Pamilya ni Joseph Sr. ug Lucy Mack Smith

“Pamilya ni Joseph Sr. ug Lucy Mack Smith,” Mga Hisgutanan sa Kasaysayan sa Simbahan

“Pamilya ni Joseph Sr. ug Lucy Mack Smith”

Pamilya ni Joseph Sr. ug Lucy Mack Smith

Ang kahimtang sa panimalay ug ang pag-atiman nga gihatag sa ginikanan ni Joseph Smith ug mga igsoon adunay dakong impluwensya sa sayo nga propetikanhong buhat ni Joseph. Ang iyang pagtagad sa pag-ampo ug pagtuon sa Biblia tungod gayud sa relihiyuso nga kamasaligon sa iyang mga ginikanan. Sa dihang gipamalita ni Joseph ang panan-awon sa mga anghel, ang balita gikalipay sa mga sakop sa pamilya kinsa, sama sa amahan ug inahan ni Joseph, nakatagamtam na og dakong espiritwal nga mga kasinatian sa ilang kaugalingon.¹ Sa ulahing bahin sa kinabuhi, si Joseph mihimo og makapatandog nga sulat bahin sa iyang tinguha nga ang mga ngalan ug mga buhat sa iyang mga ginikanan ug mga igsoon kanunayng mahinumduman. “Mga pulong ug sinultihan,” misulat siya, “dili igo aron ikapadayag ang pagpasalamat sa akong utang kabubut-on sa Dios sa paghatag kanako og ingon kahalangdon kaayo nga ginikanan.”²

Gikan sa sinugdanan sa kaminyoon nilang Joseph Sr. ug Lucy, ang pamilya nakasinati og pakyas nga mga ani ug kalisdanan sa ekonomiya. Namalhin sila og pipila ka higayon tali sa mga balangay sa Vermont ug sa New Hampshire sa wala pa makakita og mga kahigayunan didto sa Finger Lakes rehiyon sa New York. Niadtong 1816, ang pamilyang Smith mibalhin ngadto sa Palmyra, New York, ug sa wala madugay nanimuyo sa usa ka umahan duol sa Manchester. Niining dapita, sa mosunod nga dekada ug tunga, si Joseph Jr. nakasinati sa iyang labing unang mga panan-awon, mihubad ug mimantala sa Basahon ni Mormon, ug miorganisar sa Simbahan ni Kristo.³

Ang pamilyang Smith misunod sa Simbahan ngadto sa Kirtland, Ohio, niadtong 1831; ngadto sa Missouri niadtong 1838; ug ngadto sa Nauvoo, Illinois, sa sayong bahin sa 1840. Si Joseph Sr. ug si Lucy nag-uban og puyo sa ilang hamtong nga mga anak sa tibuok nilang kinabuhi. Makasubo lang nga, sulod sa gidugayon taliwala sa mga 1841 ug 1844, si Joseph Sr. ug upat sa iyang mga anak nga mga lalaki sila si (Don Carlos, Hyrum, Joseph, ug Samuel) namatay gumikan sa sakit o pagpatay. Kadaghanan sa nahibilin nga mga sakop sa pamilya mipili nga dili mobalhin ngadto sa Great Basin human sa kamatayon ni Joseph Smith.

Joseph Smith Sr. (1771–1840)

(Tan-awa sa “Joseph Smith Sr.,” Mga Hisgutanan sa Kasaysayan sa Simbahan.)

Lucy Mack Smith (1775–1856)

(Tan-awa sa “Lucy Mack Smith,” Mga Hisgutanan sa Kasaysayan sa Simbahan.)

