Pagpahinungod ug Pagkatinugyanan

Sa mga siglo sukad ang pagsugod sa kapanahunan sa Kristiyano, daghang mga grupo ang naningkamot nga hingtupngan ang mga Kristiyano sa Bag-ong Tugon nga nahisgutan diha sa basahon sa Mga Buhat kinsa “gipanag-usahan sa pag-ambit ang tanang butang.”¹ Si Joseph Smith nakat-on pinaagi sa pagpadayag nga kining paagi sa pagpakabuhi adunay dugay na kaayong kagikan. Samtang nagtrabaho sa iyang dinasig nga paghubad sa Biblia atol sa ting-init sa 1830, si Joseph midiktar og usa ka pagpadayag mahitungod sa karaan nga siyudad ni Enoch, kansang mga tawo adunay “usa nga kasingkasing ug usa nga hunahuna” ug “walay kabus taliwala kanila.”²

Pagkasunod Enero, si Joseph Smith nakadawat og usa ka pagpadayag didto sa New York nga nagsugo sa mga Santos sa Ulahing mga Adlaw sa pagbalhin ngadto sa Ohio, diin ang Ginoo, “mohatag nganha kaninyo sa akong balaod.”³ Sa kasamtangan didto sa Ohio, usa ka grupo sa mga bag-ong kinabig nga naila isip “ang pamilya” nagpuyo sa umahan nilang Isaac ug Lucy Morley ug naningkamot sa pagpakabuhi sa unsay ilang nasabtan nga sumbanan sa Bag-ong Tugon sa paghiusa sa tanang butang.⁴ Sa ilang paghiabut sa Ohio, si Joseph Smith ug si John Whitmer nakaobserbar nga ang pamilyang Morley nagpraktis og communitarianism, samtang dalaygon, dili makasustiner.⁵ Pagka-Pebrero 9, si Joseph ug ang pipila sa uban nag-ampo ug nakadawat og pagpadayag nga naglatid sa balaod sa Ginoo.⁶ Nunot niining gipadayag nga giya, ang plano nga “komon nga kagamitan sa tanan” nga gipraktis diha sa umahan ni Morley “andam nga gibiyaan alang sa mas hingpit nga balaod sa Ginoo.”⁷

Makasaysayanong panimalay sa umahan ni Isaac Morley duol sa Kirtland, Ohio.

Usahay gitawag og “balaod sa pagpahinungod ug pagkatinugyanan,” kini nga pagpadayag nagtudlo sa mga Santos kon unsaon sa pagpadayon sa ekonomikanhong pagkaangay nga dili isalikway ang boluntaryong pagpili ug responsibilidad. Kini nakatuman niini dili pinaagi sa komon nga pagpanag-iya,” apan pinaagi sa pagsugo sa mga Santos sa pagpahinungod sa ilang mga kabtangan, o gihimo kini nga sagrado pinaagi sa paggamit niini aron mapadayon ang buhat sa Ginoo. Agig pag-ila nga ang tanan nilang yutan-on nga kabtangan iya gayud sa Dios, ang mga Santos sa Ulahing mga Adlaw mitugyan sa ilang mga kabtangan ngadto sa Ginoo pinaagi sa bishop apan gipabilin ang pagkatinugyanan—ug ang aktwal nga pagpanag-iya—sa yuta ug mga butang nga ilang gikinahanglan alang sa ilang kaugalingon. Bisan unsay ilang giisip nga sobra ilang idonar ngadto sa Simbahan aron sa pagpagaan sa kawad-on ug sa pagtukod sa Zion.⁸ Ang unang tahas sa katungdanan sa bishop sa Simbahan sa una mao ang pagpangalagad sa balaod sa pagpahinungod.⁹

Ang pagpatuman sa balaod sa pagpahinungod namatud-an nga malisud, tungod kay ang mga panginahanglan kanunayng molabaw sa mga kapanguhaan. Daghang mga Santos ang miabut sa Ohio ug Missouri diha sa usa ka nagkalisud nga estado, ang Simbahan nagkinahangan nga mopalit sa yuta diha sa Zion ug magtukod og mga gambalay, ug ang mga Santos usab nag-atubang og mga kaaway gikan sa ilang mga kasilinganan. Ang mga sakop sa Nagkahiusang Kapunongan—ang konseho nga gitahasan niadtong 1832 uban sa pinansyal nga pagdumala sa Simbahan—wala mouyon kon giunsa sa pag-prayoridad ang galastuhan.¹⁰ Ang pipila sa mga Santos manggihatagon sa unsay ilang giisip nga sobra ug midonar ngadto sa bishop; ang uban nagsalig og maayo ngadto sa sobra nga yuta ug kabtangan.¹¹

