Riles sa Tren

Katorse ka tuig human ang mga Santos sa Ulahing mga Adlaw unang misulod sa Walog sa Salt Lake, nagsugod ang Gubat Sibil sa Amerika, ug ang mga opisyal sa gobyerno sa Estados Unidos nagtinguha sa pagpalambo sa linghod nga inprastraktura sa riles sa nasud aron matabangan ang paningkamot sa gubat. Usa ka bag-o nga balaod mihimo og usa ka kalit nga pag-usbaw sa paghimo og mga riles, nga adunay kapin sa 40.47 milyon ka ektarya sa pampublikong yuta nga gitanyag sa mga kompanya aron pahimutangan og riles.¹

Nahadlok ang daghang mga Santos sa Ulahing mga Adlaw diha sa Teritoryo sa Utah nga ang kusog nga pag-uswag sa sistema sa riles magdala og mabatukon nga mga taga-gawas o kalibutanong mga impluwensya nga makasamok sa relihiyuso ug ekonomikanhong kinabuhi diha sa mga pamuy-anan. Apan nakita usab ni Brigham Young kon sa unsang paagi nga ang kining bag-o nga pamaagi sa transportasyon makabenepisyo og dako sa buhat sa Simbahan. Ang mga manedyer sa kompanya sa riles miduol kang Brigham Young niadtong 1868 mahitungod sa pagkompleto og linya sa riles nga mosumpay sa silangang Estados Unidos ngadto sa baybayon sa Pasipiko—usa ka “transcontinental” [latas sa maong kontinente] nga network. Giendorso ni Young ang riles nga moagi sa Utah niadto pang niaging dekada, ug giawhag niya ang mga Santos nga motampo sa pagtukod niini. Mipirma siya og mga kontrata uban sa Union Pacific ug Central Pacific nga mga kompanya, nga misaad og total nga 5,000 ka mga lalaki nga motabang sa paghuman sa kapin 350 ka milya [560 ka kilometro] nga riles.²

Wala kaabut og usa ka tuig ang milabay, niadtong Mayo 10, 1869, ang katapusang bahin sa riles gibutang sa Promontory Summit sa amihanang Utah, nga opisyal nga mikompleto sa transcontinental nga riles sa tren. Ang mga presidente sa Union Pacific ug Central Pacific nga mga kompanya mipasidungog sa mga Santos sa pagbuntog sa katapusang mga babag nga mipugong sa pagkumpleto sa riles. Ang riles nakahatag og benepisyo diha-diha dayon sa buhat sa Simbahan, kay usa ka semana ang milabay, ang mga trabahador nga Santos sa Ulahing mga Adlaw misugod sa pagtukod og usa ka ekstensyon nga nagsumpay sa transcontinental nga riles ngadto sa Siyudad sa Salt Lake. Ang transportasyon sa mga palaliton padulong ug gikan sa Utah milambo. Usa ka dugang nga linya sa riles nakompleto niadtong 1871 nga mitabang sa paghakot og mga bato gikan sa Little Cottonwood Canyon ngadto sa nahimutangan sa Templo sa Salt Lake. Mas sayon nga mibiyahe ang mga misyonaryo ngadto ug sa sulod sa gitahas nga mga misyon. Ang langyaw nga mga Santos dili na kinahanglan nga mobiyahe ngadto sa Utah pinaagi sa karwahe o karomata, nga nagtapos sa dugayng panahon nga pagbiyahe diha sa yuta. Ang molungtad og pipila ka bulan nga pagbiyahe pinaagi sa karwahe niadtong 1847 mahimo na karong mabiyahe og pipila ka mga adlaw lamang pinaagi sa tren.