Pagtuga sa Gahum

Usa ka pagpadayag ngadto ni Joseph Smith niadtong 1831 misugo sa unang mga miyembro sa Simbahan nga “moadto taliwala sa tanan nga mga nasud” ug pundukon ang Israel. Sa wala pa sila “ipadala,” ang Ginoo misaad sa “pagtuga” kanila “sa gahum gikan sa kahitas-an.”¹ Ang gisaad nga pagtuga naglakip sa pipila ka mga hitabo sa sayong bahin sa 1836, lakip sa pagsaulog sa mga Santos sa Pentecostes kalabut sa pagpahinungod sa Balay sa Ginoo sa Kirtland, Ohio. Bisan og gitudlo ni Joseph Smith sa wala madugay ang ordinansa sa templo nga gitawag usab niya nga usa ka pagtuga, ang pulong “pagtuga sa gahum” sa kasagaran may kalabutan sa pagbu-bu sa espirituhanong mga gasa ug sa pagpahiuli sa mga yawe sa priesthood didto sa Kirtland.²

Ang mga pulong “masul-oban sa gahum” makita sa Lucas 24, sa dihang si Jesukristo mihatag og katapusan nga sugo ngadto sa Iyang mga disipulo sa pagsangyaw sa tanang nasud. Ang mga disipulo kinahanglang magsugod sa Jerusalem, diin sila “masul-oban sa gahum gikan sa kahitas-an.”³ Daghang mga Kristiyano nakasabut niini nga saad nga may kalabutan sa mga gasa sa Espiritu ug unang natuman sa Adlaw sa Pentecostes, sumala sa narekord sa Mga Buhat 2.⁴

Dugang nga pagpadayag ngadto ni Joseph Smith sa Kirtland nagpakita sa pagtuga sa gahum nga nagkinahanglan og ligdong nga katiguman sa Balay sa Ginoo.⁵ Si Joseph Smith ug ang mga Santos sa Kirtland nagsakripisyo sa pagkompleto sa templo ug nag-andam sa ilang kaugalingon sa espirituhanon alang sa pagtuga. Kabahin niini nga pagpangandam naglakip sa seremonya sa mga paghugas ug mga pagdihog, simbolo sa paglimpyo sa ilang kasingkasing nga makapahimo nila sa pagpakigsulti sa langit. Pipila ka bulan sa wala pa ang pagpahinungod sa templo, si William W. Phelps misulat, “Giandam namo ang kaugalingon nga limpyo, pinaagi sa paglimpyo pag-una sa among kasingkasing, pagsalikway sa among mga sala, pagpasaylo sa tanan; … pagsul-ob og limpyo desente nga mga sinina, pinaagi sa pagdihog sa among mga ulo ug pinaagi sa pagtuman sa tanang mga sugo.”⁶

Atol sa mga tulumanon sa pagpahinungod alang sa templo niadtong Marso 27 ug 31, 1836, ug sa ligdong nga katiguman niadtong Marso 30, si Joseph Smith ug ang uban mi-report og mahimayaong espirituhanong mga pagpakita , lakip sa langitnong mga panan-awon ug pagsulti og mga pinulongan.⁷ Niadtong Abril 3, sila si Joseph Smith ug Oliver Cowdery nakakita ni Jesukristo sa usa ka panan-awon ug sa mga pagbisita gikan sa pipila ka mga propeta sa biblia.⁸ Mitawag niini nga mga kasinatian nga “usa ka Pentecostes ug pagtuga gayud,” si Joseph sa wala madugay mipadala ni Heber C. Kimball ug sa uban sa unang misyon sa langyaw nga lugar sa kasaysayan sa Simbahan.⁹