Ang Kagubot sa Distrito sa Jackson

Sa Hulyo niadtong 1831, si Joseph Smith nakadawat og pagpadayag nga nag-ingon nga ang mga lugar palibut sa siyudad sa Independence sa Distrito sa Jackson, Missouri, mao ang gipanaad nga lokasyon sa siyudad sa Zion ug ang “tunga-tunga nga dapit” alang sa pagpundok sa mga Santos.¹ Sa misunod nga duha ka tuig, ang mga Santos milalin ngadto sa Distrito sa Jackson aron sa pagtukod sa siyudad sa Zion, ug sa dihang ting-init na sa 1833, mga 1,200 ka mga Santos ang namuyo sa distrito.

Paghulagaway sa artist sa Hulyo 20, 1833, nga pag-ataki sa buhatan sa pang-imprinta sa Simbahan diha sa Independence, Missouri.

Kining mga miyembro sa Simbahan nakig-uban sa dili Mormon nga mga lumulupyo, ug daghan ang makita nga kalainan tali sa duha ka grupo. Gidala sa mga Santos sa Ulahing mga Adlaw ang ilang lahi nga relihiyuso nga mga pagtuo, lakip na ang pagtuo sa padayon nga pagpadayag, espirituhanon nga mga gasa, ug ang ideya nga gisaad sa Dios kanila ang kayutaan palibut sa Independence isip kabilin. Agig dugang, daghan sa mga Santos gikan sa amihanang mga estado, diin ang pagkaulipon ilegal o giundang na, samtang kadaghanan sa mga dili Mormon gikan sa Habagatan. Ang mga taga-Missouri nangahadlok nga ang nagkadaghan nga mga Santos sa dili madugay modominar sa distrito sa politikanhon ug ekonomikanhon nga paagi. Ang labing lig-on nga mga kaatbang sa mga Santos mao ang mga sibiko ug relihiyoso nga mga lider kinsa gusto mopapahawa sa mga miyembro sa Simbahan gikan sa distrito.

Usa ka artikulo nga migawas pagka-Hulyo sa pamantalaan sa mga Santos sa Ulahing mga Adlaw nga The Evening and the Morning Star mipasamot sa kahadlok sa mga taga-Missouri mahitungod sa pagwagtang sa mga ulipon. Ang editoryal mihisgut sa legal nga mga babag nga may kalabutan sa paglalin sa gawasnong mga kinabig nga itom ngadto sa Missouri, usa ka estado nga legal ang pag-ulipon. Daghang mga lumad nga lumulupyo mibati nga ang editoryal––ug, agig kabahin, ang Simbahan––tuyo nga mipasiugda niining paglalin sa gawasnong mga kinabig nga itom. Pagka-Hulyo 20, usa ka grupo sa mga vigilante mipugos sa pagpapahawa sa mga Santos diha sa Distrito sa Jackson, ug sa dihang midumili ang mga lider sa Simbahan, ang mga vigilante miataki sa buhatan sa pang-imprinta sa Simbahan [Church printing office], milabay sa makina nga pang-imprinta sa gawas sa bintana, mikatag sa mga tipo [metal blocks with raised characters for printing] sa dalan, ug miguba sa mga bongbong sa buhatan sa pang-imprinta. Dayon ang uban mibutang og alkitran ug balahibo ni Edward Partridge, ang bishop sa Simbahan sa Missouri, ug ni Charles Allen, laing miyembro sa Simbahan, diha sa publiko nga hawanan. Ang mga vigilante nagbulag human mapugos ang mga lider sa Simbahan sa pagpakigsabut nga katunga sa mga Santos mopahawa sa distrito kutob sa Enero 1, 1834, ug ang nahabilin kutob sa Abril 1.