Walay ngalan nga Anak nga Lalaki (mga 1797)

Ang unang anak nilang Joseph Sr. ug Lucy, anak nga lalaki nga natawo mga usa ka tuig human sa ilang kaminyoon, wala makalahutay sa pagkabata. Ang mga Smith wala mohatag og ngalan sa bata.⁴

Alvin Smith (1798–1823)

Ang unang anak sa pamilyang Smith nga nakalahutay sa pagkabata, si Alvin, natawo niadtong Pebrero 11, 1798, didto sa balay sa pamilya sa Tunbridge, Vermont. Ang mama ni Alvin mitawag kaniya og usa ka “batan-on . . . nga talagsaon kaayo og batasan” nga may “Mabination ug mahigalaon nga batasan.”⁵ Human mibalhin ang mga Smith ngadto sa Palmyra, ang paghago ni Alvin nahimong kritikal ngadto sa temporal nga suporta sa pamilya, ug siya ang nangulo sa pagtukod sa panimalay diha sa umahan sa mga Smith.

Si Alvin mituo sa istorya ni Joseph bahin sa pagpakita ni anghel Moroni ug midasig kaniya sa pagsunod sa mga instruksyon sa anghel. Sumala sa usa ka higala sa pamilya, misugo pa gani si Moroni kang Joseph sa pagdala ni Alvin uban niya kon ang panahon moabut na sa pagkuha sa mga palid sa Basahon ni Mormon.⁶ Apan pila lang ka bulan sa wala pa ang iyang ika-26 nga adlawng natawhan, namatay si Alvin nga sumala pa sa iyang mama tungod sa “bato sa atay (bilious cholick).”⁷ Ang doktor nga miatiman ni Alvin midapat og usa ka sangkap sa mercury ug chlorine nga gitawag og “calomel,” usa ka tambal nga giisip sa daghang mga doktor nga makuyaw nianang panahona apan sagad gigamit sa mga nagkinaugalingon nga mga doktor.⁸ Ang pagtambal nakapasamot sa kahimtang ni Alvin, ug si Alvin namatay sulod sa pipila ka adlaw. Sumala sa mga historian nga appendicitis ang malagmit maoy unang hinungdan sa iyang kamatayon.⁹

Si Lucy nakahisgut diha sa iyang biograpikanhon nga saysay [biographical sketch] nga ang pangasaw-unon ni Alvin mitambong sa iyang lubong, apan wala nay laing nahibaloan mahitungod sa pagkasinayuran (engagement) ni Alvin.¹⁰

Ang kamatayon ni Alvin nakapahugno sa pamilyang Smith. Sa iyang lubong, usa ka lokal nga ministro nakapasuko sa pamilya tungod sa pagpasumbingay nga maimpyerno si Alvin tungod kay wala siya mabunyagi.¹¹ Niadtong 1836, si Joseph nakasinati og usa ka panan-awon sa celestial nga gingharian ug nahingangha sa dihang iyang nakita si Alvin didto. Ang Ginoo mipadayag nga kadtong, sama ni Alvin, “kinsa namatay nga walay kahibalo sa ebanghelyo, kinsa makadawat unta kon sila natugutan nga magpabilin, mamahimong mga tigpanunod sa celestial nga gingharian sa Dios.”¹² Sa dihang gipahibalo ni Joseph ang doktrina sa proxy nga pagbunyag alang sa mga patay niadtong 1840, ang iyang igsoon nga si Hyrum gibunyagan alang ni Alvin didto sa Suba sa Mississipi.

Hyrum Smith (1800–1844)

(Tan-awa sa “Hyrum Smith,” Mga Hisgutanan sa Kasaysayan sa Simbahan.)

Sophronia Smith Stoddard McCleary (1803–1876)

Ang Unang anak nga babaye sa mga Smith, si Sophronia, natawo niadtong Mayo 16, 1803, samtang ang pamilya nagpuyo didto sa Tunbridge, Vermont. Pipila ka tuig ang milabay, mitakboy sa dapit ang epidemya nga tipos, ug si Sophronia ug ang iyang manghud nga si Joseph mao ang nagrabihan diha sa pamilya. Ang nuwebe anyos nga si Sophronia nanglimbasog sa tipos nga hilanat sulod sa tulo ka bulan sa wala pa siya kalit lang mihunong sa pagginhawa ug naghigda nga wala na maglihok. Giputos siya og habol sa iyang mama, gikugos siya, ug gilakaw-lakaw diha sa salog. Ang mga silingan mihangyo ni Lucy sa pagdawat nga patay na si Sophronia, apan ang bata sa wala madugay nakamata, mihanggap og hangin, ug mihilak. Naulian siya ug nabuhi hangtud sa edad nga 73 ka tuig.¹³

