“Mga Branch sa Miyembro nga Nagserbisyo sa Militar,” Mga Hisgotanan sa Kasaysayan sa Simbahan (2022)
“Mga Branch sa Miyembro nga Nagserbisyo sa Militar,” Mga Hisgotanan sa Kasaysayan sa Simbahan
Mga Branch sa Miyembro nga Nagserbisyo sa Militar
Ang mga Santos sa Ulahing mga Adlaw misalmot sa nagkadaiyang mga organisasyon sa militar ug diplomatikong mga ahensiya sukad ang mga miyembro sa Simbahan unang miapil sa mga yunit sa militia niadtong mga 1800. Ang langyaw nga serbisyo niadtong ika-20 nga siglo mipaila sa bag-ong mga hagit nga pang-organisasyon ug sa pagpakigdait alang sa mga kongregasyon sa Simbahan, samtang ang militar ug diplomatikong mga panginahanglan kanunayng nagkinahanglan sa mga miyembro nga nagserbisyo sa militar ug sa ilang mga pamilya sa pagbalhin sa gawas sa nasod. Atol niining panahon sa kagubot, mas daghan sa mga Santos sa Ulahing mga Adlaw gikan sa lain-laing mga nasod nagpalista o natawag ngadto sa serbisyo, nga usahay misiguro sa pag-organisar og temporaryong mga branch ug sa pagmugna og mga linya sa komunikasyon. Human sa Ikaduhang Gubat sa Kalibotan, ang mga branch sa miyembro nga nagserbisyo sa militar naprobaran nga nakatabang sa pagpalapad sa lokal nga suporta sa mga dapit diin ang Simbahan wala kaayo nakabaton og daghang oportunidad sa pag-establisar og permanenting mga kongregasyon.
Ang Pagserbisyo sa Militar niadtong Ika-19 nga Siglo
Alang sa daghang bahin sa sayo nga kasaysayan sa Estados Unidos, diin ang unang henerasyon sa mga Santos sa Ulahing mga Adlaw mipundok, militar ug paramilitary nga mga yunit hiyograpikanhong giorganisar. Ang mga kumunidad sa mga Santos sa Ulahing mga Adlaw didto sa Missouri, Illinois, ug sa Utah mipundok sa mga yunit sa militia nga sa kasagaran gilangkoban sa mga miyembro sa Simbahan, uban sa lokal nga mga lider nga nagsilbi isip mga komander.1 Usahay, ang mga yunit sa militia nga gilangkoban sa mga boluntaryo nga mga Santos sa Ulahing mga Adlaw miserbisyo isip kabahin sa Regular nga Kasundalohan sa Estados Unidos.2 Pipila sa mga yunit sa mga Santos sa Ulahing mga Adlaw, sama sa ilado nga Mormon Battalion, nakig-away alang sa Estados Unidos diha sa Mexican-American War (1846–48), sa American Civil War (1861–65), sa Spanish-American War (1898), ug sa Unang Gubat sa Kalibotan (1914–18).3
Atol sa Spanish-American War, si Elias S. Kimball, ang unang gisangonan nga chaplain sa militar nga Santos sa Ulahing mga Adlaw didto sa Estados Unidos, nanlimbasog sa pagbalanse nga magpabilin nga walay gidapigan sa iyang pagkatawag ug sa piho nga mga panginahanglan sa mga sundalong Santos sa Ulahing mga Adlaw nga nadestino ngadto sa iyang rehimento. Wala makapahigayon og regular nga mga tulumanon sa pagsimba ug gibabagan sa pagtanyag og piho nga tambag nga tukma sa mga gituohan ug doktrina sa mga Santos sa Ulahing Adlaw, si Kimball kanunayng mibati og kasagmuyo, usa ka kasinatian nga naagian sa umaabot nga mga chaplain nga Santos sa Ulahing Adlaw.4 Ang mga lider sa Simbahan naghimo og mga pagpahiangay sa mga sundalo nga Santos sa Ulahing mga Adlaw sa uban nga mga yunit sa militar. Ilang giawhag ang mga ward ug mga branch nga adunay mga miyembro nga nagserbisyo diha sa militar sa