Kasaysayan sa Simbahan
Pagtuga [Endowment] sa Templo


“Pagtuga [Endowment] sa Templo,” Mga Hisgutanan sa Kasaysayan sa Simbahan

“Pagtuga [Endowment] sa Templo”

Pagtuga [Endowment] sa Templo

Niadtong 1841, ang Ginoo misugo sa mga Santos sa Nauvoo sa pagtukod og templo “aron Ako mopadayag sa akong mga ordinansa diha niini ngadto sa akong mga katawhan.”1 Kauban niining mga ordinansa mao ang usa ka seremonya nga gitawag og pagtuga, nga gipalapdan diha sa seremonya sa paghugas ug pagdihog nga gipaila ni Joseph diha sa Templo sa Kirtland niadtong 1836.2 Nahadlok nga hunosan siya sa kinabuhi sa dili pa makompleto ang templo, si Joseph Smith mitawag og pipila ka mga kalalakin-an niadtong Mayo 3, 1842, aron sa paghan-ay sa kwarto sa taas sa iyang Red Brick Store aron magrepresentar sa “sulod sa templo sigun sa gitugot sa kahimtang.”3 Pagkasunod adlaw, gipahigayon ni Joseph ang pagtuga sa unang higayon ngadto sa usa ka grupo nga siyam ka mga kalalakin-an. Atol sa mosunod nga duha ka tuig, iyang nahatag ang pagtuga ngadto sa ginagmayng grupo sa mga kalalakin-an ug mga kababayen-an ug mitudlo ug miandam kanila sa pagdumala sa ordinansa aron ang ubang takus nga mga Santos makadawat niini kon mahuman na ang templo.

Sukad sa sinugdanan, ang mga Santos sa Ulahing mga Adlaw nakasabut nga ang pagtuga usa ka butang nga gikinahanglan nga masinati kaysa yanong ihulagway lang. “Among nadawat ang pipila ka bililhon nga mga butang pinaagi sa Propeta mahitungod sa priesthood nga makapahimo sa inyong kalag nga maglipay,” si Heber C. Kimball misulat sa iyang kauban nga Apostol nga si Parley P. Pratt, kinsa wala didto sa Nauvoo sa dihang ang pagtuga unang gihatag. “Ako dili makahatag niini nganha kaninyo diha sa papel tungod kay kini dili angay isulat.”4 Sukwahi sa sinulat nga mga kasulatan, ang pagtuga mitudlo sa mga partisipante pinaagi sa pagdapit kanila nga sa simbolikanhong paagi giakto pag-usab ang importanting aspeto sa plano sa kaluwasan, lakip “ang labing importanting mga panghitabo sa panahon sa paglalang, ang kondisyon sa atong unang mga ginikanan diha sa Tanaman sa Eden, ang ilang pagkamasinupakon ug ang gisangputan nga pagpapahawa gikan niana nga maanindot nga pagpuyo, ang ilang kahimtang sa nagbinugtong ug awaaw nga kalibutan sa dihang gipanghimaraut sa pagpakabuhi pinaagi sa paghago ug singot, ang plano sa katubsanan diin ang dakong kalapasan mahimong maula.”5 Atol sa subling pag-akto niini, sila nakigsaad sa pagsunod sa mga sugo sa Dios, mipasalig nga mopahinungod sa ilang mga kaugalingon sa hingpit ngadto sa Iyang buhat, ug makaangkon og kahibalo nga gikinahanglan sa “paglakaw balik ngadto sa presensya sa Amahan.”6

Si Joseph Smith wala gayud mihulagway kon giunsa ang pagtuga, ug walay natala nga mga pagpadayag nga naglatid sa sulod niini. Hinoon, si Willard Richards, kinsa nalakip sa pipila nga nakadawat sa pagtuga gikan ni Joseph Smith, mipamatuod nga ang mga ordinansa “gidumala pinaagi sa mga baruganan sa Pagpadayag.”7 Human si Joseph Smith mipaila sa pagtuga, iyang gisugo si Brigham Young sa “paghan-ay ug pagbuhat og sistema nining tanan nga mga seremonya” aron kini mapahigayon sulod sa templo.8 Sa sinugdanan, ang seremonya sa pagtuga gipreserbar lamang diha sa panumduman sa mga partisipante. Niadtong 1877, sa dihang ang Templo sa St. George Utah nakompleto na, si Brigham Young migiya sa usa ka gamay nga grupo, lakip sa mga presidente sa templo nga si Wilford Woodruff sa Korum sa Napulog Duha ka mga Apostoles, sa pagsulat sa seremonya aron masiguro ang pagkamakanunayon paglabay sa panahon ug tali sa mga templo. Sa Templo sa St. George Utah usab napahigayon ang unang mga pagtuga alang sa mga patay.9

Bisan tuod nga ang porma sa simbolikanhong instruksyon ug paghimo og pakigsaad sa pagtuga nagpabilin nga mao ra gihapon, ang paagi nga ang ordinansa gipahigayon nausab paglabay sa panahon. Sa sinugdanan, ang seremonya milungtad hapit sa tibuok adlaw. Sa kadugayan ang mga henerasyon sa mga lider sa Simbahan nangita og balaanong giya aron mapamub-an ang seremonya, gihimong mas sayon alang sa mga miyembro ang paghimo sa gitugyan nga mga pagtuga alang sa mga patay.

