Family Home Evening

Diha sa usa ka komperensiya sa mga elder kaniadtong Nobyembre 1831, nadawat ni Joseph Smith ang usa ka pagpadayag nga nagdala og “usa ka balaod ngadto sa mga lumulupyo sa Zion” nga “motudlo sila sa ilang mga anak sa pag-ampo, ug sa paglakaw nga matarong sa atubangan sa Ginoo” ug nagpasidaan nga ang mga anak “nagtubo sa pagkadaotan” ug pagkahakog.¹ Sa tibuok nahibilin sa ika-19 nga siglo, daghang mga Santos sa Ulahing mga Adlaw ang nag-awhag sa mga pamilya sa pagtudlo ug paghimo nga panig-ingnan sa mga baroganan sa ebanghelyo diha sa panimalay. Sa hapit na siya mamatay sa 1877, miingon si Brigham Young, “Kon dili nato paningkamotan ang pagbansay sa atong mga anak, sa pagtudlo ug sa pagpahimangno kanila kabahin niining pinadayag nga mga kamatuoran, ang kalaotan moabot kanato, isip mga ginikanan, o sa lain nga mga paagi.”² Ang mga Santos sa Ulahing mga Adlaw mitukod og nagkalainlaing mga organisasyon sa pagsuporta sa mga pamilya diha sa pagtudlo ug pagpadako sa mga anak, lakip ang Primary, Sunday School, ug Mutual Improvement Associations alang sa batan-ong mga babaye ug batan-ong mga lalaki.³

Sa pagsugod sa ika-20 nga siglo, si Frank Y. Taylor, ang presidente sa Granite Stake sa Siyudad sa Salt Lake, mipalanog og mga kabalaka nga daghang mga ginikanan mipugong sa gipasiugdahang mga organisasyon sa Simbahan alang sa pagtudlo sa mga baroganan sa ebanghelyo ug miaghat sa mga lider sa pagkapari sa pagtabang sa mga pamilya sa pag-amuma sa mga anak diha sa ebanghelyo ug sa “paghimo sa panimalay nga ang labing makalipay nga dapit nga makaplagan sa usa ka batang lalaki o batang babaye dinhi niining tibuok kalibotan.”⁴ Sa 1909, gipabuhat niya ang usa ka komitiba sa pagpalambo og usa ka plano alang sa usa ka kasagarang kalihokan sa stake––usa ka “home evening diha sa mga pamilya sa mga Santos.”⁵ Gihatag sa komitiba ang ilang mga rekomendasyon diha sa usa ka espesyal nga miting alang sa mga ginikanan nga gitambongan ug giuyonan sa Presidente sa Simbahan nga si Joseph F. Smith. Ang plano misugyot nga ang mga ginikanan maghinumdom sa sugo diha sa Doktrina ug mga Pakigsaad 68 pinaagi sa paghalad og usa ka gabii matag semana sa pagpundok sa ilang mga pamilya diha sa panimalay ug sa pagpakigbahin sa pag-ampo, pag-awit, pagbasa sa kasulatan, mubo nga mga leksiyon sa ebanghelyo, nakasentro nga mga kalihokan diha sa bata, ug mga pabugnaw. Ang komitiba miawhag sa mga ginikanan sa paglikay sa “tanang kaligdong ug kapormal” ug paglikay sa paghimo og ubang mga pakigsabot sa maong mga gabii.⁶

Ang pag-obserbar sa kalamposan sa mga home evening, si Presidente Smith ug ang iyang mga magtatambag sa Unang Kapangulohan misugo sa tanang mga presidente sa stake ug mga bishop kaniadtong 1915 sa paglain og usa ka gabii sa matag bulan alang sa mga pamilya ug mirekomendar ngadto sa mga ginikanan sa samang mga kalihokan sa programa sa Granite Stake.⁷ Ang mga pamilya ug mga lider sa organisasyon sa dakong bahin mihatag og mga ideya alang sa mga home evening diha sa mga magasin ug mga manwal sa Simbahan hangtod sa 1946, sa dihang ang Unang Kapangulohan ug ang Korum sa Napulog Duha ka Apostoles mipasiugda og usa ka “pagpabalik … niini nga proyekto nga gi-inagorahan ubos sa pagpangulo ni Presidente Joseph F. Smith.”⁸ Ang Relief Society gihatagan og tahas sa pagdumala sa bag-ong ginganlan og “family hour” nga programa sa mga ward ug mga branch ug sa pag-andam og suporta nga mga materyal alang sa mga ginikanan.⁹ Si Presidente Ezra Taft Benson tataw nga misuporta sa programa ingon nga usa ka “dakong responsibilidad” ug “espirituhanong pundasyon.” Nagserbisyo isip usa ka Apostol ug sekretaryo sa kabinete sa federal nga gobyerno sa Estados Unidos kaniadtong 1954, siya mipresentar og aktwal nga home evening uban sa iyang pamilya diha sa gi-televise sa tibuok nasod nga “Person to Person” [Tawo ngadto sa Tawo] nga programa.¹⁰

