mitanyag og released-time nga mga programa, nga nagtugot sa daghang estudyante sa pagtungha sa mga klase sa seminary atol sa mga oras sa tingklase. Kini nga kasabotan gisukit-sukit sa pipila kinsa gusto nga adunay mas klaro nga pagbulag tali sa estado ug sa relihiyoso nga mga institusyon. Ang bisan unsa nga hulga ngadto sa programa sa seminary naresolbar sa kataposan pinaagi sa sunod-sunod nga mga kaso nga gidungog sa Korte Suprema sa Estados Unidos, nga mihukom pabor sa released-time nga mga programa apan midili sa “naghinobra nga pagkalambigit sa gobyerno sa relihiyon.” Sulod sa usa ka panahon, ang Church Board of Education mipabilin sa kurikulum sa seminary nga nakatutok sa Biblia samtang ang komisyoner ug ang mga magtutudlo nakigtambayayong sa mga opisyal sa estado aron matuman ang gilagda sa korte nga mga sumbanan sa pagbulag sa simbahan ug sa estado. Ang mga magtutudlo sa seminary giawhag sa pagtinguha og mas taas nga edukasyon [graduate degrees] ug sa pagsuporta sa pagkat-on sa relihiyoso nga mga hilisgotan.⁴

Unang Mga Institute of Religion

Niadtong mga 1920, ang mga Santos sa Ulahing mga Adlaw nga nagtungha sa University of Idaho diha sa lungsod sa Moscow, Idaho, nagkulang og paigo nga mga pasilidad aron sa pagpahigayon og mga miting sa Simbahan. Agig tubag, ang Church Board of Education mipalambo og suporta nga programa sa “pangkolehiyo nga mga seminary.” Niadtong 1927, ang Unang Kapangulohan mitudlo ni J. Wyley Sessions aron sa pagtudlo og relihiyoso nga mga klase sa University of Idaho ug midumala sa pagtukod og gambalay alang sa Moscow Institute of Religion nga gigamit sa panudlo sa lawak klasehanan ug ubang mga miting sa Simbahan. Sulod sa 20 ka tuig, miabli ang susama nga mga institute sulod o duol sa mga kampus sa pipila ka kolehiyo ug mga unibersidad diha sa Idaho, Utah, California, Wyoming, ug Arizona. Ang gipadagan sa mga estudyante nga mga konseho mimugna og nagkalainlain nga suporta nga mga grupo, usahay isip relihiyoso nga mga alternatibo sa mga fraternity ug mga sorority, nga mitabang sa pagpausbaw sa mga na-enrol sa mga klase sa institute. Sa sinugdanan, ang full-time nga mga magtutudlo wala mitudlo og mga kurso base sa usa ka gi-standardize nga kurikulum apan hinuon mipalambo og relihiyoso nga mga panudlo base sa ilang kaugalingon nga kahanas, sama sa mga propesor sa ilang duol nga kampus.⁵

Ang unang gambalay sa Mga Institute of Religion sa Moscow, Idaho.

Pagpalambo ug Pagpalapad sa Relihiyoso nga Edukasyon

Samtang gisugdan ang unang mga institute of religion, ang Estados Unidos nakasaksi og pipila ka lantugi nga may kalabotan sa siyensiya ug relihiyon. Ang Kaso ni Scopes niadtong 1925 nakadani og nasyonal nga pagtagad ngadto sa debate kon kinahanglan bang itudlo ang ebolusyon sa tawo diha sa publiko nga mga eskwelahan ug kon kinahanglan bang mas hatagan og importansiya ang istorya sa biblia bahin sa Paglalang kaysa moderno nga siyentipikanhon nga mga interpretasyon. Pagkahuman niini nga debate, ang Unang Kapangulohan ug ang Church Board of Education mihimo og mga lakang aron sa pagseguro nga ang mga magtutudlo ug ang kurikulum nagpabilin nga nakatutok sa mga baroganan sa ebanghelyo. Ang hunta mipatuman og bag-o nga mga pamaagi sa pag-hire og mga direktor sa institute, mipahiangay sa mga kurikulum aron sa pagmatuod sa mga pagtulon-an sa mga lider sa Simbahan, ug misubay sa balanse sa kalibotanon ug relihiyoso nga mga pamaagi sa pagkat-on. Niadtong 1938, si Presidente J. Reuben Clark Jr. mihatag og pakigpulong ngadto sa mga magtutudlo sa seminary ug institute bahin sa “The Charted Course of the Church in Education [Ang Gitakda nga Padulngan sa Simbahan sa Edukasyon]” nga mihatag og gibug-aton sa espirituhanon nga pagkat-on sa tanang ang-ang sa edukasyon ug mipasidaan batok sa paghulip sa pagpadayag sa pagkakalibotanon. Ang iyang pakigpulong nagpabilin nga usa ka sumbanan alang sa mga magtutudlo sa Simbahan ug mitino sa desinyo sa kurikulum sulod sa mga dekada.⁶

