“Paghusay sa mga Kabtangan ni Joseph Smith,” Mga Hisgutanan sa Kasaysayan sa Simbahan
“Paghusay sa mga Kabtangan ni Joseph Smith”
Paghusay sa mga Kabtangan ni Joseph Smith
Ang unang mga pagpadayag nga gihatag ngadto ni Joseph Smith nagmando sa mga Santos sa Ulahing mga Adlaw sa pagpundok ug sa pagtukod og mga komunidad, mga siyudad, ug mga templo. Kini nga mga paningkamot nagkinahanglan og dakong mga kantidad sa kwarta, ilabi na sa pagpamalit og yuta. Isip Presidente sa Simbahan, nangulo og mga paningkamot si Joseph Smith aron sa pagtuman niining gipadayag nga mga obligasyon, nagpili sa paghulam og kwarta gikan sa mga magpautang gumikan nga ang Simbahan gamay ug adunay diyutay lamang nga mga kapanguhaan. Usa ka tibuok nasud nga pagkunhod sa ekonomiya sa hinapos sa mga 1830 ug sa pagsugod sa mga 1840 nahimo niini nga mas lisud alang kaniya sa pagbayad sa iyang mga giutangan didto sa Ohio. Human siya mibalhin ngadto sa Missouri sa 1838, mihatag siya sa uban og awtoridad sa pagpadayon sa proseso sa paghusay sa iyang mga utang sa Ohio.
Ang mga Santos sa wala madugay gipapahawa gikan sa Missouri ug namuyo libut sa Nauvoo, Illinois. Ang pagkawalay hustisya niining pinugos nga pagpabiya naglakip sa grabeng pinansyal nga kadaot samtang si Joseph ug ang mga Santos nawad-an og dakong kantidad sa yuta sa Missouri nga ilang gihutdan og bayad. Sila mihangyo sa gobyerno sa Estados Unidos nga magpabayad sa yuta apan wala tuguti. Sa samang panahon, mga liboan ka mga kinabig nangabut gikan sa mga misyon sa Simbahan, ug buot ni Joseph nga motabang niining mga gipapahawa ug mga pamilya sa mga lalin sa pagbaton og yuta ug mga oportunidad sa pag-uswag. Tungod niini nga katuyoan, tali sa 1839 ug 1841, nakigsabut siya sa pagpalit og dinosena nga mga lote sa Illinois, nga mikabat duol sa 200 ka mga ektarya.1
Kini nga mga pagpalit sa yuta naglakip og daghan nga pinansyal ug legal nga mga detalye. Ubos sa balaod sa Illinois, ang usa ka simbahan makapanag-iya lamang og yuta pinaagi sa pagpili og legal nga modumala sa legal nga gipanag-iya nga yuta alang sa simbahan. Diha sa usa ka linain nga komperensya kaniadtong Enero 1841, gitudlo sa Simbahan si Joseph nga legal nga modumala sa Simbahan, ubos diin nga ulohan gidumala niya ang yuta sa Simbahan. Pinasubay niana, gisugdan niya ang pagbalhin sa daghang mga kabtangan nga kaniadto iyang gipanag-iya ngadto sa iyang kaugalingon isip tigdumala sa Simbahan.2 Ni si Joseph, ubang mga lider sa Simbahan, ni ang ilang legal nga mga tigtambag mipakita nga nakasabut nga sumala usab sa balaod, ang mga simbahan sa Illinois dili makapanag-iya og labaw sa duha ka mga ektarya sa yuta.3
Ang personal nga mga utang ni Joseph mipabilin nga mahinungdanong palas-anon. Sa 1841 usa ka bag-ong balaod nahimong opisyal nga mitugot sa mga mangutang (dili, sama sa una, ang nagpautang lamang) nga mopahayag og pagkabangkaruta. Wala madugay ang mga korte dihay daghan kaayong mga hangyo alang sa pagwagtang sa utang. Sa tambag sa iyang mga abogado, gipahimuslan ni Joseph ang oportunidad sa pagpalista sa pagkabangkaruta, lakip ang nagpabiling mga obligasyon gikan sa Ohio, usa ka dako kaayo nga transaksyon sa yuta sa Illinois, ug ang nahibilin nga utang diha sa usa ka de makinang bapor nga gipalit sa daghang negosyante sa Nauvoo nga ang utang gigarantiyahan ni Joseph.4