Sa 1964, ang Presidente sa Simbahan nga si David O. Mckay ug si Elder Harold B. Lee mihunahuna og dugang pa nga mga kauswagan ngadto sa nakatutok sa panimalay nga panudlo sa ebanghelyo. Sa kinatibuk-ang komperensiya, si Elder Lee mi-anunsiyo nga ang nagpadayong pakigtakdoay nga paningkamot modumala og bag-ong programa sa family home evening pinaagi sa pagpangulo sa pagkapari sa stake.¹¹ Gipagula sa Simbahan ang Home Evening Manual [Manwal sa Home Evening] nga naglangkob og mga panudlo, mga sugyot, ug mga leksiyon nga angay ngadto sa tanang mga edad. Sulod sa pipila ka tuig, ang manwal gihubad ngadto sa 17 ka mga pinulongan.¹²

Kadasig alang sa kasagarang gabii sa pamilya milugway lapas pa sa mga panimalay sa Santos sa Ulahing mga Adlaw. Kaniadtong 1973, usa ka artikulo diha sa New York Times [Mga Balita sa New York] mipatataw sa programa sa family home evening ingon nga nagdala og mas dakong panaghiusa ngadto sa mga pamilya, nga misilab og mga pangutana taliwala diha sa nagkalainlaing mga simbahan ug mga organisasyon ngadto sa gibag-ong Family Home Evening Manual [Manwal sa Family Home Evening].¹³ Niana nga tuig, ang mga misyonaryo migamit og usa ka bag-ong kurikulom, ang Uniform System for Teaching Families [Magkasamang Paagi sa Pagtudlo sa mga Pamilya], nga milakip sa mga family home evening isip dugang nga mga pamaagi sa pagsangyaw. Mga misyonaryo sa tibuok kalibotan mipasiugda sa programa uban sa mga lungsuranong mga kalihokan, mga artikulo sa pamantalaan, mga pasundayag sa kadalanan, ug mga pagtudlo sa panimalay.¹⁴ Niana usab nga tuig, gihisgotan sa mga Santos sa Ulahing mga Adlaw ang programa sa family home evening uban sa gobernador sa Virginia, kinsa sa wala madugay mipadayag sa Mayo 1974 nga “Family Unity Month.” Misunod ang ubang mga siyudad ug mga estado, uban sa mga mayor ug mga gobernador sa tibuok Estados Unidos nga naghimo og mga kalihokan sa paghiusa sa pamilya ug nagrekomendar sa mga family home evening taliwala sa ilang mga lungsoranon.¹⁵

Mga konseho sa stake kasagarang mipili og usa ka adlaw sa semana alang sa mga family home evening hangtod sa 1970, sa dihang ang Unang Kapangulohan ug ang Korum sa Napulog Duha ka Apostoles miawhag sa mga stake, mga misyon, mga ward, ug mga branch sa pagtagana sa mga gabii sa Lunes alang sa mga pamilya.¹⁶ Usa sa iyang unang mga lihok isip ang bag-ong Presidente sa Simbahan sa 1994, si Howard W. Hunter misugo nga ang tanang mga gambalay ug mga kagamitan sa Simbahan pagasirhan sa mga gabii sa Lunes ug nga ang mga konseho sa stake ug ward maniguro nga ang mga pagbalda sa mga family home evening pagalikayan.¹⁷ Milabay ang lima ka tuig, gibalik pagsulti ni Presidente Gordon B. Hinckley ug sa iyang mga magtatambag sa Unang Kapangulohan ang palisiya ug giaghat ang mga miyembro sa Simbahan sa pag-awhag sa ilang mga komunidad ug mga eskwelahan sa paglikay sa pagtakda og mga kalihokan nga makapalayo sa mga anak o mga ginikanan gikan sa panimalay sa mga gabii sa Lunes.¹⁸ Usa ka giusab nga iskedyul sa Dominggo nga miting nga gi-anunsyo sa 2018 migahin og oras alang sa pagtuon sa ebanghelyo diha sa panimalay. Sa paningkamot sa pag-apil ug pagsuporta sa mga single adult, giilisan sa Simbahan ang ngalan ngadto sa “home evening” diha sa Kinatibuk-ang Tamdanan nga Basahon ug sa ubang mga materyal. Giawhag sa Unang Kapangulohan ang “mga indibidwal ug mga pamilya sa paghimo og home evening ug sa pagtuon sa ebanghelyo diha sa panimalay ma-Dominggo,” bisan og ang mga gabii sa Lunes mipabiling walay laing mga miting o gamit sa gambalay.¹⁹ Ang tibuok nga pagdawat sa mga tradisyon sa home evening mipadayon sa pag-ila sa kalainan sa mga Santos sa Ulahing mga Adlaw, ilabi na sa pagtugyan sa relihiyoso nga panulundon. Ang kasagarang mga pagpundok nga giugmad sulod sa kapin sa usa ka siglo mihatag sa mga Santos sa Ulahing mga Adlaw og usa sa labing lig-on nga koneksyon sulod sa daghang mga henerasyon sa bisan hain nga grupo sa relihiyon karon.²⁰

Kalabot nga mga Hisgotanan: Primary, Young Women Organizations, Young Men Organizations, Sunday School