“Ang Kampanya ni Joseph Smith niadtong 1844 alang sa Pagka-Presidente sa Estados Unidos,” Mga Hisgutanan sa Kasaysayan sa Simbahan
“Ang Kampanya ni Joseph Smith niadtong 1844 alang sa Pagka-Presidente sa Estados Unidos”
Ang Kampanya ni Joseph Smith niadtong 1844 alang sa Pagka-Presidente sa Estados Unidos
Si Joseph Smith mipahayag sa iyang kandidatora alang sa pagka-presidente sa Estados Unidos niadtong Pebrero 1844. Si Joseph mismo ug ang kinatibuk-an sa mga Santos nakasinati og daghang pagpangharas ug pagpanggukod sa mga katuigan didto sa Missouri ug sa Illinois. Misulat si Joseph ngadto sa lima ka mga kalalakin-an nga gilauman nga mahimong mga kandidato alang sa pagka-presidente sa piniliay niadtong 1844, nangutana sa matag lalaki nga unsay iyang buhaton aron mapanalipdan ang katungod sa pagka-lungsuranon sa mga Santos sa Ulahing mga Adlaw kon siya mapili. Tulo sa mga kalalakin-an mitubag, apan walay usa nila nga misaad sa pagtabang sa mga Santos. Isip resulta, ang Korum sa Napulog Duha ka mga Apostoles minominar kang Joseph Smith nga mahimong usa ka kandidato. Iyang gidawat ang pag-nominar ug mipadayon sa pagpalambo og usa ka politikal nga kampanya. Agig paghulagway sa iyang mga rason sa pagdawat sa nominasyon, namahayag si Joseph Smith diha sa publiko, “dili ako motugot nga ang akong ngalan nga gamiton sa akong mga higala sa bisan unsa nga paagi isip presidente sa Estados Unidos o kandidato niana nga katungdanan kon ako ug ang akong mga higala makaangkon lang og pribilehiyo nga matagamtam ang among mga katungod sa relihiyon ug sibil isip mga lungsuranon sa Amerika.”1
Ang plataporma sa kampanya ni Joseph gi-summarize diha sa usa ka pampleto nga giulohan og General Smith’s Views on the Power and Policy of Government. Gipanghingusgan ang federal nga panggobyerno aron mapanalipdan ang mga katungod sa mga relihiyusong minoridad nga mao ang sentro sa iyang kampanya, apan iyang gipakigbahin ang iyang opinyon sa kadaghanan bahin sa daghan kaayong mga isyu nga kontrobersiyal. Ang iyang plataporma naglakip og usa ka panawagan sa pagsira sa nagkadako nga sistema sa prisohan sa nasud, pagpakunhod sa gidak-on sa House of Representative, pagtukod og usa ka bag-ong national bank, ug pagtuboy sa pagpalapad sa mga kondisyon sa pagdawat og pagtugot sa mga American Indian. Nanawagan usab si Joseph alang sa pagwagtang sa pagpangulipon diha sa Estados Unidos pinaagi sa gobyerno gamit ang mga buhis nga gikuha gikan sa halin sa federal nga kayutaan sa habagatang bahin sa Estados Unidos aron mapalit ang kagawasan sa naulipon nga mga kalalakin-an ug kababayen-an.2
Ang Views on the Power and Policy of Government of the United States ni Joseph Smith.
Ang mga lider sa Simbahan miila sa impluwensya sa print media sa pagpakatap sa ilang mensahe sa tibuok nasud, mao nga nagprinta ug miapud-apud sila og liboan ka mga kopya sa pampleto sa kampanya ni Joseph Smith. Sa Siyudad sa New York, ang mga lider sa Simbahan nagsugod og usa ka pamantalaan nga gitawag og Propeta, nga gipahinungod sa pagtaho sa kandidatora ni Joseph ug gikumparar ang iyang mga opinyon sa polisiya ngadto sa ubang mga kandidato diha sa lumba. Agig dugang sa giimprinta nga mga mensahe sa pagpangampanya, kapin sa 300 ka mga miyembro sa Simbahan ang miserbisyo og misyon sa pagpangampanya sa tibuok nasud.
Ang kapakyas ni Presidente John Tyler nga maangkon ang nominasyon sa iyang partido nagpasabut nga walay kasamtangang naghupot sa katungdanan, mao nga ang bugnong lugaynon sa pagka-presidente sa 1844 bukas kaayo. Bisan pa niana, dili posible nga ang kandidato nga modagan nga gikan sa gawas sa sistema sa duha ka partido makadaog sa lumba. Ang uban naghunahuna nga ang kampanya dili seryuso nga mapili si Joseph Smith, hinoon usa ka paningkamot nga gituyo sa pagdugang og kahibalo sa publiko kabahin sa kalisud sa mga Santos sa Ulahing mga Adlaw taliwala sa nagtubo nga pagpanggukod sa usa ka nasud nga nanghambog mahitungod sa talagsaon nga lebel sa kagawasan. Samtang ang mga Santos miila nga bisan og ang dili malampuson nga kampanya sa pagka-presidente makapadugang sa maong kahibalo, ang mga lider sa Simbahan miinsister nga tumong nila ang pagpili kaniya. Nagpili sila og mga elector gikan sa matag estado, usa ka aksyon nga wala gayud kalabutan sa katuyoan sa lihok sa publiko apan, hinoon, moserbisyo sa pagbalhin sa popular nga mga boto ngadto sa electoral nga mga boto kon ang kampanya molampos sa pag-angkon og igong suporta sa bisan pila sa 24 ka estado nga sa una naglangkob sa Estados Unidos. Ang mga lider sa Simbahan klaro nga mituo nga makadaug si Joseph Smith kon kini kabubut-on sa Dios, apan sila wala gayud motuo nga makadaug siya. Tungod niini, mipadayon sila sa laing mga plano aron mahaw-as ang mga Santos sa mga pagpamugos ug mga pagpanggukod nga ilang gibati, lakip ang pagpetisyon sa Kongreso sa Estados Unidos nga himoon ang siyudad sa Nauvoo nga usa ka federal nga teritoryo, naghangyo sa Kongreso nga himoon si Joseph nga usa ka heneral sa Kasundalohan sa Estados Unidos, ug nagsuhid og mga posibilidad nga maghiusa sa pagbiya sa Estados Unidos. Ang kampanya ni Joseph alang sa pagka-presidente, sa ato pa, usa sa daghang potensyal nga paagi nga gisuhid sa mga lider sa Simbahan sa pagdala sa mga Santos sa kalinaw ug proteksyon nga gikinahanglan alang kanila sa pagsimba sa Dios sumala sa pagmando sa ilang kaugalingong mga tanlag.3