Sa 1842 usa ka kanhiay Santos sa Ulahing mga Adlaw ug publikong nanaway sa Simbahan, si John C. Bennett, miakusar ni Joseph diha sa pamantalaan nga sa tikas nga paagi gibalhin ang mga kabtangan ngadto sa iyang pamilya ug sa Simbahan aron sa pagpugong nga isubasta aron ibayad sa mga nagpautang sa panahon sa mga palakaw sa pagkabangkaruta.5 Usa ka abogado sa distrito, si Justin Butterfield, mihisgot sa mga kiha kauban sa legal nga tigtambag sa United States Treasury, kinsa mitugot sa pag-abli og imbestigasyon sa mga transaksyon ni Joseph. Mipasaka og kiha si Butterfield aron dili matugutan ang hangyo ni Joseph alang sa pagkabangkaruta, ug gilangan sa korte sa distrito ang katapusang husay sulod sa 11 ka semana.6 Sulod niana nga panahon, nakigkita si Butterfield ni Joseph Smith ug miuyon nga mahimo niyang manlalaban sa panahon nga ang husay adto sa lain nga estado pagahimoon.7 Pila ka bulan ang milabay, misulat si Butterfield ngadto sa tigtambag, nagpahibalo nga wala siya nagplano sa pagbatok sa pagkabangkaruta ni Joseph base sa sayop nga mga kiha apan sa pagtugot sa hangyo sa pagpadayon human nga makabayad na si Joseph sa utang sa de makinang bapor.8
Ang wala damha nga kamatayon ni Joseph Smith sa pagka-1844 mihunong sa mga palakaw sa pagkabangkaruta. Ang biyuda ni Joseph, si Emma Smith, mibati diha dayon og kaugtas gikan sa mga nagpautang sa pagbayad sa mga utang ni Joseph ug giaghat ang Simbahan sa pagtudlo sa walay paglangan og usa ka legal nga tigdumala sa mga kabtangan. Ang problema kabahin sa mga panalapi ni Joseph detalye nga gihisgutan sa unang mga miting sa konseho human sa pagkamatay ni Joseph. Sugod sa iyang pagkatudlo isip tigdumala sa mga kabtangan kaniadtong 1841, gisugdan ni Joseph Smith ang mas mabinantayon nga pag-ila tali sa iyang personal nga mga panalapi ug niadtong sa Simbahan, apan ang duha mipabilin nga konektado sa panahon sa iyang pagkamatay. Ang mga lider sa Simbahan ug ang mga sakop sa pamilyang Smith wala magkasinabtanay sa pipila ka mga bahin sa kabtangan ni Joseph, lakip kon kinsa ang responsable sa pipila sa iyang wala mabayri nga mga utang. Sa katapusan, tanan sila milangan sa mga pamaagi sa korte aron sa pagbayad sa mga nagpautang.9
Sa Agosto 1844 si Bishop Newell K. Whitney ug George Miller gipaluyohan isip legal nga mga tigdumala alang sa Simbahan, ug sa wala madugay misugod sa pagpamaligya sa yuta nga gihuptan ni Joseph alang sa Simbahan.10 Mihimo usab si Emma og mga paningkamot sa pagkuha og mga katigayunan aron sa pagpanalipod kaniya ug sa iyang mga anak batok sa pagka-embargo. Ang pag-atubang sa daghang mga detalye ug mga pag-angkon sa kabtangan ni Joseph Smith lisud para sa mga sakop sa pamilyang Smith ug sa mga lider sa Simbahan.11
Sa 1850 usa ka abugado sa Estados Unidos mikiha aron sa pagkolekta og bayad sa de makinang bapor pinaagi sa halin sa yuta nga gihuptan sa kabtangan ni Joseph Smith. Ang kiha sa abugado miangkon, sama sa kang Bennet sa milabay nga mga katuigan, nga si Joseph mibalhin og mga yuta ngadto sa Simbahan sa tikas nga paagi. Ang huwes, bisan pa niana, wala makakita og panikas.12 Misulti hinoon siya sa balaod sa Illinois nga nagpugong sa gidaghanon sa ektarya sa yuta nga mapanag-iya sa usa ka simbahan, nagpiho nga kasagaran sa yuta nga gihuptan ni Joseph isip usa ka indibidwal ug isip legal nga tigdumala sa Simbahan mahimong ikabaligya aron sa pagbayad sa utang sa de makinang bapor. Gimando sa korte ang pagbaligya sa yuta ug mitudlo og linain nga eksperto aron sa pag-inspeksyon sa mga kabtangan ug sa legal nga mga dokumento. Miuyon si Emma sa pagbiya sa iyang pag-angkon isip biyuda ni Joseph, sa diin maka-angkon unta siya sa ikatulong bahin sa mga yuta (nagpasabut nga siya makapuyo diha o mahimong ipa-abang ang yuta apan dili makabaligya niini o makabilin niini ngadto sa iyang mga anak), agi ug ilis sa ikaunom nga bahin sa halin sa yuta. Usa ka commissioner nga gitudlo sa huwes naghimo og tulo ka subasta ug gidumala ang pagbayad sa mga wala mabayri nga mga utang kaniadtong 1851 ug 1852, nga malampusong mitapos sa husay sa mga kabtangan ni Joseph sa Illinois. Sa Ohio ug Iowa, ang mga hitabo sa kabtangan mipadayon ngadto sa mga 1860.13
Kalabut nga mga Hisgutanan: Deaths of Joseph and Hyrum Smith; Nauvoo (Commerce), Illinois; Succession of Church Leadership; Departure from Nauvoo