pagpadala og kasulatan, literatura sa Simbahan, ug regular nga pagsulat ngadto sa ilang mga sundalo. Giawhag nila ang mga miyembro sa mga ward ug mga branch duol sa mga kampo sa militar sa pagdapit sa mga sundalo sa pag-apil diha sa lokal nga mga sebisyo ug sa pagpakigdait kanila kon gikinahanglan. Ang pagtugot usahay gihatag ngadto sa mga sundalo diha sa aktibong kombat o sa uban nga hilit nga mga dapit sa pag-organisar sa ilang kaugalingong Mutual Improvement Association (MIA) nga mga grupo, ang una nga naorganisar niadtong 1898 duol sa Manila, Philippines, atol sa Gubat sa Manila.5 Ubos sa mga suporta niining “Mutual Improvement Association of the Far East,” ang mga kalalakin-an nga miserbisyo sa militar nga mga Santos sa Ulahing mga Adlaw magtapok aron sa pagtuon sa kasulatan, moambit sa sakramento, ug motambong og mga sosyal nga mga kalihokan.6
Ang Duha ka Gubat sa Kalibotan
Atol sa Unang Gubat sa Kalibotan, pipila sa mga Santos sa Ulahing mga Adlaw miserbisyo sa isig ka habig sa dagkong kagubot sa lain-laing nasud alang sa unang higayon sa kasaysayan sa Simbahan.7 Ang regular nga pagpadala og sulat gikan sa mga ward ug mga branch nga gigikanan miabot sa mga sundalo nga nagserbisyo gikan sa Sentro nga mga gahom sa Alemanya ug Austria ug sa mga Kaalyado nga mga nasud sa Great Britain, Canada, New Zealand, Australia, ug sa Estados Unidos. Usahay, sama sa ika-13 nga Mounted nga mga Rifle (ang gitawag og “Alberta Regiment”) sa Canadian nga mga sundalo, pipila sa mga Santos sa Ulahing mga Adlaw mipahigayon og regular nga mga miting sa Simbahan. Si Lieutenant Hugh B. Brown, usa ka umaabot nga General Authority, nangulo sa mga paningkamot sa paghatag og espiritwal nga suporta ngadto sa mga Santos sa Ulahing mga Adlaw diha sa iyang rehimento.8
Ang pagsulod sa Armadong Puwersa sa Estados Unidos ngadto sa gubat niadtong 1917 nakaaghat sa mga lider sa Simbahan sa pag-ugmad og bag-ong mga programa sa pagsuporta sa mga Santos sa Ulahing mga Adlaw nga nagserbisyo sa militar. Tulo ka Santos sa Ulahing mga Adlaw gitawag isip mga chaplain sa Kasundalohan sa Estados Unidos, ug ang mga miyembro nga nagserbisyo sa militar sa tibuok kalibotan giawhag sa pagpangita sa lokal nga mga kongregasyon kon asa man nakaestasyon. Ang mga pundok sa MIA giorganisar duol sa base sa pagbansay o sa mga kombat arena diin ang mga miyembro nga nagserbisyo sa militar gipugngan sa pagtambong og regular nga mga ward o mga branch.9
Sa dihang ang Ikaduhang Gubat sa Kalibotan miulbo niadtong mga 1930, ang mga lider sa Simbahan nakakat-on na gikan sa Unang Gubat sa Kalibotan ug andam na sa pag-ugmad og usa ka mas bug-os nga network sa pagsuporta alang sa mga miyembro nga nagserbisyo sa militar. Niadtong 1940 ug 1941, samtang ang gidaghanon sa mga Santos nga miapil sa kagubot misugod sa pagsaka, ang mga lider mihimo og bag-ong mga agianan sa pagpang-apod-apod alang sa pagpadala og mga literatura sa Simbahan ug pagpadala og sulat ngadto sa mga miyembro nga miserbisyo sa militar sa laing nasod. Ang MIA nga mga grupo nakahatag sa nag-unang sentro sa panaghigalaay sa mga Santos sa Ulahing mga Adlaw nga anaa sa natad sa pagserbisyo. Ang Komite sa mga Kalalakin-an nga Nagserbisyo