Mini nga mga Dokumento nga Hinimo ni Hofmann
Si MarkW. Hofmann usa ka negosyante og mga talagsa ra kaayong makaplagan nga mga dokumento ug hanas nga tighimo og mini nga mga dokumento kinsa mipahimulos sa kaikag sa publiko kabahin sa Mga Santos sa Ulahing mga Adlaw ug sa kasaysayan sa Amerika pinaagi sa pagpamaligya og tinuod, inusab, ug mini nga mga dokumento sa kasaysayan sa sayo nga bahin sa 1980. Niadtong 1985, tataw nga nabalaka nga basin masakpan ang iyang pagpangilad, si Hofmann migamit og iyang kaugalingong hinimo nga mga bomba aron sa pagpatay og duha ka tawo, lakip na sa usa sa iyang mga kliyente.
Daghan sa mini nga mga dokumento nga hinimo ni Hofmann nakatutok sa kasaysayan sa mga Santos sa Ulahing mga Adlaw. Si Hofmann usa ka miyembro sa Ang Simbahan ni Jesukristo sa mga Santos sa Ulahing mga Adlaw kinsa hilom nga mihunong sa pagtuo sa Dios. Sa pangedaron nga mga 25 anyos, nainteresado siya sa makasaysayanong mga buhat sa kasaysayan sa Simbahan ug kabisado sa mga dokumento nga gihisgotan sa makasaysayanon nga mga asoy nga wala pa gayod mahibaloi kon asa kini nahimutang, sama sa kopya sa mga titik sa Basahon ni Mormon nga gidala ni Martin Harris ngadto sa inila nga eskolar nga si Charles Anthon.1 Pagka 1980 si Hofmann miangkon nga nakakaplag siya og usa ka kopya niini nga transcript [sinulat nga dokumento] nga gipilo ug gisup-it sa mga pahina sa usa ka ika-17 nga siglo nga kopya sa King James nga Biblia. Ang mga eskolar kinsa mihiling sa dokumento nagtuo nga tinuod kadto base sa agi sa pagkasulat nga haom sa ubang kompirmado nga mga sampol sa mga sinulat ni Joseph Smith ug sa kang Anthon nga mga paghulagway sa mga titik. Ang pagdawat niining mini nga dokumento maoy sinugdanan sa panginabuhian ni Hofmann isip usa ka negosyante sa talagsa ra kaayong makaplagan nga mga basahon ug mga manuskrito.
Nagkalain-laing mga pamaagi ang nakatabang ni Hofmann sa pagkombinser sa mga eskolar nga ang iyang hinimo nga mini nga mga dokumento mga tinuod. Mabinantayon siyang mipili og mga proyekto nga nakatutok sa mga dokumento nga sagad diha na kaniadto, ug iyang gitun-an pag-ayo ang mga panghitabo nga may kalabotan niini. Nangawat siya og mga papel sa peryodiko ug ubang mga materyales gikan sa mga arkibo [pundohanan sa mahinungdanon nga mga impormasyon], naghimo og iyang kaugalingong tinta ug migamit og artipisyal nga pamaagi aron mahimo kining karaan, ug mainampingong miusab sa karaang mga istampa aron makatabang nga makapasar ang iyang hinimo nga mini nga mga dokumento sa makuti nga pagsusi sa mga tigpamatuod og dokumento. Iyang gitun-an ang talagsaong estilo sa sinulatan sa tagsulat ug iya kining makopya sa makasurprisa nga pagkatukma. Ang iyang pagsiksik sa kasaysayan ug mga abilidad sa literatura nakahatag kaniya og kahanas sa pag-andam og mga dokumento nga nagpakita sa mga estilo, tono, ug sulod nga haom sa kasagaran nga mga pamaagi. Mihimo siya og mga katuohan nga mga istorya kabahin sa mga sinugdanan ug pagpanag-iya sa mga dokumento, usahay maghimo siya og pasiuna nga mini nga mga dokumento aron mahimong basihanan sa mas mahinungdanon nga makasaysayanon nga mga dokumento. Nakaangkon siya sa tinuod nga talagsa ra kaayong makaplagan nga mga dokumento pinaagi sa pagdawat niini isip baylo sa iyang baligya nga mga dokumento ug dayon parehong ginegosyo ang tinuod ug mini nga mga materyal. Usahay iyang usbon og gamay ang tinuod nga mga dokumento o mga materyal aron motaas ang bili niini. Daghang mga eskolar gikan sa nagkalain-laing natad sa pagtuon walay kalibotan nga mihatag og pagpamatuod sa mini nga mga dokumento nga hinimo ni Hofmann.
Ang mini nga mga dokumento nga hinimo ni Hofmann naglakip sa mga dokumento gikan sa nag-unang inila nga mga tawo sa politika ug literatura sa Amerika, nga naglangkob gikan sa mga ordinaryong dokumento nga dunay mga mini nga mga pirma ngadto sa mubo nga mga buhat sa literatura. Si Hofmann mihimo og pipila ka mini nga mga dokumento kabahin sa Simbahan, lakip na sa mga sulat ni Joseph Smith, Lucy Mack Smith, ug David Whitmer, kauban sa daghan pang mga dokumento. Mihimo siya og pipila ka mini nga mga dokumento nga nakatutok sa sensitibo nga mga aspeto sa kasaysayan sa Simbahan, naglaom nga makamugna og kontrobersiya. Mihimo siya og mini nga dokumento sa usa ka panalangin nga kunohay gihatag ni Joseph Smith ngadto sa iyang anak nga si Joseph SmithIII nga misangon kaniya isip manununod sa iyang amahan. Mihimo usab siya og mini nga 1830 nga sulat gikan ni Martin Harris (nailhan nga “salamander letter [sulat kabahin sa misteryoso nga tiki]”), nga naghulagway kang Joseph Smith nga may kalambigitan sa paggamit og mahika sa pagkontrolar sa mga natural o sulagma nga mga hitabo aron sa pag-impluwensya sa mga emosyon o kinaiya sa ubang tawo.2 Si Hofmann miilad dili lang sa mga lider sa Simbahan ug mga historian [mga tigtuon ug tigsulat sa kasaysayan] pinaagi sa iyang mini nga mga dokumento apan usab sa iyang pamilya ug mga higala, mga tig-arkibo [mga propesyonal nga tigtuki, tigkolekta, ug tigpreserba og mga impormasyon nga mapuslanon sa publiko] ug mga librarian [mga propesyonal nga nagtrabaho sa librarya], ug ubang mga eksperto. Ang Simbahan nakaangkon og pipila ka dokumento gikan kaniya, ug ang iyang hinimo nga mini nga mga dokumento nahimong usa ka mahinungdanon nga butang sa makinaadmanon nga pagtuon ug panaghisgotan sa publiko.