Duha ka dagkong panghitabo sa tunga-tungang bahin sa ika-20 nga siglo sa kasaysayan ang nakapahimo sa seremonya sa pagtuga nga mas magamit ngadto sa mga Santos sa Ulahing mga Adlaw sa tibuok kalibutan. Atol sa ika-19 nga siglo, dihang ang mga Santos magpundok gihapon sa Utah aron motambong sa mga templo, ang seremonya sa pagtuga gipahigayon lang diha sa Ingles. Niadtong mga tuig 1940, hinoon, ang Unang Kapangulohan mi-assign kang Eduardo Balderas ug ni Elder Antoine R. Ivins sa paghubad sa mga seremonya sa pagtuga ngadto sa laing pinulongan, Spanish, sa unang higayon. Ang mga Santos gikan sa Mexico ug ang mga branch nga Spanish ang pinulongan diha sa Estados Unidos nagpundok ngadto sa Templo sa Mesa Arizona alang sa unang mga pagtuga sa Spanish nga pinulongan niadtong 1945.10 Niadtong 1953, ang Unang Kapangulohan mipili ni Elder Gordon B. Hinckley sa Korum sa Napulog Duha ka mga Apostoles sa pagpalambo og usa ka bag-ong paagi sa pagpresentar sa pagtuga sa daghang pinulongan sa higayon nga makompleto ang Templo sa Bern Switzerland. Ubos sa direksyon ni Elder Hinckley, gikuhaan og pelikula imbes aktwal nga mga artista ang magpresentar sa pipila ka bahin sa simbolikanhong pag-akto sa pagtuga alang sa unang higayon. Paglabay sa katuigan, isip Presidente sa Simbahan, si Presidente Hinckley mipasiugda sa usa ka dili ordinaryo nga mga panahon sa pagtukod og templo, gihimo ang pagtuga nga mas maduol nalang sa mga Santos sa Ulahing mga Adlaw sa tibuok kalibutan.

May Kalabutan nga mga Hisgutanan: Endowment of Power, Masonry, Nauvoo Temple

Mubo nga mga Sulat

  1. Revelation, 19 January 1841 [DC 124],” 6, josephsmithpapers.org; panulbok gi-standardize.

  2. Tan-awa sa Hisgutanan: Endowment of Power [Pagtuga og Gahum].

  3. Lucius N. Scovil letter, sa “The Higher Ordinances,” Deseret Evening News, Peb. 11, 1884, 2.

  4. Heber C. Sulat ni Kimball ngadto ni Parley P. Pratt, Hunyo 17, 1842, Parley P. Pratt correspondence, 1842–1855, Church History Library.

  5. James E. Talmage, House of the Lord: A Study of Holy Sanctuaries Ancient and Modern (Siyudad sa Salt Lake: Ang Simbahan ni Jesukristo sa mga Santos sa Ulahing mga Adlaw, 1912), 99–100.

  6. Brigham Young, sa “Minutes of the General Conference,” Deseret News, Abr. 16, 1853, 146. Tan-awa usab sa “About the Temple Endowment,” LDS.org.

  7. Andrew F. Ehat, “‘Who Shall Ascend into the Hill of the Lord?’ Sesquicentennial Reflections of a Sacred Day: 4 Mayo 1842,” sa Donald W. Parry, ed., Temples of the Ancient World: Ritual and Symbolism (Siyudad sa Salt Lake: Deseret Book, 1994), 51. Ang uban nga mga kauban ni Joseph Smith nagtuo nga ang Freemasonry “usa ka tikanganan o preparasyon” sa pagtuga. Tan-awa sa “‘They Might Have Known That He Was Not a Fallen Prophet’—The Nauvoo Journal of Joseph Fielding,” sa Andrew F. Ehat, trans., BYU Studies, vol. 19, nu. 2 (Tingtugnaw 1979), 7. Tan-awa usab sa hilisgutan: Masonry; Heber C. Sulat ni Kimball ngadto ni Parley P. Pratt, Hunyo 17, 1842, Parley P. Pratt correspondence, 1842–1855, Church History Library; Si Benjamin F. Johnson, My Life’s Review (Independence, Missouri: Zion’s Printing and Publishing Co., 1947), 96.

  8. L. John Nuttall diary, Peb. 7, 1877, typescript, Church History Library, Siyudad sa Salt Lake.

  9. Richard E. Bennett, “‘Line upon Line, Precept upon Precept’: Reflections on the 1877 Commencement of the Performance of Endowments and Sealings for the Dead,” BYU Studies, vol. 44, nu. 3 (Ting-init 2005), 61–62. Ang mga lider sa Simbahan gilauman nga mopahigayon sa pagtuga alang sa mga patay didto sa Nauvoo apan dili makahimo sa dihang ang mga Santos gipugos sa pagbiya niadtong 1846.

  10. Eduardo Balderas, “Northward to Mesa,” Ensign, Sept. 1972, 30–33.