Si Sophronia mituo sa panan-awon sa iyang igsoon nga si Joseph. Sakitan siya kon ang nagpalibut nga komunidad bangis kaayong motratar sa pamilya. Pipila ka bulan ang milabay human nadawat ni Joseph ang mga palid gikan ni anghel Moroni, si Sophronia naminyo ni Calvin Stoddard, nga sa katapusan miapil sa Simbahan. Si Sophronia ug si Calvin ug ang ilang 14 ka bulan nga batang babaye, si Eunice, mibyahe ngadto sa Kirtland, Ohio, inubanan ni Lucy, apan mga duha ka bulan human miabut didto sa Kirtland, si inday Eunice namatay sa wala mahibaloi nga hinungdan. Si Sophronia nanganak sa ikaduha nga bata, si Mariah, paglabay sa usa ka tuig, apan sa wala pa mobiya ang mga Santos sa Ohio, namatay si Calvin sa New York, hinungdan nga nabiyuda si Sophronia sa edad nga 34.¹⁴

Si Sophronia naminyo ni William McCleary niadtong 1838, ug ang duha mibalhin ngadto sa Missouri ug dayon ngadto sa Illinois.¹⁵ Si Sophronia ug si William mora og nagplano sa pagpamalhin ngadto sa Winter Quarters, apan namatay si William sa wala pa sila mobiya, mao nga si Sophronia mipili nalang sa pagpabilin sa Illinois, diin mapaduol siya ngadto sa iyang pamilya. Sa misunod nga 30 ka tuig, mipuyo siya duol sa iyang mga igsoong babaye, si Katharine ug Lucy, hangtud nga siya namatay niadtong 1876.¹⁶

Joseph Smith Jr. (1805–1844)

(Tan-awa sa “Joseph and Emma Hale Smith Family,” Mga Hisgutanan sa Kasaysayan sa Simbahan.)

Samuel Harrison Smith (1808–1844)

Nagtuo nga ang Basahon ni Mormon makamugna og gamay nga reporma sa natukod na nga mga simbahan, si Samuel Smith mipadayag og kabalaka sa dihang nahibaloan niya nga tuyo sa iyang manghud nga si Joseph mao ang pagtukod og bag-ong simbahan. Miadto siya sa duol nga kakahoyan ug nag-ampo aron masayud kon ang Ginoo migiya ba ni Joseph. Sa iyang pagbalik, mihangyo gayud dayon siya nga magpabunyag, nahimong unang tawo nga nabunyagan pagkahuman nga nabunyagan si Joseph ug si Oliver. Si Samuel nagpabilin nga matinud-anon sa tibuok niyang kinabuhi.¹⁷

Si Samuel usa sa Walo ka mga Saksi sa Basahon ni Mormon ug miserbisyo sa unang mga misyon sa pagsangyaw sumala sa kasaysayan sa Simbahan.¹⁸ Atol sa iyang mubo nga misyon niadtong 1830, mihatud siya sa Basahon ni Mormon ngadto sa pamilyang Young, diin napaila ang gipahiuli nga ebanghelyo ngadto sa umaabut nga Presidente sa Simbahan nga si Brigham Young ug umaabut nga Apostol nga si Heber C. Kimball.¹⁹

Samtang nagserbisyo og laing misyon duha ka tuig ang milabay, si Samuel mitabang sa pag-establisar sa pipila ka mga branch didto sa amihanang-silangan nga bahin sa Estados Unidos.²⁰ Atol niining misyon, nahimamat ni Samuel ang iyang umaabut nga asawa, si Mary Bailey. Sila si Samuel ug Mary nanganak og upat.²¹ Si Samuel usa ka sakop sa School of the Prophets didto sa Kirtland ug nakaserbisyo isip sakop sa high council. Sa Nauvoo, mitabang siya ni Bishop Vinson Knight isip magtatambag ug miserbisyo usab isip city alderman, usa ka gwardiya sa Nauvoo Legion, usa ka sinaligan sa University of Nauvoo, ug usa ka sakop sa Nauvoo City Council.²²

