Ikatulo nga Kombensiyon

Sa ika-19 ug sayong bahin sa ika 20 nga mga siglo, ang mga Santos sa Ulahing mga Adlaw sa kasagarang bahin sa kalibotan gihan-ay ubos sa liderato sa usa ka presidente sa misyon gikan sa Estados Unidos kinsa gidestino ngadto sa ilang nasod.¹ Gikan sa 1936 hangtod sa 1946, mga ikatulo nga bahin sa mga Santos sa Ulahing mga Adlaw didto sa Mexico naghimo og grupo nga giila isip ang Ikatulo nga Kombensiyon, nga nagtudlo sa mga doktrina sa Simbahan samtang gisalikway ang awtoridad sa mga presidente sa misyon nga nadestino ngadto sa Mexico kinsa dili mga lumad nga mga Mexikano. Niadtong 1946, ang Presidente sa Simbahan nga si George Albert Smith mibiyahe ngadto sa Mexico sa pagdumala og usa ka komperensiya alang sa pagpahiusa og usab, gidala ang mga sakop sa Ikatulo nga Kombensiyon balik ngadto sa pakigdait sa ubang mga miyembro sa Simbahan.²

Pipila ka lahi nga mga hinungdan misangpot ngadto sa dekada nga pagkabahin-bahin. Samtang ang mga miyembro sa Simbahan sa tibuok kalibotan usahay nakasinati og kasagmuyo sa mga lider sa Amerikanong misyon sa sayong bahin sa ika 20 nga siglo, adunay mga kahimtang nga lahi ngadto sa Mexico nga nakamugna og dugang nga tensiyon. Ang mga lider sa Simbahan misira sa tibuok Misyon sa Mexico gikan sa 1889 hangtod sa 1901 ug gibawi ang mga langyaw nga mga misyonaryo gikan sa Mexico gikan sa 1912 hangtod sa 1917 atol sa Mehikanong Rebolusyon.³ Niadtong 1926, ang gobyerno sa Mexico mipapahawa sa langyaw nga klero [clergy] isip kabahin sa panglimbasog batok sa simbahang Katoliko. Milanog ang mga paglantugi sa publiko kabahin sa panginahanglan sa lokal nga relihiyosong pagpangulo uban sa daghang Mehikanong Santos sa Ulahing mga Adlaw. Tungod sa kasaysayan sa pagpihig sa kaliwatan batok sa lumad nga mga tawo sa Estados Unidos ug Mexico, ang mga Mehikano uban sa mga lumad nga katigulangan nakakaplag og kalig-on diha sa mga pagtulon-an sa Basahon ni Mormon mahitungod sa lumad nga mga Amerikano isip ang pinili nga katawhan ug naglantaw sa ilang gisaad nga pagbag-o ug tahas diha sa pagpangulo.⁴

Niadtong 1931, human sa kalit nga kamatayon ni Rey L. Pratt, dugay na nga presidente sa misyon kinsa nakakuha og katahoran sa mga miyembro nga Mehikano, si Antoine R. Ivins gitawag sa pagdumala sa Misyon sa Mexico. Atol sa Rebolusyon, ang misyon midako sa paglakip sa mga sinultihan nga Kinatsila didto sa Estados Unidos, ug sa hapit usa ka tuig, gitutokan ni Ivins kadtong mga branch nga walay pagkontak o pagbisita sa mga miyembro didto sa Mexico. Atol nianang panahona, ang mga lokal nga mga lider lakip ni Isaías Juárez, Bernabé Parra, ug ni Abel Páez kaduha mipetisyon sa Unang Kapangulohan sa pagtawag og Mehikanong presidente sa misyon kinsa hingpit nga makapadagan ubos sa balaod sa nasod ug motabang sa mga lider sa Simbahan nga makasabot sa mga panginahanglan sa Mehikanong mga miyembro. Ang mga panagtigom diin ilang giorganisar kining mga petisyon nahimong naila isip ang una ug ikaduha nga mga kombensiyon. Niadtong 1932, si Ivins mibadlong sa mga partisipante tungod sa paggamit sa proseso sa petisyon diha sa usa ka kahimtang sa Simbahan apan mipasalig nila nga ang ilang mga kabalaka hatagan og pagtagad sa tukmang panahon.⁵