sa Militar—naorganisar niadtong 1941, uban ni Elder Harold B. Lee sa Korum sa Napulog Duha ka Apostoles isip chair ug si Hugh B. Brown isip coordinator—naghimo og usa ka plano sa pagsuporta sa miyembro nga nagserbisyo sa militar nga naglakip og usa ka pormal nga proseso alang sa pagtawag ug pag-set apart sa mga lider sa grupo sa MIA.10 Ang komite usab mimantala sa Handbook for Chaplains and Group Leaders [Tamdanan nga Basahon alang sa mga Chaplain ug mga Lider sa Grupo] ug gagmay nga mga edisyon sa kasulatan ug sa uban nga literatura alang sa mga miyembro nga nagserbisyo sa militar. Usa ka direktory, tinuig nga gi-update, nakahatag sa mga miyembro nga nagserbisyo sa militar og impormasyon sa pagkontak sa lokal nga mga branch, mga ward, ug mga misyon bisan asa man sila naka-estasyon. Ang lokal nga mga miyembro sa Simbahan miserbisyo isip kaabag nga mga koordinator aron mokonektar ngadto sa duol nga kampo sa militar uban sa lokal nga mga kongregasyon.11
Samtang ang gidaghanon sa mga chaplain nga Santos sa Ulahing mga Adlaw misaka atol sa Ikaduhang Gubat sa Kalibotan, ang Komite sa Kalalakin-an nga nagserbisyo sa Militar gipalabi ang pagtawag sa enlisted nga kalalakin-an isip mga lider sa grupo. Ang kahan-ayan nagtugot alang sa mas dayag nga mga miting sa pagsimba sa mga Santos sa Ulahing mga Adlaw nga magtigom nga wala magsupak sa mga polisiya sa militar nga nagkinahanglan og nondenominational nga mga serbisyo. Ang batan-ong mga lalaki nga na-set apart isip mga lider sa grupo sa wala pa mobiya sa panimalay makaorganisar og mga grupo ug makapahigayon og mga miting bisan asa man sila nakaestasyon, lakip na sa matang nga anaa sa panagsangka.12 Ang MIA nga mga grupo giorganisar sa matag panggubatan, lakip sa pipila ka mga binilanggo sa gubat sa mga kampo, ug daghan sa mga miyembro nga nagserbisyo sa militar nga mitambong ang mipahimulos sa matag oportunidad sa pagpaambit sa ebanghelyo uban sa isig kasundalohan ug sa lokal nga katawhan nga ilang gikahinagbo. Daghang mga miyembro nga nagserbisyo sa militar, sama ni L. Tom Perry, usa ka Marine sa Estados Unidos ug umaabot nga Apostol, nakigkolaborasyon sa mga kompanyon sa militar, sa uban nga mga simbahan, ug mga miyembro sa branch aron sa pagtukod og usab sa mga dapit nga naguba sa gubat.13
Langyaw nga Pagserbisyo ug Kalamboan sa Simbahan
Sukad sa Ikaduhang Gubat sa Kalibotan, ang Simbahan mipadayon sa pagpaluyo ug pagpanindot sa mga paningkamot sa pagsuporta sa mga Santos sa Ulahing mga Adlaw sa militar ug diplomatikong pagserbisyo.14 Sa mga parte sa Uropa, Asia, Latin America, Africa, ug sa Pasipiko, ang mga branch nga naorganisar alang sa mga pamilya sa mga Santos sa Ulahing mga Adlaw nga anaa sa militar ug sa diplomatikong pagserbisyo nahimong instrumento sa paghatag og lokal nga suporta ug pagpangulo alang sa pag-establisar sa Simbahan sa daghang nasod. Ang paspas nga pag-uswag sa mga miyembro sa tibuok kalibotan kasagaran direktang misunod gikan sa buhat ug sa mga paningkamot sa langyaw nga mga Santos sa Ulahing mga Adlaw.15
May Kalabotan nga mga Hisgotanan: Mexican-American War, American Civil War, Spanish-American War, World War I, World War II, Growth of Missionary Work