Si Samuel naminyo ni Levira Clark human namatay si Mary niadtong 1841 atol sa pagpanganak.²³ Mibalhin sila sa Plymouth, Illinois, ug nagpuyo didto sa dihang nahibaloan ni Samuel nga ang iyang mga igsoon nga si Joseph ug si Hyrum napriso didto sa Carthage Jail. Mibyahe si Samuel sakay sa kabayo aron tabangan sila, ug sumala sa naulahing mga asoy, nakahinagbo siya og duha ka tawo diha sa kakahoyan, nga diha-diha dayon migukod. Naglisud siya og lingkawas sa mga miatake niya, unya nadiskubrihan na lang niya sa iyang pag-abut sa Carthage nga ang iyang mga igsoon gipatay na. Sa kakurat ug tumang kaguol, nakigsabut si Samuel sa duol nga hotel aron sa pagprotekta sa mga lawas hangtud nga madala kini niya sa Nauvoo.²⁴ Subo kaayo nga, wala kaabut og usa ka bulan human adto, mismong si Samuel namatay. Usa ka lokal nga newspaper mihingalan sa hinungdan sa kamatayon nga “sakit sa atay (bilious fever),” bisan og ang iyang mga higala ug pamilya mibasol sa makahahadlok nga engkwentro sa iyang pagbyahe nga maoy hinungdan sa makamatay nga sakit.²⁵

Ephraim Smith (1810)

Si Ephraim Smith, ang ikapito nga anak ug ikaunom nga anak nga lalaki nilang Joseph Sr. ug Lucy, nabuhi lang sulod sa pipila ka adlaw. Natawo siya sa Marso 13 ug namatay pagka Marso 24, 1810. Ang pamilyang Smith nagpuyo sa Royalton, Vermont, panahon sa mubo nga kinabuhi ni Ephraim.²⁶

William B. Smith (1811–1893)

Si William Smith midawat sa propetikanhong pag-angkon sa iyang magulang nga igsoon nga si Joseph ug nabunyagan. Nakahupot siya og pipila ka mga katungdanan sa Simbahan sa tibuok niyang kinabuhi ug nahimong usa sa orihinal nga mga sakop sa Korum sa Napulog Duha ka mga Apostoles. Nakaserbisyo usab siya og pipila ka mga misyon, miapil sa pagmartsa ngadto sa Missouri uban sa Camp of Israel, ug naorden nga Patriarch sa Simbahan.²⁷

Niadtong 1833, si William naminyo ni Caroline Amanda Grant, sakop sa pamilya nga iyang nahimamat atol sa usa sa iyang mga misyon. Sa wala pa mamatay si Caroline niadtong 1845, si William misugod sa paghimo og dinaghan nga kaminyoon, naminyo sa ikaduha nga asawa pipila ka bulan sa wala pa ang pagpatay sa iyang mga igsoon nga si Joseph ug si Hyrum.²⁸ Taliwala sa mga 1844 ug 1889, si William naminyo og kaupat pa ka higayon, bisan og ang duha sa kaminyoon natapos sa diborsyo. Si William adunay pito ka anak.²⁹

Agig dugang sa iyang pagserbisyo sa Simbahan, si William aktibo sa katilingbanon nga kalihokan. Didto sa Nauvoo, nagserbisyo siya isip sakop sa konseho sa siyudad. Siya ang editor sa Nauvoo Wasp sulod sa mubo nga panahon apan gipulihan human sa sunod-sunod nga panaglalis nila ni Thomas C. Sharp, laing editor sa lokal nga newspaper. Si William mirepresentar sa Distrito sa Hancock sa Illinois State Legislature, diin iyang gidepensahan ang city charter sa Nauvoo batok sa panawagan sa pagpahunong niini.³⁰

