Mga Pangahas sa Pagpatahan Balik sa Missouri Pinasubay sa Ekstradisyon

Human sa armadong kasungian tali sa mga Mormon ug sa uban nga mga taga Missouri niadtong tinglarag sa 1838, daghang mga lider sa Simbahan, lakip ni Joseph Smith, ang gipangsikop ug gipangbilanggo sa nagkadaiyang mga pasangil. Ang mga pagpamatay nga gihimo batok sa mga Santos, hinoon, wala gigukod. Si Joseph ug ang ubang mga Santos sa Ulahing mga Adlaw mituo nga ang mga pasangil nga gipasaka batok kanila usa ka matang sa legal nga mga pagpanggukod nga gituyo aron madugangan ang pagsakit kanila gani ingon sa kinadak-ang pundok sa mga Santos gipapahawa gikan sa estado.

Niadtong Abril 1839, gihukman sa usa ka dakong hurado sa Missouri si Joseph Smith ug ang uban pa sa sala nga riot, pagluib [treason], pagpangawat, pagdawat og kinawat nga mga butang, ug pagpangsunog—ang mga krimen gipasangil nga nabuhat atol sa Missouri-Mormon nga Gubat sa milabayng tuig. Niining bista, ang tigdumala nga huwes diha sa kaso miisyu og pagpausab sa dapit ug mimando nga dad-on ang mga binilanggo ngadto sa Columbia, Distrito sa Boone, alang sa ilang katapusang bista. Samtang gibyahe aron sa paghusay, si Joseph ug ang iyang mga kaubanan mieskapo uban sa tabang sa usa sa ilang mga gwardiya ug milayas ngadto sa Illinois, diin ang dakong grupo sa mga Santos nakakaplag og kadangpan.¹ Gikan sa 1840 hangtud sa 1843, gitrabaho sa mga opisyal sa estado sa Missouri ang pagbalhin ni Joseph (sa legal nga paagi nagpugos kaniya sa pagbalik ngadto sa Missouri) ug dad-on siya ngadto sa husay. Nakiglalis siya nga ang pangagamhanan sa estado wala motuman sa hustong proseso sa balaod ug mituo nga ang iyang mga kaaway misulay sa paggamit sa legal nga proseso sa pag-areglo sa pagpatay kaniya.²

Usa ka tuig ang milabay human sa pag-eskapo ni Joseph Smith ngadto sa Illinois, ang gobernador sa Missouri nga si Lilburn W. Boggs mipadala og usa ka pormal nga hangyo ngadto sa gobernador sa Illinois nga si Thomas Carlin nga mibungat nga ibalhin si Joseph sa Missouri aron husayon. Human miisyu si Carlin og mando sa pagdakop, ang sheriff wala molampos sa pagpangita ni Joseph didto sa Nauvoo, Illinois. Subli nga miisyu si Carlin og mando niadtong Hunyo 1841, ug laing sheriff ang midakop ni Joseph. Ang huwes nga si Stephen A. Douglas mipagawas ni Joseph, sa pagkakita nga adunay sayop sa mando.³

Gipanghingusgan ang paningkamot sa ekstradisyon niadtong 1842 sa dihang usa ka wala mailhing mamumuno mipusil ug nakasamad ni Boggs, kinsa dili na gobernador, sa Independence, Missouri. Si John C. Bennett, usa ka gi-excommunicate nga miyembro sa Simbahan kinsa nahimong masinupakon sa Simbahan, mipasangil nga si Joseph mipadala ni Porter Rockwell aron sa pagpatay ni Boggs.⁴ Kusganong milimud ang Propeta niining pasangil. Bisan pa niana, ang bag-o nga gobernador sa Missouri, si Thomas Reynolds, mipetisyon alang sa ekstradisyon ni Joseph, ug si Gobernador Carlin miisyu pag-usab og mando sa pagdakop. Ang Korte sa Munisipyo sa Nauvoo mihagit sa legalidad sa pagdakop, miisyu og kasulatan sa mando sa pagdala ngadto sa korte [writ of habeas corpus], usa ka legal nga proteksyon nga nagkinahanglan nga ang usa ka binilanggo dad-on sa atubangan sa maghuhukom aron sa pagtino kon legal ba ang pagdakop ug pagbilanggo sa piniriso.⁵ Sa duha ka adlaw nga gidugayon alang sa pagkumpirmar sa sheriff sa legalidad sa hagit sa korte, si Joseph nagtago-tago.⁶

Si Emma Smith ug ang kababayen-an sa Female Relief Society sa Nauvoo nagtinabangay aron sa pagpanalipod sa Propeta. Mipirma ang kababayen-an og usa ka petisyon ngadto ni Gobernador Carlin nga nag-awhag sa pagpahunong sa kahimoan sa ekstradisyon. Si Emma mipadala usab og daghang sulat ngadto ni Carlin, nakiglalis nga bisan kon ugaling si Joseph ang mihan-ay sa pagpapatay gikan sa Illinois, sumala sa gipasangil, ang ekstradisyon dili tukma nga legal nga sulbad tungod kay ang Missouri walay katungod sa tawo tungod sa usa ka krimen nga sumala pa nahitabo sa dapit nga gawas sa mga utlanan niini.⁷ Niadtong Enero 1843, mitambong si Joseph atubangan sa Korte sa Distrito sa Estados Unidos didto sa Springfield, Illinois, diin ang iyang abogado, si Justin Butterfield, mihimo og susama nga argumento. “Para nako ang sinumbong sa bisan unsang mga kahimtang dili angay nga dad-on ngadto sa Missouri,” milalis si Butterfield. “Butang kini nga milabay na nga siya ug ang iyang mga katawhan gipamatay ug gipang-abug gikan sa estado,” midugang siya, mitapos nga “inosente siya ug tawo nga dili mopasakit.” Ang korte miuyon kang Butterfield ug mipagawas kang Joseph.⁸

Si John C. Bennett padayon nga mitrabaho sa pagpadakop ni Joseph Smith, ug niadtong Hunyo 1843, usa ka pundok sa maghuhukom [grand jury] miisyu og bag-ong gipasaka nga sumbong kabahin sa 1839 nga kaso sa pagbudhi.⁹ Si Gobernador Reynolds mipadala og demanda ngadto sa bag-ong pinili nga gobernador sa Illinois, si Thomas Ford, ug si Joseph gidakop ubos sa mando [warrant] ni Ford. Usab ang Korte sa Munisipyo sa Nauvoo mihatag ni Joseph sa kasulatan sa mando sa pagdala ngadto sa korte ug niadtong Hulyo 1 nakadawat og testimonya dili lamang sa mga legalidad sa ekstradisyon, apan bahin usab sa mga krimen nga nabuhat niadtong 1838 batok sa mga Mormon didto sa Missouri. Ang korte mimando sa pagbuhi kaniya gikan sa ekstradisyon nga mando.¹⁰ Mitapos kini sa pormal nga pagsulay sa Estado sa Missouri sa pagpabalhin [extradite] ni Joseph aron husayon diha sa estado. Bisan pa niana, siya nagpabilin nga nabalaka nga bag-uhon sa iyang mga kaaway sa Missouri ang paningkamot aron mapugos siya ngadto sa usa ka dapit diin moatubang siya sa mapihigon nga mga korte ug tingali sa kamatayon.¹¹