Sa misunod nga pipila ka bulan, ang mga lider sa Simbahan sa Missouri nangita og legal nga mga opsyon sa giatubang nga planong pagpapahawa. Nakadawat sila og tambag gikan ni Joseph Smith sa paghipos sa ilang mga dokumento ug pagpabilin sa ilang mga yuta. Pagka Oktubre 20, 1833, ilang gianunsyo sa publiko nga ang mga Santos magpabilin sa distrito. Mipalihok kini dayon sa mga vigilante, ug pagka-Oktubre 31, 1833, ang kagubot mipadayon. Sa misunod nga pipila ka adlaw, ang mga vigilante miataki sa mga pinuy-anan sa mga miyembro sa Simbahan sa Distrito sa Jackson.

Pagka Nobyembre 4, ang mga vigilante sa Missouri miataki sa mga panimalay sa mga Santos sa Ulahing mga Adlaw duol sa Big Blue River. Sa panag-away nga misunod, duha ka mga dili Mormon ug usa ka miyembro sa Simbahan ang nangamatay; ubay-ubay nga mga indibidwal sa duha ka habig ang nangasamdan. Sa sunod adlaw, si Koronel Thomas Pitcher mitawag sa lokal nga militar aron sa pagpahiuli sa kahapsay, apan ang militar mipugos hinuon sa dul-an 150 ka mga miyembro sa Simbahan sa pagtugyan sa ilang mga hinagiban, human niana ang militar mipriso sa ubay-ubay nga mga lalaking Mormon. Ang mga miyembro sa Simbahan––mga lalaki, mga babaye, ug mga bata––misugod sa pagsibat sa distrito sa sama nga adlaw, kadaghanan kanila mitabuk sa Suba sa Missouri ngadto sa Distrito sa Clay. Kini nga pagpanghawa mipadayon sa pipila ka semana, nga ang mga Santos nakasinati og hilabihang pag-antus. Usa ka grupo sa kababayen-an ug mga bata nagkasaag-saag diha sa kasagbutan sulod sa pipila ka adlaw aron makaikyas sa kagubot, nagbilin og mga bahid sa dugo human nga ang hait nga mga sagbut misamad sa ilang nagtiniil nga mga anak.

Ang mga Santos naningkamot sa pagsabut sa pagpapahawa gikan sa Distrito sa Jackson. Si Joseph Smith misulti kang Edward Partridge nga ang Dios dili mopakita kaniya kon “unsa ang dakong hinungdan niining hilabihan nga kasakit”, o ba kaha magsulti unsaon pagkuha og balik sa mga Santos sa ilang yuta.² Si Joseph mipadayon sa pagpangita og pagpasabut mahitungod sa hinungdan sa pagpapahawa ug pagkasayud kon unsa ang angayang tubag sa mga Santos. Sa gabii sa Disyembre 16–17, 1833, si Joseph Smith midiktar sa pagpadayag nga miingon nga ang Ginoo mitugot nga mapapahawa ang mga Santos gikan sa Distrito sa Jackson tungod kay “adunay mga pagtay-og, ug mga panagbingkil, ug mga kasina, ug mga panagbangi, ug higal ug maibugon nga mga tinguha diha kanila”.³ Ang pagpadayag miingon usab nga ang pagpapahawa usa ka pagsulay alang sa mga Santos sama sa Dios nga nagsugo kang Abraham sa paghalad ni Isaac. Kini dayon mipresentar og sambingay sa usa ka halangdon nga tawo [nobleman] kansang ubasan gipanggun-ob sa mga kaaway ug misugo sa iyang mga sulugoon sa pagtawag sa mga kusgan nga mga tawo sa iyang panimalay aron sa pagluwas sa iyang ubasan. Ang Pebrero 1834 nga pagpadayag miingon nga si Joseph Smith usa ka sulugoon sa halangdon nga tawo ug siya kinahanglan nga motawag sa mga kusgan nga mga tawo sa balay sa Ginoo.⁴ Kini nga mga pagpadayag nahimong hinungdan sa ekspedisyon sa Kampo sa Israel (Zion’s Camp) gikan sa Mayo hangtud sa Hulyo 1834.

May kalabutan nga mga Hisgutanan: Vigilantism, Mormon Missouri War of 1838, Zion’s Camp (Camp of Israel)