Ang bugtong anak ni Joseph Sr. ug Lucy nga nabuhi nga lapas sa ting-init sa 1844, si William ang unang mitabang ni Brigham Young isip puli ni Joseph. Apan, ang dili pagsinabtanay uban sa isig ka sakop sa Napulog Duha misangput sa pagkausab sa hunahuna ni William. Gi-excommunicate siya niadtong 1845 human sa mubo ug dili malampuson nga tinguha sa pagpangulo sa Simbahan. Sa kaulahian mipasakop siya sa ubang nagkalain-laing mga simbahan sa wala pa makakaplag sa permanenting dapit uban sa Reorganized nga Simbahan ni Jesukristo sa mga Santos sa Ulahing mga Adlaw, nga gipangulohan sa iyang pag-umangkon nga si Joseph Smith III.³¹

Sa dihang miulbo ang American Civil War niadtong 1861, gihimakak ni William ang iyang tinuod nga edad aron mora og bata pa nga pwede makaapil sa Union Army. Atol sa iyang pagserbisyo sa militar, Si William migamit sa iyang middle initial nga “B” aron malahi ang iyang kaugalingon gikan sa daghang mga sundalo nga ginganlan og William Smith. Namatay siya niadtong Nobyembre 13, 1893, sa edad nga 82.³²

Katharine Smith Salisbury Younger (1813–1900)

Ang ikaduhang anak nga babaye, si Katharine, mipasakop sa Simbahan nga teenager pa. Gisaysay diha sa tradisyon sa pamilya nga usa ka okasyon niana si Joseph mihangyo nilang Katharine ug Sophronia nga itago ang bulawan nga mga palid gikan sa mga manggugubot nga panon, diin gibuhat kini sa managsoon pinaagi sa pagtabon sa mga palid sa ilawom sa hapin sa ilang higdaanan ug gihigdaan nga nagpakaaron ingnon nga nangatulog.³³ Si Katharine mibalhin ngadto sa Kirtland, Ohio, uban sa iyang mama, si Lucy, ug sa samang tuig naminyo sa usa ka bag-ong kinabig nga ginganlan og Wilkins Jenkins Salisbury.³⁴

Ang kinabuhi ni Katharine namatud-an nga naa sa kalisud. Si Wilkins nanglimbasug sa pagpangita og trabaho ug mahimong nag-antus sa pagkapala-inom. Dili mominus sa usa ka dekada siya nga migawas sa pagkigdait sa Simbahan ug namatay nga adunay panagbangi sa mga lider didto sa Utah. May mga higayon, nga si Katharine sa pagpadako sa iyang mga anak nahimutang sa malisud nga kahimtang. Usa ka bisita sa panimalay sa Salisbury niadtong 1843 naguol nga ang mga anak ni Katharine walay mga sapatos bisan sa kagrabe sa tingtugnaw. Ang pamilyang Smith misuporta ni Katharine latas niining mga kalisdanan, ang mga lider sa Simbahan mitabang usab, sa kaulahian gipadalhan siya og kwarta aron ikapatukod og balay didto sa Illinois.³⁵

Sama sa iyang inahan ug ubang mga igsoon, si Katharine mipabilin sa Illinois human sa kamatayon nilang Joseph ug Hyrum. Human mamatay si Wilkins niadtong 1853, si Katharine mipuyo duol sa iyang inahan ug mga igsoong babaye, diin mipabilin siya sa tibuok niyang kinabuhi. Sa dihang ang iyang anak, nga si Don Carlos, mi-edad na og 14 , gipadala niya kini aron mopuyo uban sa iyang magulang nga babaye, si Sophronia, tingali tungod sa kaugalingong kalisud sa panalapi sa iyang pamilya. Bisan og si Katharine wala gayud nakabyahe sa kasadpan, nagpadayon siya og mahigalaon nga pakigsinulatay sa iyang mga paryente nga mga Smith sa Utah. Kini nga mga kaparyentihan kanunayng mibisita kang Katharine samtang nagbyahe sa mga misyon. Namatay siya niadtong 1900 sa edad nga 86.³⁶

Don Carlos Smith (1816–1841)

