Mga Palid sa Kinderhook

Niadtong 1843, usa ka grupo sa kalalakin-an nakakubkob og unom ka tumbaga nga mga palid nga naporma og kampana nga may gitas-on nga tulo ka pulgada nga naggikan sa mga bundo nga lubnganan [burial mounds] sa mga American Indian nga duol sa Kinderhook, Illinois. Ang mga palid naglangkob og mga simbolo nga susama sa karaan nga sinulat, ug usa ka sakop sa grupo ang naghunahuna nga ang mga artifact makita nga haum kaayo sa paghubad ni Joseph Smith. Ang mga istorya naghisgut nga ang pagdiskubre nakapaikag ni Joseph Smith ug sa ubang mga Santos sa Ulahing mga Adlaw didto sa Illinois, apan walay nahubad nga teksto gumikan niining mga kasikas nga wala nagdugay.

Usa niadtong anaa sa dihang nakubkuban ang mga palid mitaho nga iyang nahibaloan nga ang tibuok kalihokan usa lang ka tiaw-tiaw. Si Wilbur Fugate miangkon nga siya, si Robert Wiley, ug usa ka lokal nga mananalsal [blacksmith] ang misalsal sa mga palid ug mideposito niini diha sa bundo nga lubong sa gabii sa wala pa ang pagdiskubre. Gianalisar ang kemikal ug pagkahimo sa metal sa usa sa nakalahutay nga palid nakumpirmar nga ang artifact dili karaan nga hinimo. Dugang pa, ang mga titik sa mga palid wala mohaum sa bisan unsang nahibaloan nga pinulongan ug lagmit inimbento lang nilang Fugate ug Wiley.¹

Sa mga tinubdan nianang panahona gamay ra kaayo ang nahisgutan mahitungod sa nahibaloan ni Joseph Smith sa mga palid sa Kinderhook, diin nahitabo sulod lang sa pipila ka mga adlaw niadtong 1843. Si Joseph ingon og misusi sa mga palid ug, sumala sa iyang klerk nga si William Clayton, misulti nga kini naglangkob sa “kasaysayan sa … usa ka kaliwat ni Ham pinaagi sa mga bat-ang ni Paraon nga hari sa Ehipto.”² Klaro nga si Joseph wala mosulay sa paghubad sama sa iyang gibuhat sa mga palid sa Basahon ni Mormon, apan hinoon makita nga mitandi sa mga simbolo sa mga palid sa Kinderhook sa uban nga mga karaang artifact nga iyang gipanag-iya. Usa ka simbolo sa mga palid hapit motukma sa usa ka glyph diha sa Ehiptuhanon nga papyri nga gihubad ni Joseph didto sa Kirtland, Ohio. Ang kanhi hubad ni Joseph niining simbolo naghisgut sa kaliwatan ni Ham pinaagi sa kaliwatan sa mga paraon.³

Mahimong natahap si Joseph nga kini mini, naghunahuna nga mosulay sa paghubad pinaagi sa pinadayag apan nakasinati og “kasamok sa hunahuna,”⁴ o basta lang mihimo og kaikag sa naasoy nga karaang mga sinulat (sama sa ubang bag-ong mga lingwista nianang panahona) nagpabilin nga wala makumpirmar sa makasaysayanon nga mga istorya. Bisan unsa ang iyang nahunahunaan sa mga palid, dali ra kaayo siyang nawad-an og kadasig niini.