Mga Pagpahiangay sa Buhat sa Templo

“Mga Pagpahiangay sa Buhat sa Templo,” Mga Hisgotanan sa Kasaysayan sa Simbahan (2022)

“Mga Pagpahiangay sa Buhat sa Templo,” Mga Hisgotanan sa Kasaysayan sa Simbahan

Mga Pagpahiangay sa Buhat sa Templo

Ang pagsabot sa mga ordinansa sa templo gipadayag ngadto kang Joseph Smith “pagtulon-an human sa usa ka pagtulon-an.”¹ Naglihok ubos sa diosnon nga direksiyon, gipaila niya ang tanang ordinansa nga may kalabotan sa mga templo karon: mga bunyag alang sa mga patay, ang mga seremonya sa initiatory ug pagtuga, ug mga pagsilyo sa templo. Samtang nakabaton siya og dugang nga pagpadayag ug kasinatian, si Joseph mihimo og mga pagpahiangay sa pagpahigayon niini nga mga ordinansa aron mas maayong matudloan ang mga Santos.

Ang misunod nga mga propeta mipadayon sa pag-usab sa paagi nga gipahigayon ang mga ordinansa ug mga pakigsaad sa templo. Kini nga mga kausaban gihimo agig tubag sa pagpadayag, sa nagkausab nga mga panginahanglan sa mga miyembro sa Simbahan, ug sa praktikal nga mga problema. Samtang daghang pagpahiangay ang nahitabo paglabay sa panahon, ang labing importante nga doktrina ug mahinungdanon nga mga pakigsaad sa mga ordinansa sa templo nagpabilin nga pareho. Niadtong 1959, si Elder Harold B. Lee sa Korum sa Napulog Duha ka Apostoles mitudlo niini nga baroganan ngadto sa mga ordinance worker sa Salt Lake Temple: “Kita adunay bag-o nga mga pamaagi,” miingon siya, “apan ang mga kamatuoran pareho ra dili igsapayan kon sa unsang paagi kini gipakita. Mahimong magdahom pa kita og dugang nga bag-o nga mga pamaagi—apan ang mga sukaranan dili mausab.”²

Ang ubang Mga Hisgotanan sa Kasaysayan sa Simbahan maghisgot sa makasaysayanong mga kausaban sa mga bunyag alang sa mga patay ug mga pagsilyo sa templo ug maghisgot sa pagpaila ug dinasig nga pagpalambo sa pagtuga atol sa kinabuhi ni Joseph Smith. Sa wala pa ang iyang kamatayon, si Joseph misugo ni Brigham Young sa “paghan-ay ug pagbuhat og sistema” sa pagtuga aron kini mapahigayon sulod sa templo.³ Busa, si Brigham Young mipaila og mga kausaban sa ulahing bahin sa 1845 aron sa pag-establisar og “mas maayo nga han-ay sa pagpahigayon sa pagtuga” ingon nga kini gipahigayon diha sa usa ka templo sa unang higayon.⁴

Sa nahauna nga mga templo, ang pagtuga usahay molungtad og daghang oras ug naglakip og taas kaayo nga instruksiyon. Sa paglabay sa panahon, ang mga lider sa Simbahan nagtinguha og diosnon nga giya aron himoong posible alang sa mga miyembro nga mopahigayon og mas daghang pagtuga alang sa mga patay. Isip resulta, gipahiangay nila ang pinulongan sa seremonya ug gipagamyan ug gi-standardize usab ang instruksiyon nga gihatag atol sa ordinansa. Sa ulahing bahin sa ika-19 ug sa sayong bahin sa ika-20 nga mga siglo, ang pagtuga sa templo kasagaran nga gipahigayon ngadto sa mga grupo sa mga miyembro sa Simbahan nga giorganisar sa mga ward, mga stake, o mga korum. Niadtong mga 1920, ang Simbahan mihunong sa mga panalangin sa pagpang-ayo nga gipahigayon diha sa mga templo, naghatag og dugang nga atensiyon sa nagkadaghang mga Santos sa Ulahing mga Adlaw nga miabot sa mga templo aron sa pagpahigayon og mga ordinansa alang sa ilang mga katigulangan. Ang mga lider sa Simbahan midugang og mas daghang kalingkoran diha sa templo, mipalapad sa gidaghanon sa matag adlaw nga mga sesyon sa pagtuga, ug mitawag og usa ka superintendente aron sa pag-organisar ug pagdumala sa mga temple worker. Miestablisar usab sila og regular nga mga sesyon sa pagtuga nga bukas ngadto sa indibidwal nga mga Santos sa Ulahing mga Adlaw ingon man sa mga grupo kinsa mibiyahe og dungan paingon sa templo.⁵