Ang mga sakop sa pamilya mihulagway ni Don Carlos Smith isip buotan, manggihatagon ug mabination. 14 anyos pa lang sa dihang gimantala ni Joseph ang Basahon ni Mormon, si Don Carlos mitabang sa iyang magulang sa sayo pa. Siya ang “usa sa unang,” pamahayag ni Joseph, “nakadawat sa akong pagpamatuod.”³⁷ Sa ulahing bahin sa samang tuig, si Don Carlos mikuyog sa iyang amahan sa usa ka byahe ngadto sa Stockholm, New York, diin ang duha mipakigbahin sa balita sa Simbahan ngadto sa mga kaparyentihan. Sa wala madugay, si Don Carlos mibalhin ngadto sa Kirtland, Ohio, uban sa iyang inahan ug mga igsoong babaye.³⁸

Samtang nagpuyo sa Kirtland, si Don Carlos nakat-on sa negosyo sa pag-imprinta ubos ni Oliver Cowdery. Mitabang si Don Carlos sa pagmantala og daghan sa nahaunang literatura sa Simbahan, lakip na sa unang edisyon sa Doktrina ug mga Pakigsaad. Niadtong Hulyo 30, 1835, naminyo siya ni Agnes Moulton Coolbrith, usa ka kinabig gikan sa Boston nga mipuyo kauban sa mga ginikanan ni Don Carlos.³⁹ Si Don Carlos ug si Agnes adunay tulo ka mga anak nga babaye.

Human namalhin ngadto sa Nauvoo, si Don Carlos mipadayon sa iyang propesyon isip usa ka tig-imprinta. Siya mi-edit ug mimantala sa Times and Seasons nga pamantalaan ug nakapundo og kwarta alang sa ikatulo nga edisyon sa Basahon ni Mormon.⁴⁰ Nakaserbisyo usab siya og mugbo nga mga misyon didto sa Pennsylvania, New York, Virginia, Ohio, Kentucky, ug sa Tennessee ug nahimong presidente sa korum sa mga high priest.⁴¹ Namatay siya sa malaria niadtong Agosto 1841 sa edad nga 26; ang iyang pag-umangkon nga lalaki ug kapangalan, ang masuso nga anak nga lalaki ni Joseph ug Emma, namatay sa samang sakit mga walo lang gayud ka adlaw human niadto.⁴²

Lucy Smith Millikin (1821–1882)

Sa panahon nga natawo si Lucy Smith niadtong Hulyo 18, 1821, ang iyang igsoon nga si Joseph nakasinati na sa iyang Unang Panan-awon. Nagdako si Lucy diha sa daghang nagsingabut nga relihiyusong pangalagad ni Joseph, ug nagpuyo siya uban sa iyang mga ginikanan sa tibuok panahon didto sa Kirtland ug Missouri sa bag-o pa ang Simbahan. Wala madugay human miabut sa Commerce (sa kaulahian ang Nauvoo), Illinois, si Lucy naminyo ni Arthur Millikin, usa ka kinabig gikan sa Maine. Miapil siya sa Nauvoo Relief Society, ug niadtong 1843 mikuyog siya sa iyang bana sa usa ka misyon didto sa Maine. Mipabilin si Lucy sa Illinois human sa mga kamatayon sa iyang mga igsoon nga sila si Joseph ug Hyrum. Taliwala sa mga 1846 ug 1852, iyang gidala sa iyang panimalay ang tigulang na niya nga inahan. Mga upat ka tuig human namatay ang iyang inahan, si Lucy mipuyo duol sa Colchester, Illinois, diin siya ug ang iyang bana nakapalambo og respetadong reputasyon taliwala sa ilang mga silingan. Dihay mga panahon sa mga 1880, nga si Lucy misugod sa pag-atiman sa iyang umagad nga babaye nga natakbuyan og sakit sa pagginhawa. Natakdan siya sa sakit ug namatay niadtong Disyembre 9, 1882.⁴³

May Kalabutan nga mga Hisgutanan: Joseph Smith Sr., Lucy Mack Smith, Joseph Smith Jr., Hyrum Smith