Thomas S. Monson

Si Thomas S. Monson miserbisyo isip ika-16 nga Presidente sa Simbahan gikan sa Pebrero 2008 hangtod sa iyang kamatayon niadtong Enero 2018. Natawo siya ni Gladys Condie Monson ug G. Spencer Monson niadtong 1927 ug nagdako sa Siyudad sa Salt Lake, uban sa daghan sa iyang paryente nga nagpuyo sa samang block. Ang iyang kasinatian sa pagkabata naglakip sa mga ting-init sa Provo Canyon sa habagatan sa Salt Lake, nga misilsil diha kaniya og lawom nga gugma alang sa kinaiyahan ug mga kalihokan sa gawas. Human makagradwar sa high school niadtong 1944, taliwala sa nagpadayon nga Ikaduhang Gubat sa Kalibotan, si Thomas nag-atubang og importanteng mga desisyon. Nagpaabot siya nga makadawat og sumon sa kasundalohan sa dihang nag-edad na siya og 18, mao nga human sa iyang unang tuig sa kolehiyo sa University of Utah, nagpalista siya sa United States Naval Reserve. Bisan tuod ang gubat natapos wala madugay human sa iyang pagpalista, ang iyang pagserbisyo sa militar sa San Diego, California, napamatud-an nga nakapausab sa kinabuhi. Sa iyang pagbalik sa Siyudad sa Salt Lake niadtong 1946, gipadayon niya ang iyang pagtuon, nakaangkon og kurso sa marketing paglabay sa duha ka tuig.

Atol sa iyang mga tuig sa kolehiyo ug sa militar, nahimamat ug na-date ni Thomas si Frances Johnson. Ang duha naminyo niadtong 1948. Nanarbaho silang duha, si Thomas isip manager sa classified advertising sa Deseret News ug si Frances isip payroll secretary sa usa ka J. C. Penney department store. Samtang 22 anyos pa lang ug 19 lang ka bulan nga naminyo, nadawat ni Thomas ang tawag sa pagserbisyo isip bishop sa Sixth-Seventh Ward sa Salt Lake, nga naglakip sa kapin sa usa ka libo ka miyembro, kadaghanan kanila nagpuyo sa kakabos o nagkinahanglan og espesyal nga pag-atiman. Ang iyang lima ka tuig nga pangalagad isip bishop nakatutok ilabi na sa daghang biyuda nga mga babaye sa ward, diin iyang naugmad ang tibuok kinabuhi nga pagpakabana.

Niadtong 1959, si Thomas S. Monson gitawag sa pagdumala sa Canadian Mission. Uban sa ilang duha ka gagmay nga anak, sila si Tommy ug Ann, ang mga Monson mibiya sa ilang bag-ong panimalay didto sa mga utlanan sa Siyudad sa Salt Lake aron moadto sa punoang buhatan sa misyon sa Toronto. Unom ka bulan human sa ilang pag-abot, gihangop ni Thomas ug Frances ang ilang ikatulo nga anak, si Clark. Gipalagsik pag-usab sa mga Monson ang misyonaryo nga buhat sa lugar, ilabi na pinaagi sa pagpalambo og mas dakong kolaborasyon tali sa lokal nga mga miyembro sa Simbahan ug sa mga misyonaryo nga miserbisyo atol sa ilang dul-an sa tulo ka tuig nga termino. Ang pagmugna sa unang stake sa silangang Canada niadtong 1960 mipausbaw sa pagdaghan sa lokal nga mga meetinghouse, nga gisuportahan sa mga Monson ug usahay gipangulohan.

Niadtong 1963, sa edad nga 36, si Thomas S. Monson gitawag sa pagserbisyo sa Korum sa Napulog Duha ka Apostoles. Ang iyang apostolikanhong pangalagad naatol sa medyo kusog nga pagdaghan sa mga miyembro ug internasyonal nga pag-uswag sa Simbahan. Si Elder Monson mibiyahe pag-ayo aron sa pagtabang sa internasyonal nga mga kongregasyon, pagtudlo sa mga miyembro ug mga misyonaryo, pag-organisar og bag-ong mga yunit, pagpahinungod sa mga meetinghouse, ug pagpatuman og mga programa. Tali sa 1968 ug 1990, ang iyang mga buluhaton sa mga kalihokan sa Simbahan sa Europe naglakip sa mga Santos sa Ulahing mga Adlaw nga nagpuyo sa German Democratic Republic, usa ka nasod-estado nga gibulag gikan sa kasadpang Europe pinaagi sa higpit og restriksiyon nga mga utlanan nga sagad gitawag og “Iron Curtain.” Si Elder Monson mipakita og talagsaong pasalig ngadto sa East German nga mga Santos sa Ulahing mga Adlaw atol niining panahon sa Cold War, nga kasagarang mibiyahe sa mga dapit nga adunay delikadong politikal nga mga kahimtang aron personal siya nga makaalagad. Gikan sa 1968 hangtod sa 1985, si Elder Monson ang nangulo sa Bible Study Aids Committee, sa wala madugay giusab ang ngalan og Scriptures Publication Committee, ug midala sa iyang propesyonal nga kahanas sa print publishing aron makahimo og bag-o, nga adunay komprehensibo nga mga pakisayran nga edisyon sa Biblia, Basahon ni Mormon, Doktrina ug mga Pakigsaad, ug Perlas nga Labing Bililhon. Ang nahibilin sa iyang apostolikanhong pangalagad human sa 1985 gihulagway pinaagi sa iyang pagserbisyo isip magtatambag sa Unang Kapangulohan sa tulo ka higayon, ubos ni Presidente Ezra Taft Benson, Howard W. Hunter, ug Gordon B. Hinckley.