Niadtong mga 1950, ang Church Board of Education misuhid og usa ka plano sa paghiusa sa komplikado nga pagdumala sa mga seminary ug mga institute. Si Ernest L. Wilkinson, presidente sa Brigham Young University, misugyot sa paghiusa sa tanang matang sa relihiyoso nga edukasyon ngadto sa usa ka sistema nga mohatag og mga benepisyo sa magtutudlo, gigiyahan nga pagbansay, ug gi-standardize nga kurikulum. Kini nga mga paningkamot misangpot sa pagkaestablisar sa Church Educational System (CES).⁷

Sa samang higayon, ang mga paningkamot sa pagpalapad sa mga klase sa seminary gawas sa Utah, Idaho, ug Arizona nakasugat og pagsukwahi gikan sa mga hunta sa eskwelahan ug sa mga opisyal sa estado kinsa dili andam nga motugot sa released-time nga mga klase. Ang mga presidente sa stake sa California, diin nagkadaghan ang miyembro ug dili available ang released time, mipadayon sa paghangyo og suporta alang sa usa ka programa sa seminary. Ang kalamposan sa usa ka sayo sa buntag nga klase diha sa Siyudad sa Salt Lake nakadasig ni Commissioner Franklin L. West sa pagpadala kang Ray L. Jones, usa ka prinsipal sa seminary sa Utah, aron sa pag-organisar og susama nga mga klase sa California. Mibalhin si Jones ngadto sa Los Angeles, diin nakigtambayayong siya ni Howard W. Hunter, ang presidente sa stake sa Pasadena ug umaabot nga Presidente sa Simbahan, aron sa pag-establisar og hunta sa edukasyon sa rehiyon ug sa pagtanyag og mga klase sa alas 6:00 ug 6:30 sa buntag. Bisan og daghan ang maduhaduhaon nga ang mga estudyante sayo kaayo nga motungha, ang pagtambong paspas kaayo nga misaka. Human sa pito ka tuig, sobra sa 9,000 ka estudyante ang na-enrol.⁸

Sa wala madugay ang mga tigdumala sa CES mipalapad sa sayo sa buntag nga mga seminary aron sa pagserbisyo sa tribo nga mga nasod sa Lumad nga Amerikano, Europe, Australia, ug New Zealand. Pagka mga 1960 ug 70, ang mga seminary ug mga institute naestablisar diha sa mga Isla sa Pasipiko, sa amihanang Atlantic, sa Caribbean, habagatang silangang Asya, Tunga-tunga ug Habagatang Amerika, ug Africa. Ang Church Education System mihimo og gi-standardize nga mga kurikulum alang sa mga kurso ug mipalambo og mga programa nga gidesinyo alang sa Bungol ug buta nga mga estudyante. Gipalapdan ang mga programa aron sa pagsuporta sa edukasyon diha sa mga ospital alang sa may kakulian sa pangisip ug sa mga bilanggoan sa estado. Pagka 2020, ang mga na-enrol sa seminary ug institute sa tibuok kalibotan milapas sa 400,000 ug 310,000, sa samang han-ay.⁹

May Kalabotan nga mga Hisgotanan: Church Academies [Mga Akademiya sa Simbahan], Mga Organisasyon sa Batan-ong mga Babaye, Mga Organisasyon sa Batan-ong mga Lalaki