Pipila sa mga miyembro nga Mehikano milaom nga ang panahon miabot na niadtong 1936 sa dihang gimugna ang Spanish-American nga Misyon alang sa mga branch sa Estados Unidos, gipasagdan ang Mexican Mission nga motutok sa Mexico. Sa dihang si Harold W. Pratt nga gikan sa mga koloniya sa mga Santos sa Ulahing mga Adlaw sa amihanang bahin sa Mexico gipabilin isip presidente sa misyon, pipila ka lider ang misulat og ikatulo nga petisyon sa pagtawag og usa ka presidente sa misyon nga Mehikano pinaagi sa “raza y sangre” (kaliwat ug kadugo). Kini nga paningkamot mibahin-bahin sa lokal nga mga lider ug mga miyembro ug misangpot ngadto sa pag-excommunicate sa nangulo sa petisyon niadtong 1937. Kadtong kinsa misuporta sa petisyon mipili mga maglahi sa pakigtigom gikan sa tanan sa Simbahan, uban ni Abel Páez isip ilang lider.

Alang sa misunod nga dekada, ang Third Conventionists [Ikatulo nga mga Kombensiyonista] mipahigayon og mga panagtigom, mitukod og mga chapel, mimantala og usa ka pamantalaan, mitawag og mga misyonaryo, ug sa laing paagi mipatuman og mga programa kalabot sa Simbahan. Si Páez misupak sa mga paningkamot sa pag-usab sa mga polisiya sa grupo ug mipapha ni Margarito Bautista, usa ka lider sa Kombensiyon, tungod sa pagsulay sa pagbuhat og poligamiya.⁶ Sa sayong bahin sa 1940, ang presidente sa misyon nga si Arwell L. Pierce mihimo og prayoridad sa pagpaminaw sa mga sakop sa Ikatulo nga Kombensiyon ug inanayng midirekta pag-usab sa mga panag-istorya mahitungod sa lumad nga pagpangulo gikan sa gipangayo alang sa usa ka presidente sa misyon sa Mexico ngadto sa plano sa umaabot nga mga stake sa Mexico. Si Páez naagni sa mga argumento ni Pierce. Ang Unang Kapangulohan mibakwi sa kanhing mga aksiyon sa pagdisiplina batok sa mga lider sa Ikatulo nga Kombensiyon. Pagka Mayo 20, 1946, si Presidente George Albert Smith miabot sa Siyudad sa Mexico aron sa pagbisita sa mga miyembro ug sa pagtambong sa komperensiya sa pagpahiusa og usab.

Si Presidente George Albert Smith namulong atol sa komperensiya sa pagpahiusa og usab didto sa meetinghouse sa Ermita Branch, Siyudad sa Mexico, Mayo 1946.

Ang mga sakop sa Ikatulo nga Kombensiyon mihangop ni Presidente Smith pinaagi sa pagkanta og himno nga “Salamat, O Dios sa Propeta.” Atol sa komperensiya, si Smith namulong sa panginahanglan alang sa panaghiusa ug panag-angay. Si Páez namulong usab ug mipaambit sa iyang kalipay sa pagbalik sa Simbahan ug sa iyang kadasig alang sa unsay mahimong matuman sa umaabot. Sa pagtapos sa komperensiya, si Presidente Smith midapit sa mga miyembro sa pagpundok sa ilang mga anak aron siya makahatag kanila og usa ka panalangin.⁷

Human sa komperensiya, si Pierce mitawag og lokal nga mga miyembro, lakip sa mga lider sa Ikatulo nga Kombensiyon, ngadto sa usa ka bag-ong naporma nga konseho sa liderato sa misyon. Ingon nga nakabaton og kasinatian, ang mga lider sa misyon ug mga miyembro nakakaplag og usa ka bag-ong sistema alang sa pagpadayon sa unahan nga magtambayayong.

May Kalabotan nga mga Hisgotanan: Mexico, Colonies in Mexico, George Albert Smith, Growth of Missionary Work