Human sa kamatayon ni Presidente Hinckley niadtong 2008, si Presidente Monson gi-orden ug gi-set apart isip Presidente sa Simbahan. Sa pagsugod sa ika-21 nga siglo, ang mga miyembro sa Simbahan nagpadayon sa paglapad sa tibuok kalibotan, nagdala og bag-ong mga oportunidad ug mga hagit sa pagpakigdungan sa internasyonal nga mga kausaban. Si Presidente Monson nangulo sa Simbahan pinaagi sa mas dako nga tibuok kalibotan nga paghatag og serbisyao ug pagpakigtinabangay sa lain-laing mga relihiyon. Niadtong 2008, iyang gipasiugdahan ang pagdugang sa “pag-atiman sa mga kabos ug timawa” sa misyon sa Simbahan. Niadtong 2012, gipahibalo niya ang inisyatiba sa “Pagpadali sa Buhat sa Kaluwasan” nga dugang nga gihimong kabahin sa misyonaryo nga buhat ug lokal nga mga kalihokan, pakiglambigit sa social media, ug mga proyekto sa pagserbisyo. Niining samang higayon, nangulo siya og dakong kausaban sa polisiya: ang mga lalaki mahimong irekomendar alang sa misyonaryo nga pagserbisyo sugod sa edad nga 18 imbes 19 ug ang mga babaye mahimong irekomendar alang sa misyonaryo nga pagserbisyo sugod sa edad nga 19 imbes 21. Ang gidaghanon sa mga misyonaryo mitubo pag-ayo, nga mitubo gikan sa 59,000 ngadto sa kinatas-ang ihap nga 88,000 sulod sa duha ka tuig human sa pagpahibalo. Gipasabot usab og maayo ni Presidente Monson ang pagtukod ug pagtambong sa templo. Atol sa iyang paglingkod, mipahibalo siya nga adunay 45 ka bag-ong templo, usa ka talagsaong pagtubo gikan sa 124 ka templo nga aktibot sa panahon nga siya nahimong Presidente niadtong 2008.

Lima ka tuig sa iyang pagka-presidente, si Presidente Monson nag-atiman sa iyang asawa, si Frances, samtang naospital kini tungod sa pagkunhod sa panglawas tungod sa pagkatigulang. Si Frances, nga mao ang “kahayag sa gugma, kaluoy ug pagdasig” sa pamilyang Monson, namatay sa edad nga 85 anyos. Bisan pa sa pisikal nga mga limitasyon gikan sa iyang katigulangon, si Presidente Monson nagpadayon sa naandan nga pagtambong sa kinatibuk-ang komperensiya ug mga miting sa pagpangulo sa misunod nga lima ka tuig. Sa dihang namatay siya niadtong Enero 2, 2018, sa edad nga 90, si Presidente Monson gisaulog sa kadaghanan isip minahal nga ministro, lider, mamumulong, ug amahan. Ang mipuli kaniya, si Presidente Russell M. Nelson, midayeg ni Presidente Monson nga nagbilin og “kabilin sa pagtubo”: sulod sa hiniusang 54 ka tuig nga pagserbisyo sukad sa iyang ordinasyon isip Apostol, si Presidente Monson nakasaksi sa pagtubo sa Simbahan gikan sa 2.1 ka milyon nga miyembro ngadto sa dul-an sa 16 ka milyon, gikan sa 5,700 ka misyonaryo ngadto sa kapin sa 70,000, gikan sa 12 ka templo ngadto sa 159. “Apan niining tanan,” miingon si Presidente Nelson, “si Presidente Monson kanunay nga nakatutok sa indibiduwal. Gipahinumdoman kita niya sa mga ekspresyon sama sa ‘[Pagpadala og] sulat ngadto sa higala nga imong nataligam-an,’ ‘Gaksa ang imong anak,’ ‘Isulti ang “gihigugma ko ikaw” sa mas kanunay,’ ‘Ipahayag kanunay ang imong pasalamat,’ ug ‘Ayaw himoang mas importante ang sulbaronon nga problema kay sa tawo nga angay higugmaon.’”

Alang sa dugang impormasyon mahitungod sa kinabuhi ni Thomas S. Monson, tan-awa sa Prophets of the Restoration videos on history.ChurchofJesusChrist.org or in the Gospel Library app.

May Kalabotan nga mga Hisgotanan: Pagtukod og Templo, Cold War, Pagtubo sa Misyonaryo nga Buhat, Pagtubo sa Simbahan, Bishop