Duha ka pagpadayag niadtong 1838 mipaila sa balod sa ikapulo isip usa ka sangkap sa balaod sa pagpahinungod.¹² Kini nga mga pagpadayag nagtudlo nga human sa pagpahinungod sa ilang mga sobra nga kabtangan, ang mga Santos kinahanglan modonar og “ikanapulo sa ilang tanan nga mga tubo sa matag tuig.”¹³ Ang misunod nga mga propeta subling mihatag og pagpasabut nga ang ikapulo mao ang usa ka pamaagi diin ang mga miyembro sa Simbahan nagsunod sa balaod sa pagpahinungod.¹⁴

Samtang ang mga baruganan nga gipasikaran sa balaod sa pagpahinungod nagpabilin nga makanunayon, ang mga pamaagi sa mga Santos sa pagpatuman sa balaod nausab ubos sa propetikanhon nga direksyon ug agig tubag sa nagkausab nga mga kahimtang. Pananglitan, si Brigham Young miawhag sa pagtukod og mga kooperatiba sa tibuok Utah ug sa palibut nga mga dapit aron matabangan ang pagsustiner sa mga pinuy-anan sa utlanan ug mahaum ang ekonomikanhong mga buhat sa mga Santos sa mga pagpadayag ni Joseph Smith imbis sa tinagsa-tagsa nga ekonomiya sa Amerika. Kining mga kooperatiba, usahay tawagon og “balaan nga kapunongan,” gipatuman sa nagkalain-laing porma pinaagi sa lain-laing mga komunidad sa tibuok rehiyon sa Great Basin atol sa ulahing bahin sa ika-19 nga siglo.¹⁵

Usa ka sketch sa Orderville, Utah niadtong 1875, usa sa mga komunidad nga nagtinguha sa pagpatuman niining mga baruganan sa pagpahinungod ubos sa direksyon ni Brigham Young.

Agi og dugang sa pagbayad sa ikapulo, ang mga Santos adunay daghang paagi sa pagpahinungod sa ilang panahon, mga talento, ug mga pamaagi sa pagtuman sa buhat sa Ginoo. Sugod sa Kirtland, ang mga Santos mihatag og mga halad sa puasa alang sa mga kabus. Didto sa Nauvoo ug sa kadugayan sa Utah, ang mga kababayen-an sa Relief Society nakigsabut sa lokal ug kinatibuk-ang mga lider sa Simbahan aron sa pagsiguro sa mga panginahanglan sa mga timawa.¹⁶ Midonar ang mga miyembro sa Simbahan og mga kapanguhaan ngadto sa Perpetual Emigration Fund aron maminusan ang mga galastuhan sa mga kinabig sa gawas sa nasud nga gustong makauban sa panagpundok sa mga Santos didto sa Utah.¹⁷ Ang programa sa kahupayan sa Simbahan naestablisar niadtong mga 1930 aron sa pagtabang niadtong nanglimbasug ubos sa kahimtang sa pagkahagba sa ekonomiya sa Dakong Depresyon.¹⁸ Niadtong 2001, ang Presidente sa Simbahan nga si Gordon B. Hinckley mipasiugda sa Perpetual Education Fund aron ang mga miyembro sa Simbahan nga naglisud sa ekonomiya sa tibuok kalibutan makaangkon og mga pang-edukasyon nga mga oportunidad.¹⁹ Matag usa niining mga programa mitubag sa mga katuyoan sa balaod sa pagpahinungod ingon nga naestablisar pinaagi sa pagpadayag: aron sa pag-amuma sa kabus ug timawa, aron managsamang mabuhi diha sa gugma, aron malikayan ang pagkatapulan, ug aron makasuporta sa pagtubo sa Simbahan.

May Kalabutan nga mga Hisgutanan: Bishop, United Firm, Tithing, Female Relief Society of Nauvoo