Halangdong Konseho

Atol sa mga bulan human sa pag-organisar sa Simbahan niadtong Abril 1830, kadaghanan sa mga tighupot sa priesthood nanagpundok aron sa pagpahigayon og kalihokan sa Simbahan sa mga komperensya kada tulo ka bulan. Sulod sa usa ka tuig sa pag-organisar sa Simbahan, ang mga pang-administratiba nga mga panginahanglan niini nagkadako samtang nagkadaghan ang mga miyembro, natukod ang bag-ong mga pinuy-anan didto sa Ohio ug sa Missouri, ug ang Ginoo misugo sa mga Santos nga palapdan ang ilang mga paningkamot sa pag-establisar sa Simbahan. Ang pagpadayag ngadto ni Joseph Smith sa wala madugay mipatawag og lain-laing mga konseho aron magkatigum base sa lain-laing mga panginahanglan.¹ Kini nga mga konseho nanagpundok kon gikinahanglan aron sa pagpahigayon sa mga buluhaton sugod niadtong 1832, naglakip sa usa ka konseho nga gipangulohan ni Joseph Smith ug sa iyang duha ka magtatambag.² Apan aron makompleto ang konseho, si Joseph kinahanglan motawag sa kinsay anaa nga mga halangdong pari sa matag higayon nga sila kinahanglan nga magkatigum.³

Niadtong Pebrero 1834, si Joseph Smith nakigtigum uban sa usa ka grupo sa mga halangdong pari didto sa Kirtland ug miingon nga siya motudlo kanila “sa han-ay sa mga konseho sa karaang mga panahon … sumala sa gipakita ngadto kaniya pinaagi sa panan-awon.”⁴ Dayon mipadayon siya sa pag-organisar sa unang nagbarug nga halangdong konseho, nga gilangkuban sa 12 ka mga halangdong pari, nga modala sa mga isyu nga pang-administratiba ug pagdisiplina nga nakaapekto sa Simbahan sa Kirtland.⁵ Nianang ting-init, ang ikaduhang halangdon nga konseho naorganisar didto sa Missouri sa katuyoan sa “paghusay sa importanting buluhaton nga lagmit moabut diha kanila nga dili mahusay sa Bishop ug sa iyang konseho.”⁶

Sa misunod nga tingpamulak, ang Napulog Duha ka mga Apostoles natawag. Samtag ang ilang nag-unang katungdanan mao ang pagsangyaw sa ebanghelyo, nagserbisyo usab sila isip mga nagbiyahe nga halangdong konseho aron sa pagpangalagad sa mga buluhaton sa Simbahan sa ginagmay nga mga branch nga gawas na sa mga Stake didto sa Kirtland ug sa Missouri. Sa dihang namantala ang Doktrina ug mga Pakigsaad niadtong 1835, mga seleksyon gikan sa mga kahimuan sa unang panagtigum sa halangdong konseho, gidugangan sa paghatag og katin-awan sa katungdanan sa Napulog Duha ka mga Apostoles, gitapos isip usa sa nahaunang mga seksyon, naghatag og mga instruksyon sa mga pamaagi alang sa pagpahigayon og mga konseho.⁷

Sa Nauvoo, si Joseph Smith mihatag sa Napulog Duha ka mga Apostoles og awtoridad sa pagdumala sa pipila ka mga buluhaton sa Simbahan diha sa mga stake ingon man sa duol nga mga branch.⁸ Human sa iyang kamatayon, ang Napulog Duha milihok isip General Authority diha sa Simbahan, samtang ang mga halangdong konseho gipadayon nga giorganisar sa stake level. Karon, ang mga halangdong konseho sa stake nagtabang sa pagpangalagad sa buluhaton sa Simbahan sulod sa ilang stake, moapil diha sa mga desisyon sa pagdisiplina, ug mosuporta sa kapangulohan sa stake sa ilang pagpangalagad.

May Kalabutan nga mga Hisgutanan: Restoration of the Melchizedek Priesthood, Quorum of the Twelve