Niadtong 1985 si Hofmann misugod sa pagpakigsabot sa $1.5milyon nga pagbaligya sa usa ka mini nga dokumento ngadto sa Library of Congress. Niadtong higayona, ang mga gasto ni Hofmann sa biyahe, mga mahalon nga kabtangan, talagsa ra kaayong makaplagan nga mga basahon, ug ang gasto sa paghimo og mini nga mga materyal misubra kay sa iyang dako kaayo nga kinitaan. Ang ubang mga kliyente nagsugod na sa pagpangita sa mga dokumento nga nasabotan nga gipabayran na daan ni Hofmann apan wala pa niya mahimo. Sa kahadlok nga masakpan sa dihang napiit na siya, si Hofmann mipadala og kahon nga adunay sulod nga iyang hinimo nga bomba nga mipatay sa kolektor nga si StevenF. Christensen. Si Hofmann mipasalig ni Christensen og usa ka koleksyon sa mga dokumento gikan sa mipalayo sa Simbahan nga si Apostol William McLellin apan napakyas siya sa paghatag niini. Aron matipas ang atensyon sa mga imbestigador gikan kaniya ngadto sa ubang mga kalihokan sa negosyo ni Christensen, si Hofmann mipadala og ikaduhang bomba ngadto sa panimalay ni J. Gary Sheets, kasosyo ni Christensen sa negosyo, nga maoy nakapatay sa asawa ni Sheet, si Kathy. Pagkasunod adlaw, duol sa Temple Square, ikatulo nga bomba ang mibuto sulod sa sakyanan ni Hofmann sa wala pa niya kini mahatag sa usa ka wala mailhi nga biktima. Kadto nga pagbuto dali nga nakatudlo sa mga polis sa pagpangita og ebidensya nga naglambigit ni Hofmann ngadto sa mga pagpamomba. Ang mga eksperto sa pagsulbad og mga krimen mituki sa mini nga mga dokumento nga hinimo ni Hofmann ug nakakaplag og ebidensya nga iyang gipakaraan ang pangedaron sa tinta sa artipisyal nga pamaagi. Sa kataposan mikompisal siya sa mga pagpatay ug sa paghimo og mini nga mga dokumento ug gihukman og lima ka tuig ngadto sa tibuok kinabuhi nga pagkapriso, diin ang huwes mirekomendar nga dili na gayod siya pagawason.
Ang pinakadagko nga mga trahedya nga nalambigit sa paghimo ni Hofmann og mini nga mga dokumento mao ang mga kamatayon ni Kathy Sheets ug Steven Christensen. Ang mini nga mga dokumento nakahatag usab og mga hagit sa trabaho sa mga kolektor ug tigpamaligya og mga manuskrito ug basahon, mga historian, ug mga tig-arkibo. Samtang ang pag-imbestigar sa kapolisan milambigit ni Hofmann ngadto sa paghimo og daghan kaayong mini nga mga dokumento, ang gidaghanon sa mga kasosyo sa iyang negosyo nakapalisod sa pagsubay sa gidak-on ug lokasyon sa iyang trabaho. Pananglitan, dose ka tuig human sa pagpamomba usa ka dokumento nga gituohan sa mga eksperto nga tinuod nga kopya sa balak ni Emily Dickinson nasubay ngadto ni Hofmann. Ang bakak nga mga pangagpas nga dinasig sa mga dokumento o mga pahayag ni Hofmann nga sa kataposan misumbalik ngadto sa iyang hinimo-himo nga ebidensya sa gihapon nakatuis sa ubang paghulagway sa kasaysayan sa mga Santos sa Ulahing mga Adlaw.
Sukad niadtong mga tuig 1980 ang Simbahan nagmantala og daghan kaayong impormasyon kabahin sa sayo nga bahin sa kasaysayan niini, nga nakatabang sa paghatag og mahinungdanong pagsabot sa ubang dili klaro nga mga panghitabo sa kasaysayan nga gipahimuslan ni Hofmann sa iyang paghimo og mini nga mga dokumento aron sa paghatag og negatibo nga hulagway sa Simbahan. Ang mga historian ug mga tig-arkibo sa Simbahan nagdugang usab sa ilang pagmatngon sa pagkompirma sa mga pangangkon kabahin sa pagpanag-iya og dokumento ug mga kalabot nga panghitabo sa kasaysayan ngadto sa ubang ebidensya. Ang pagmantala ug pagpa-digital sa mga sinulat ni Joseph Smith ug sa ubang daghan pa nga importanting nakolekta nga mga dokumento nakatabang sa pagpalapad sa basihanan sa pagsusi sa bag-ong mga kaplag.