Ang unang mga dekada sa ika-20 nga siglo nakakita usab og mga kausaban sa mga estilo sa sinina ug bisti sa Uropa ug sa Estados Unidos. Ang uso [fashion] sa kababayen-an nagkausab gikan sa sinina nga tag-as og bukton ug sayal. Kini nga mga kausaban sa mga estilo sa bisti dili lang mahitungod sa uso; gilantaw usab kini nga nagtugot og mas gawasnon nga paglihok-lihok ug mosangpot sa usa ka himsog nga pamaagi sa kinabuhi. Ang Unang Kapangulohan ug Korum sa Napulog Duha ka Apostoles, ubos sa pagpangulo ni Presidente Heber J. Grant, nahibalo niini nga mga kausaban ug gustong motabang sa mga miyembro sa Simbahan sa pagtahod sa ilang mga pakigsaad sa templo. Niadtong 1923, mipaila sila og bag-o nga sundanan, nagtambag nga ang garment sa templo mahimong pamub-an hangtod sa tuhod ug siko, gitangtang ang tradisyonal nga kuwelyo, ug gigamit ang mga butones imbes sa laso nga mga higot.⁶

Sa sayong bahin sa mga 1950, ang Unang Kapangulohan miaprobar og bag-o nga desinyo sa templo diin ang pagtuga mahitabo diha sa usa ka lawak imbes nga pabalhinon ang mga patron sa templo ngadto sa nagsunod-sunod nga mga lawak. Kini nga kausaban mohimong posible sa pagtukod og mas gagmay nga mga templo nga magkinahanglan og mas dyotay nga mga temple worker.⁷ Aron sa pagpahigayon sa administrasyon sa pagtuga niining mas gagmay nga mga templo, si Presidente David O. McKay midawat og sugyot gikan ni Gordon B. Hinckley nga gamiton ang usa ka salida aron sa pagpresentar og mga bahin [portions] sa pagtuga. Ang paghimo sa salida nahitabo diha sa ikalima nga andana sa Salt Lake Temple, ug ang salida andam na alang sa pagpahinungod sa templo sa Switzerland niadtong Septyembre 1955.

Mipadayon ang panagsa nga mga kausaban ngadto sa mga pamaagi ug bisti sa templo sa bag-ohay nga mga dekada. Niadtong 1979, sama pananglit, gipaila ang duha ka piraso nga mga garment isip usa ka alternatibo sa kanhiay nga usa ka piraso nga estilo.⁸ Laing importante nga pagpahiangay miabot niadtong 2019, sa dihang ang Unang Kapangulohan mitugot sa kababayen-an nga molihok isip mga saksi alang sa mga pagbunyag sa templo ug sa mga ordinansa sa pagsilyo.⁹

Si Presidente Wilford Woodruff mitudlo nga si Joseph Smith ug si Brigham Young “wala makadawat sa tanang pagpadayag nga nahisakop sa buhat sa [templo]; ni si Presidente Taylor, ni si Wilford Woodruff. Walay kataposan kini nga buhat hangtod kini mahingpit.”¹⁰ Sa matag higayon, ang mga kausaban gitugotan sa Presidente sa Simbahan, kinsa naggunit sa tanang gikinahanglan nga mga yawe sa mga ordinansa sa pagkapari. Niadtong 2021, si Presidente Russell M. Nelson mitudlo nga kini “nga mga kausaban sa pamaagi sa templo, ug ang uban nga mosunod, mao ang padayon nga ebidensya nga ang Ginoo aktibong naggiya sa Iyang Simbahan.”¹¹

May Kalabotan nga mga Hisgotanan: Bunyag alang sa mga Patay, Dinihogan nga Korum (“Balaan nga Kapunongan sa Dios”), Endowment House, Templo sa Nauvoo, Templo sa Salt Lake, Pagsilyo [Sealing], Pagtuga [Endowment] sa Templo, Pagtukod og Templo, Pagpang-ayo, Family History ug Genealogy